နွေးဦးတော်လှန်ရေးရဲ့ အရေးကြီးတဲ့ တိုက်ပွဲတွေ ချင်းပြည်နယ်မှာမနေ့ကစဖြစ်နေပါတယ်။အကြမ်းဖက်စစ်ကောင်စီက သူတို့အထိ့နာနေသလို ၊လူထုတော်လှန်ရေးအားကောင်းတဲ့ဒေသတွေဖြစ်တဲ့ ချင်းပြည်နယ်နဲ့စစ်ကိုင်းတိုင်းမှာ ထိုးစစ်ကြီးတွေဆင်ဖို့ အောက်တိုဘာလဆန်းမှာစစ်အင်အားအများအပြားဖြည့်တင်းနေပါတယ်။မနေ့ (အောက်တိုဘာ၁၃)က ဖလမ်းကနေ ဟားခါးကို လာနေတဲ့ အကြမ်းဖက်စစ်ကောင်စီယာဉ်တန်းကို ချင်းအမျိုးသားတပ်ဦး (CNF/CNA) နဲ့ ချင်းဒေသကာကွယ်ရေးတပ်ဖွဲ့ (CDF)တို့ကပူးပေါင်းတိုက်ခိုက်ခဲ့တာဖြစ်ပါတယ်။ဒါအပြင် ဟားခါးမြို့အထွက်ကနေ ထွက်ကြိုဖို့ ကြိုးပမ်းတဲ့စစ်ကောင်စီတပ်ကိုလည်းချင်းတော်လှန်ရေး အဖွဲ့တွေက တိုက်ခိုက်ခဲ့ပါတယ်။
စစ်ကိုင်းတိုင်းမှာလည်း အောက်တိုဘာလဆန်းမှာအင်အားအလွန်အကျွံတိုးချဲ့လာတဲ့ စစ်ကောင်စီတပ်တွေကို ဒေသအလိုက်ပြည်သူ့ကာကွယ်ရေးတပ်ဖွဲ့တွေကနေ့စဥ်ရက်ဆက် ပျောက်ကြားနည်းနဲ့ခုခံတွန်းလှန်နေပါတယ်။ ကယားပြည်နယ် ၊ကချင်ပြည်နယ် ၊ကရင်ပြည်နယ် ၊မကွေးတိုင်း ၊ရှမ်းပြည်နယ်၊ တနသာ်ရီတိုင်းစတဲ့ဒေသတွေမှာလည်း စစ်ကောင်စီတပ်တွေကို တိုင်းရင်းသားလက်နက်ကိုင်အဖွဲ့တွေရယ် ၊ ဒေသခံပြည်သူ့ကာကွယ်ရေးတပ်တွေကခုခံတိုက်ခိုက်မှုအရှိန်အဟုန်မြှင့်နေပါတယ်။ ရခိုင်ပြည်နယ်မှအပ ကျန်ဒေသတိုင်းလိုလိုမှာ ဒေသခံတော်လှန်ရေးအဖွဲ့တွေကအနည်းဆုံး မြို့ပြပျောက်ကြားစစ်ကိုဆင်နွှဲနေကြတာဖြစ်ပါတယ်။ဒေသအများစုမှာ တိုက်ပွဲတွေရှိနေပေမယ့် အကြမ်းဖက်စစ်ကောင်စီတပ်က စစ်ကိုင်းတိုင်းနဲ့ချင်းပြည်နယ်ကိုအလုံးအရင်းနဲ့ ထိုးစစ်ကြီးဆင်ဖို့လုပ်နေတာဖြစ်တဲ့အတွက်ပြည်သူတွေကနွေဦးတော်လှန်ရေးမှာအောင်ပွဲရချင်တာမှန်ရင် ဒီတိုက်ပွဲတွေအပေါ်အာရုံစိုက်ပေးဖို့လိုပါတယ်။ပြီးတော့ ပြည်သူ့ကာကွယ်ရေးတပ်တွေ ၊စစ်ဘေးဒုက္ခသည်တွေကို ရတဲ့နည်းလမ်းပေါင်းစုံကနေ ကူညီပေးကြဖို့ ၊ဝန်းရံပေးကြဖို့တာဝန်ရှိပါတယ်။
ဒီအချိန်မှာ မြန်မာနိုင်ငံမှာလူသုံးများတဲ့ဖေစ်ဘွခ်လူမှုကွန်ယက်မှာအလှပုံတွေတင်တာ၊ ဘုရားဖူးထွက်တာ၊ ဘောလုံးပွဲတွေအကြောင်းအာပေါင်အာရင်းသန်သန်ပြောတာ၊ Netflix က Squid Game အကြောင်းတော်ကီပွားတာ၊ ကိုရီးယားမင်းသားမင်းသမီးအကြောင်းပြောဆိုနေတာ၊ တစ်ရက်တစ်ရက် ဖေ့စ်ဘွတ်ခ်ရေးစီးကပေါ်ပင်တွေပေါ်မှာသာယာနေတာ စတဲ့နွေဦးတော်လှန်ရေးကို အထောက်အကူမဖြစ်တာတွေကို ခေတ္တရပ်ထားကြပြီး ပြည်သူ့တပ်တွေရဲ့ခုခံတိုက်ပွဲတွေအပေါ်အာရုံစိုက်ပေးဖို့ မေတ္တာရပ်ခံပါတယ်။ အခုလိုစစ်ပွဲတွေဖြစ်နေတဲ့အချိန်မှာ ဘုရားဖူးသွားလိုက်၊ ဘားသွားလိုက် ၊ကလပ်တက်လိုက် ၊ KTV တွေမှာသောက်စားပျော်ပါးလိုက်လုပ်နေတာတွေက ဘယ်လိုမှမသင့်တော်ပါဘူး။ဒီလိုလုပ်တာက တော်လှန်ရေးအဖွဲ့သားတွေ၊ ဓမ္မဘက်တော်သားတွေစော်ကားနေတာနဲ့အတူတူပါပဲ ။
ဒေသအသီးသီးက ပြည်သူ့သားသမီးဖြစ်တဲ့ လူငယ်တွေ ၊တိုင်းရင်းသားညီအစ်ကိုတွေက လက်နက်ဆွဲကိုင်ပြီး ကမ္ဘာပေါ်မှာ အရက်စက်၊အယုတ်မာဆုံး မင်းအောင်လှိုင်ရဲ့စစ်တပ်ကို ရင်ဆိုင်တိုက်ခိုက်နေတာဟာစစ်တိုက်ချင်လွန်းလို့မဟုတ်ပါဘူး။အာဏာလုယူခဲ့တဲ့ စစ်ကောင်စီကို မလိုလားကြောင်းလပေါင်းများစွာငြိမ်းချမ်းစွာဆန္ဒထုတ်ဖော်ခဲ့တဲ့ပြည်သူတွေရဲ့ဆန္ဒကို မျက်ကွယ်ပြု၊ ရက်ရက်စက်စက်ပစ်သတ် ၊နေ့စဥ်နဲ့အမျှ ပြည်သူကိုရန်သူလိုသဘောထားပြီး ဖမ်းဆီး၊သတ်ဖြတ်၊လုယက်၊ အဓမ္မပြုကျင့်၊ ဖျက်ဆီးနေတဲ့အကြမ်းဖက်စစ်တပ်ကို ဖြုတ်ချဖို့တခြားနည်းလမ်းတွေမရှိတော့တဲ့အဆုံးမှာ ပြည်သူတွေက တော်လှန်ရေးအဖွဲ့တွေနဲ့ပူးပေါင်းပြီး လက်နက်ဆွဲကိုင်ခုခံတော်လှန်နေတာဖြစ်ပါတယ်။
နေစဥ်နဲ့အမျှ ဘယ်အချိန်ကိုယ့်အိမ်တံခါးလာခေါက်ပြီးဖမ်းမလဲ၊ ဘယ်နေရာမှာပစ်သတ်ခံရလဲလို ကြောက်စိတ်နဲ့နေရတဲ့အခြေအနေကလွတ်မြောက်ဖို့ ၊ အကြမ်းဖက်စစ်တပ်ရဲ့ စစ်ကျွန်ဘဝကလွတ်မြောက်ဖို့ ၊ ဒီမိုကရေစီနဲ့လူ့အခွင့်အရေးတွေပြန်ရဖို့ ၊ ဖက်ဒရယ်ဒီမိုကရေစီရဖို့ ၊ အရာအားလုံးကိုဖျက်ဆီးနေတဲ့ အကြမ်းဖက်စစ်ခေါင်းဆောင်တွေရဲ့ ထင်တိုင်းကျဲမှုတွေအောက်က လွတ်မြောက်ဖို့ မြန်မာနိုင်ငံသားအားလုံးအတွက် ပြည်သူ့ကာကွယ်ရေးတပ်ဖွဲ့တွေ ၊ တိုင်းရင်းသားလက်နက်ကိုင်အဖွဲ့တွေက အကြမ်းဖက်စစ်တပ်ကို ခုခံတော်လှန်နေကြတာဖြစ်ပါတယ်။ ဒါကို ပြည်သူတွေက ရှင်းရှင်းလင်းလင်းသိ့မြင်နားလည်ဖို့လိုပါတယ်။
ရွေးကောက်ပွဲမဲလိမ်လို့အာဏာထိန်းတာဆိုတဲ့ လုပ်ကြံဇာတ်လမ်းဆင်ပြီး နောက် ၂ နှစ်အကြာမှာရွေးကောက်ပွဲလုပ်ပြီးအာဏာပြန်လွှဲပေးမယ့်လို့ အကြမ်းဖက်ခေါင်းဆောင် မင်းအောင်လှိုင်ရဲ့ ပျက်လုံးတွေကို အတည်ထင် ယုံကြည်အောင်ပြည်သူတွေဥာဏ်မတိမ်ဘူးလို့ယုံကြည်ပါတယ်။ သမ္မတလုပ်ချင်လို့အာဏာသိမ်းတဲ့မင်းအောင်လှိုင်နဲ့ စစ်ဗိုလ်ချုပ်တွေဟာ သူတို့စီမံသလိုမဖြစ်လာဘဲ ၊လပေါင်းများစွာအကျပ်အတည်းဖြစ်ခဲ့တာကြောင့် နိုင်ငံ့အာဏာကိုတစ်ကယ်သာချုပ်ကိုင်သွားနိုင်ရင် အနည်းဆုံးနှစ် ၅၀ ကနေ နှစ်၁၀၀ လောက်အထိ့တိုင်းပြည်ကို စိတ်တိုင်းကျဖျက်ဆီးကြမှာဖြစ်ပါတယ်။အဲဒီလိုသာဖြစ်ခဲ့ရင် နိုင်ငံအတွက်စေတနာမရှိသလို ကိုယ်ရည်ကိုယ်သွေးညံဖျင်းလှတဲ့အာဏာရူးတွေရဲ့အောက်မှာကျွန်တော်သာမက၊ကျွန်တော်တို့ရဲ့သားသမီး၊မြေးမြစ်တွေပါ စစ်ကျွန်ခံရမှာဖြစ်ပါတယ်။ပြည်သူတစ်ယောက်ချင်းက ဒီအခြေအနေမျိုး လက်ခံနိုင်လား၊ မိမိတို့မျိုးဆက်တွေအတွက် အဲလိုအမွှေးဆိုးတွေချန်ထားရစ်နိုင်လားဆိုတာသေချာစဥ်းစားကြည့်ပါဦး။ အခုနွေဦးတော်လှန်ရေးက ပြည်သူတွေ ရဲ့ ညီညီညွတ်ညွတ်နဲ့ တွန်လှန်းမှုကြောင့် အာဏာလုစစ်ကောင်စီ အထိ့နာနေသလို ၊ နိုင်ငံတကာမျက်နှာစာမှာလည်းအရှုံးကြီးရှုံးနေပါတယ်။ တိုင်းရင်းသားလက်နက်ကိုင်အဖွဲ့တွေရယ် ၊ပြည်သူတော်လှန်ရေးအဖွဲ့တွေရဲ့ သတ္တိကောင်းကောင်းနဲ့ခုခံတိုက်ခိုက်နေမှုကြောင့် အခုဆို
မင်းအောင်လှိုင်ရဲ့ စိတ္တဇလူသတ်စစ်တပ်ဟာ ဘယ်တုန်းကမှမကြုံဖူးတဲ့ ကျယ်ပြောလှတဲ့စစ်မျက်နှာပေါင်းစုံကိုဖွင့်ထားရပြီး အထိ့လည်းနာ ၊စစ်လည်းပန်းနေပြီဖြစ်ပါတယ်။ခေတ်မီ၊ စစ်နက်နက်တွေ ၊စစ်ဘက်သုံးယန္တရားတွေ ကြောင့်အင်အားကြီးမားတယ်လို့ထင်ရပေမယ့် ပြည်သူတွေကိုရန်သူလို ရက်စက်ယုတ်မာခဲ့တဲ့ရလဒ် ပြည်သူတွေရဲ့ နာကျည်းမှုတွေကြောင့် တပ်သားသစ်ခေါ်ယူဖြည့်ဆည်းဖို့အလွန် ခက်ခဲနေပြီဖြစ်ပါတယ်။ ပြည်သူတွေရဲ့ ထောက်ခံအားပေးမှုမရှိတော့ဘဲ၊ ပြည်သူတွေက မင်းအောင်လှိုင်စစ်တပ်ကို အကြမ်းဖက်လက်နက်ကိုင်အဖွဲ့လို့ရှုမြင် ဆက်ဆံတာကြောင့် နေရာအနှံ့မှာ စစ်ကောင်စီတပ်ဟာယုံကြည်မှာပျောက်ဆုံးပြီး ပြည်သူ့သစ္စာလည်းစူးနေပြီဖြစ်ပါတယ်။
နိုင်ငံတကာမျက်နှာစာအပါအဝင်ဘက်ပေါင်းစုံအထိ့နာနေတဲ့အကြမ်းဖက်စစ်ကောင်စီက သူတို့ရဲ့ နောက်ဆုံးတိုက်ပွဲအနေနဲ့ တော်လှန်ရေးအားကောင်းတဲ့ ချင်းနဲ့စစ်ကိုင်းကို ဖြိုခွင်းပြီးနွေးဦးတော်လှန်ရေးကို ဦးချိုးဖို့ အခုကြိုးစားလာတာဖြစ်ပါတယ်။ ကုလသမဂ္ဂမှာ မြန်မာနိုင်ငံကိုယ်စားပြုမှုနဲ့ပတ်သပ်ပြီး ဆွေးနွေးဖို့ရှိတဲ့ လာမယ့်နိုဝင်ဘာလအမီ တော်လှန်ရေးအားကောင်းတဲ့ စစ်မျက်နှာတွေကို ထိုးစစ်ဆင်ပြီး နိုင်ငံကိုထိန်းချုပ်နိုင်ပြီလို့ပြချင်နေပုံလည်းရပါတယ်။
ဒါကြောင်း ချင်းပြည်နယ်နဲ့စစ်ကိုင်းတိုင်းအပါအဝင် နိုင်ငံတစ်ဝန်းမှာ မင်းအောင်လှိုင်ရဲ့ဖက်ဆစ်တပ်ကို ခုခံတော်လှန်နေတဲ့တိုက်ပွဲတိုင်းက ပြည်သူတစ်ယောက်ချင်းစီရဲ့အနာဂတ်နဲ့သက်ဆိုင်ပါတယ်။ မြန်မာ့သမိုင်းအတွက်လည်းအလွန်အရေးကြီးပါတယ်။ဒါကြောင့် ပြည်သူတိုင်းက ပြည်သူ့တော်လှန်ရေးအဖွဲ့တွေကို နည်းလမ်းပေါင်းစုံနဲ့ကူညီရပါမယ်။ ဖက်ဆစ်တပ်ရဲ့ကျည်ဆံတွေ ၊သေနတ်တွေကို ရိုက်ချိုးနိုင်ဖို့ပြည်သူတွေက မီတာခ၊ကညနအခွန် ၊ကုန်သွယ်ခွန်၊ ကုမ္ပဏီအခွန်စတဲ့အခွန်အမျိုးမျိုးကိုမဆောင်ဘဲနေကြရပါမယ်။
စစ်ကောင်စီရဲ့ ခြိမ်းခြောက်ဖိနှိပ်မှုတွေကြားကနေ ဒီနေ့အထိ့ မီတာခအပါအဝင် အခွန်အရပ်ရပ်မဆောင်တဲ့ပြည်သူတွေရဲ့သတ္တိကိုလည်း အထူးချီးကျူးလိုပါတယ်။အခွန်မဆောင်တာကြောင့် စစ်ကောင်စီကအထိ့နာနေပြီးအခုဆို ရန်ကုန်မြို့မှာတောင်မီတာမဆောင်တဲ့သူတွေကို မီးဖြတ်ဖို့စစ်ကောင်စီကကြိုးစားလာပါတယ်။ဒါကြောင့် ပြည်သူတွေရဲ့အခွန်မဆောင်လှုပ်ရှားမှုအောင်မြင်စေဖို့ မြို့ပပြပျောက်ကြားတပ်ဖွဲ့တွေက ဝိုင်းဝန်းကူညီပေးစေလိုပါတယ်။ ဒါအပြင် ချင်း၊စစ်ကိုင်း ၊ကယား တို့လိုဒေသတစ်ခုတည်းကို အကြမ်းဖက်စစ်တပ်က ညှိုးပြီးစစ်ဆင်နေတာကို ရပ်တန့်နိုင်ဖို့ ဒေသအသီးသီးကတော်လှန်ရေးအဖွဲ့တွေက ၊ပြည်သူတွေက အကြမ်းဖက်တပ်ကို ပုံစံမျိုးစုံနဲ့ ခုခံစစ်ဆင်နွှဲပေးကြဖို့လည်းတိုက်တွန်းလိုပါတယ်။ ဒီလိုဒေသစုံကခုခံစစ်တွေအရှိန်မြှင့်တာနဲ့ ဖက်ဆစ်တပ်အထိ့နာမှာဖြစ်သလို ဒီအချိန်ကခုခံစစ်နောက်တစ်ဆင့်မြှင့်ဖို့အကောင်းဆုံးအချိန်ဖြစ်ပါတယ်။ အမျိုးသားညီညွတ်ရေးအစိုးရ(NUG)နဲ့တော်လှန်ရေးတပ်ဖွဲ့တွေ ဗျူဟာကောင်းကောင်းနဲ့ ဟန်ချက်ညီညီ လှုပ်ရှားဖို့လိုနေပါပြီ ။
ဒေသအသီးသီးမှာ အကြမ်းဖက်စစ်တပ်ကို ခုခံတိုက်ခိုက်နေတဲ့ ပြည်သူ့တပ်ဖွဲ့ဝင်တွေအနေနဲ့ သင်တို့ရဲ့ ပြောင်မြောက်လှတဲ့ရဲစွမ်းသတ္တိ၊ စွန်လွတ်အနစ်နာခံမှုတွေအတွက် ပြည်သူတွေကအလွန်တရားကျေးဇူးတင်လှပါတယ်။ ပြည်သူ့တပ်ဖွဲ့ဝင်တွေအားလုံးရဲ့နောက်မှာ အမှန်တရားဘက်တော်သားပြည်သူတွေက မားမားမတ်မတ်ရပ်တည်အားပေးနေပါကြောင်းသတင်းစကားပါအပ်ပါတယ်။ပြည်သူတွေကလည်း ပြည်သူ့တပ်ဖွဲ့ဝင်တွေအောင်ပွဲဆင်နိုင်ဖို့ ဝိုင်းဝန်းကူညီ ပံ့ပိုးပေးကြဖို့နှိုးဆော်လိုက်ရပါတယ်။