“… ဆိုပါစို့ …”

နေဘုန်းလတ်

မြန်မာနိုင်ငံက လမ်းမတွေထက်

ပွင့်ထွက်ခဲ့ရတဲ့ ဦးခေါင်းတွေများစွာထဲ

ခင်ဗျား သားသမီး တယောက်ယောက်ရဲ့ခေါင်း ပါခဲ့တယ် … ဆိုပါစို့

ကားနောက်ခန်းထဲ သားငယ်ရဲ့ သွေးတွေနဲ့ စိုရွှဲ

“ငါ့သားလေးသေသွားတာ ငါ့သားလေးသေသွားတာ” လို့အော်ဟစ်ငိုပွဲဝင်ခဲ့ရသူဟာ

ခင်ဗျားသာ ဖြစ်ခဲ့မယ် … ဆိုပါစို့

စစ်ကြောရေးစခန်းတွေမှာ

ပါးစပ်ထဲကို အက်ဆစ်တွေလောင်းထည့်

ငယ်ပါကို၊ မိန်းမအင်္ဂါကို ပိတ်ပိတ်ကန်

လက်တွေ တချောင်းချင်း တချောင်းချင်း ဖြတ်

အရက်စက်ဆုံးနည်းလမ်းတွေနဲ့

ညှင်းပမ်းသတ်ဖြတ်ခံခဲ့ရတဲ့ နိုင်ငံရေးအကျဉ်းသားတွေထဲ

ခင်ဗျားရဲ့ မောင်နှမ တယောက်ယောက်ပါခဲ့မယ် … ဆိုပါစို့

အေးအေးလူလူ တရားမှတ်နေရင်း

ဘယ်ကမှန်းမသိတဲ့ လူသတ်လက်နက်နဲ့

ရုတ်တရက်ကြီး အသတ်ခံလိုက်ရတဲ့ သက်ကြီးရွယ်အိုတွေထဲ

ခင်ဗျားရဲ့ အဖိုး ဒါမှမဟုတ် အဖွား ပါသွားခဲ့တယ် … ဆိုပါစို့

ဖရူဆို မိုဆိုရွာနားက လမ်းနဘေး

ကားတွေပေါ်ကြိုးတုတ်တင်

ကလေးငယ်တွေအပါအဝင်

အစုလိုက် အပြုံလိုက် မီးရှို့သတ်ခံရသူတွေထဲ

ခင်ဗျားရဲ့ မိသားစုဝင်တယောက်ယောက် ပါသွားခဲ့တယ် … ဆိုပါစို့

လက်ထုတ္တောရွာ ဘုန်းကြီးကျောင်းဝင်း တနေရာ

ပစ်သတ်ခံလိုက်ရတဲ့ စစ်ဘေးရှောင်တွေကြားမှာ

သေချင်ရောင်ဆောင်ပြီး ထွက်ပြေးလွတ်မြောက်လာခဲ့သူတယောက်ဟာ

ခင်ဗျားသာ ဖြစ်ခဲ့တယ် ဆိုပါစို့ …

(၄၄) လမ်း တိုက်ခေါင်မိုးတခုပေါ်ကနေ

အလွတ်ကြီးခုန်ချသေလိုက်ရတဲ့ လူငယ်တွေထဲ

ခင်ဗျားရဲ့သား ပါသွားခဲ့တယ် … ဆိုပါစို့

မိုးပေါ်က ကျကျလာတဲ့ ပေါင် (၅၀၀) ဗုံးတွေကြောင့်

ခြေထောက်လေးတဖက်တည်းနဲ့ လက်ကလေးတပိုင်းတည်းနဲ့

သင်္ဂြိုလ်ခဲ့ရတဲ့ …

ကလေးငယ်တွေ၊ ကိုယ်ဝန်ဆောင်မိခင်တွေရဲ့ ဈာပနတွေထဲ

ခင်ဗျားရဲ့ဇနီး … ခင်ဗျားရဲ့ကလေး ပါခဲ့တယ် … ဆိုပါစို့

ပဇီကြီး လေကြောင်းတိုက်ခိုက်မှုအပြီး

သူ့သမီးလေးကို အစအနတောင် ရှာမတွေ့တော့တဲ့ ဖခင်တယောက်ဟာ

ခင်ဗျားကိုယ်တိုင်သာ ဖြစ်ခဲ့မယ် … ဆိုပါစို့

လက်ယက်ကုန်းကျေးရွာက စာသင်ကျောင်းထဲ

ရဟတ်ယာဉ်နဲ့ ပစ်သတ်ခံလိုက်ရတဲ့ ကလေးငယ်တွေထဲ

ခင်ဗျားရဲ့ သမီးငယ်လေး ပါသွားခဲ့တယ် … ဆိုပါစို့

မုန်တိုင်ပင်ရွာဘုန်းကြီးကျောင်းနဘေး

လက်ပြန်ကြိုးတုတ် လူသတ်အလောင်းဖျောက်ခံလိုက်ရတဲ့ ရွာသူရွာသားတွေထဲ

ခင်ဗျားလည်း လက်ပြန်ကြိုးတုတ်ခံခဲ့ရတယ် … ဆိုပါစို့

တာတိုင်ရွာပြင်က ယာခင်းတခုမှာ

စွမ်လုံကျေးရွာမှာ

ဝက်လက်မြို့နယ်၊ ကျီးကန်မြောက်ရွာမှာ

စစ်ကိုင်းတိုင်းထဲက ကျေးရွာတွေမှာ

နိုင်ငံအနှံ့ စစ်ကြောင်းထိုးခံရတဲ့ ရွာတွေမှာ

မိသားစုဝင်တွေရဲ့ရှေ့မှာ … အဖေ၊ ခင်ပွန်း၊ မောင်ဖွားတွေရဲ့ရှေ့မှာ

အကြိမ်ကြိမ်မုဒိန်းကျင့်ခံရပြီးမှ

ရက်ရက်စက်စက် သတ်ဖြတ်ခံလိုက်ရတဲ့ အမျိုးသမီးတွေထဲ

ခင်ဗျားရဲ့ အမေ၊ အစ်မ၊ ညီမ တယောက်ယောက်သာ ပါသွားခဲ့တယ် … ဆိုပါစို့

မြောက်ခင်ရန်းရွာနားက သစ်ပင်ကြီးတပင်မှာ ချိတ်ဆွဲ

အရှင်လတ်လတ် မီးရှို့သတ်ခံလိုက်ရတဲ့ လူငယ်နှစ်ယောက်ထဲမှာ

တယောက်က ခင်ဗျားရဲ့ ညီငယ် ဖြစ်ခဲ့တယ် … ဆိုပါစို့

ဘုတလင်မြို့မှာ စစ်မိစ္ဆာတွေရဲ့ ကိုင်ပေါက်သတ်ခံလိုက်ရတဲ့

(၇)နှစ်သားအရွယ် ကလေးငယ်ဟာ

ခင်ဗျားရဲ့ သားလေး ဖြစ်ခဲ့မယ် … ဆိုပါစို့

စည်ပါရွာထိပ်က ခြံစည်းရိုးတိုင်တွေကြားမှာ

အပိုင်းပိုင်းဖြတ် ထိုးချိတ်ခံထားရတဲ့

လူခန္ဓာအစိတ်အပိုင်းတွေထဲ

ခင်းဗျား အဖေရဲ့အစိတ်အပိုင်းတခုခု ပါသွားခဲ့တယ် … ဆိုပါစို့

လူ့အဖိုးတန် သားသမီးတွေကို လက်လွှတ်ဆုံးရှုံး

အကောင်းအတိုင်း ပြန်မဖြစ်နိုင်တော့တဲ့ စိတ်နှလုံးတွေနဲ့

နေ့စဉ်ရက်ဆက် ကြေကွဲလွမ်းဆွတ်နေကြရတဲ့ မိခင်တွေများစွာထဲမှာ

ခင်ဗျားလည်း တယောက်အပါအဝင် ဖြစ်ခဲ့တယ် … ဆိုပါစို့

တော်လှန်ရေးအလံခြုံထားတဲ့ သားအလောင်းကို အလေးပြု

“ငါ့သား တာဝန်ကျေပါတယ်” ဆိုပြီး မျက်ရည်ဝဲ ဂုဏ်ပြုခဲ့ရတဲ့ ဖခင်တွေများစွာထဲမှာ

ခင်ဗျားလည်း တယောက်အပါအဝင် ဖြစ်ခဲ့တယ် … ဆိုပါစို့

… ဆိုပါစို့ …

… ဆိုပါစို့ …

… ဆိုပါစို့ … … … … ။ ။

(The Call – ​ခေါ်သံ” အွန်လိုင်းမဂ္ဂဇင်းမှာ ဖော်ပြခဲ့တဲ့ ‘​​နေဘုန်းလတ်’ရဲ့ “… ဆိုပါစို့ …” ကဗျာကို People’s Spring က ပြန်လည်​ဖော်ပြ​ပေးတာ ဖြစ်ပါတယ်။အနုရသကဲပြီး တော်လှန်​ရေးအတွက် အ​ထောက်အကူ ပြုတဲ့ စာ​ပေကဏ္ဍမျိုးစုံကို “The Call – ​ခေါ်သံ” အွန်လိုင်းမဂ္ဂဇင်းရဲ့ ​Facebook Page ဖြစ်တဲ့ https://www.facebook.com/profile.php?id=100087677882749… မှာလည်း သွား​ရောက်ဖတ်ရှုနိုင်ပါတယ်)