မင်းအောင်လှိုင်ကြိုးဆွဲရာကနေသူ

-အကိုကြီးညီ

ရန်ကုန်တိုင်းအတွင်းရှိတပ်ရင်းတခုတွင် တပ်ရင်းမှုးတာဝန်ထမ်းဆောင်စဉ်ယောက္ခမဖြစ်သူ ဦးဝင်းစိန်နှင့် ဆေးညွှန်ချုပ်ဗိုလ်ချုပ်သန်းအောင် တို့၏ထောက်ခံမှုဖြင့် ဗိုလ်ချုပ်မှုးကြီးသန်းရွှေမျက်စိကျခြင်း ခံရပြီးစစ်ဆေးတက္ကသိုလ်နည်းပြ အရာရှိချုပ်၊ထိုမှတဆင့်ဗိုလ်မှုးချုပ်၊ကျောင်းအုပ်ကြီး(စစ်ဆေးတက္ကသိုလ်)၊အရှေ့ပိုင်းတိုင်း တိုင်းမှုး၊စစ်ဥပဒေချုပ်၊ကစထမှုး အဆင့်ဆင့်ရာထူးတက်လာသူဖြစ်သည်။

ငြိမ်းချမ်းရေးအဖွဲ့ တပ်ကိုယ်စားလှယ်အဖြစ် အမျိုးသားဒီမီုက​ရေစီအဖွဲ့ ချုပ်- NLDအစိုးရလက်ထက်တွင်တာဝန်ပေးအပ်ခြင်းခံရသူဖြစ်ပြီး ဒေါ်အောင်ဆန်းစုကြည်၊တိုင်းရင်းသားခေါင်းဆောင်များနှင့်ဆက်ဆံရေးပြေလည်သူဖြစ်သည်သတ်မှတ်ခံရသူဖြစ်သည်။လွှတ်တော်တွင်ဒေါ်အောင်ဆန်းစုကြည်ကို အလေးပြုခြင်းကြောင့်မင်း​အောင်လှိုင်၏ဆူပူကြိမ်းမောင်းခြင်းကို ခံခဲ့ရသူဖြစ်သည်။

မင်း​အောင်လှိုင်အာဏာသိမ်းပြီးနောက် ဗိုလ်ချုပ်ရာပြည့်ကိုဖြုတ်ချရန် စီစဉ်ခဲ့သော်လည်း ဖဒိုမန်းငြိမ်းမောင်၊ဦးသိန်းညွန့်၊ဦးခက်ထိန်နန်၊ ယဦးကိုကိုလှိုင်တို့အကြံပေးမှုဖြင့် အာဏာသိမ်း​ခေါင်း​ဆောင်ကဖြုတ်မချတော့ဘဲ ငြိမ်းချမ်းရေးအဖွဲ့ ဥက္ကဌ၊ပြည်ထောင်စုအစိုးရရုံးဝန်ကြီးအဖြစ်
တပ်မဲ့တာဝန်ပေးအပ်ခဲ့သည်။

Public Service Announcement

‘ဝ’ဒေသသို့ အာဏာသိမ်းပြီးမကြာမီခင်တွင် မင်း​အောင်လှိုင် စေခိုင်းမှုကြောင့် သွားရောက်ပြီး ‘ဝ’အဖွဲ့များကို သေနတ်မပေါက်အောင်ရာပြည့်စွမ်းဆောင်ခဲ့သည်။ ဗိုလ်ချုပ်စိန်ဝင်း၊ဗိုလ်ချုပ်ရဲအောင်တို့အား အာဏာသိမ်း​ခေါင်း​ဆောင်ကရာထူးမှချောင်ထိုးကာစစ်မှုထမ်းဟောင်းအဖွဲ့သို့ပို့လိုက်သော်လည်း ရာပြည့်ကိုမူကား ငြိမ်းချမ်းရေးအဖွဲ့ခေါင်းဆောင်အဖြစ်ထားရှိကာ မင်း​အောင်လှိုင် အလိုကျ ငြိမ်းချမ်းရေးခေါင်းဆောင်အဖြစ်ဆောင်ရွက်လျက်ရှိသည်။

ထိုအပြင် မင်း​အောင်လှိုင် ဇနီးကြူကြူလှက ဗိုလ်ချုပ်ရာပြည့်နှင့်ဇနီး ဒေါ်သင်ဇာဝင်းစိန်ကိုအိမ်သို့ခေါ်ယူပြီး အပေးအယူညှိနှိုင်းမှုလုပ်ကာ နေအိမ်ဘုရားခန်းတွင် သစ္စာရေသောက်ခိုင်းခဲ့ကြောင်းအတွင်းသတင်းပေးမှကြားသိရသည်။ထို့နောက် မင်း​​အောင်လှိုင်၏လုံခြုံရေးဆိုင်ရာအကြံပေးပုဂ္ဂိုလ်အဖြစ် ခန့်အပ်ကာနိုင်ငံတော်ဘတ်ဂျက်မှ လုံခြုံရေးအတွက်အစစ်အဆေးမရှိ
သုံးစွဲခွင့်ပြုထားကြောင်း ကြားသိရသည်။ထိုအပြင်ယခုအခါ ရာပြည့်ကို အာဏာသိမ်း​​ကောင်စီ( စကစ )ဝင်အဖြစ်ပါ ထပ်မံတာဝန်​ပေးအပ်လိုက်​ကြောင်း စစ်​ကောင်စီဝါဒဖြန့်မီဒီယာများက ​ဖေ​ဖော်ဝါရီ ၈ ရက်တွင်​ဖော်ပြ​နေကြသည်ကို​တွေ့ရသည်။

လေးကေ့ကော် စစ်မျက်နှာပွင့်ပြီးနောက် မင်း​အောင်လှိုင်က မြောက်ပိုင်းအဖွဲ့များနှင့်ရာပြည့်တွေ့ဆုံရန်အလျင်အမြန်ဆောင်ရွက်ခိုင်းပြီး သေနတ်မပေါက်အောင်ဆောင်ရွက်စေခဲ့သော်လည်း မအောင်မြင်ခဲ့ချေ။

ထပ်မံကြားသိရသော သတင်းအရ အာဏာသိမ်း​ခေါင်း​ဆောင်သည် SSPPနှင့် RCSS ကိုနယ်မြေလုတိုက်ပွဲများ အချင်းချင်းဆက်လက်တိုက်ခိုက်စေရန် သွေးထိုးလုပ်ဆောင်နေသကဲ့သို့ ရာပြည့်အစီအစဉ်ဖြင့်လျှို့ဝှက်ပို့ထားသော သူလျှိုများမှတဆင့် “ဝ”အဖွဲ့တွင်းပေါက်အဖွဲ့
(​ပေါက်ယူချန်းအဖွဲ့)နှင့် ကျောက်အဖွဲ့ (​ကျောက်​ကော်အန်းအဖွဲ့ ) ကိုသွေးခွဲရန်စီစဉ်နေကြကြောင်းလည်းကြားသိရသည်။

ထို့အပြင် မွန်ခေါင်းဆောင်များကိုလည်း ရာပြည့်မှတဆင့်အပေးအယူလုပ်ခိုင်းထားပြီးအခြား ရာပြည့်နှင့်ပုဂ္ဂိုလ်ရေးရင်းနှီးသောတိုင်းရင်းသားခေါင်းဆောင်ကြီးများကိုလည်း တယ်လီဖုန်းမှတဆင့်မကြာခဏ ဆက်သွယ်စေကာ သွေးဆောင်စည်းရုံးခိုင်းထားကြောင်း အတွင်းသတင်းများအရသိရှိရသည်။

လာမည့်ဖေဖဝါရီ (၁၂)ရက်နေ့ပြည်ထောင်စုနေ့တွင် EAOs (တိုင်းရင်းသားလက်နက်ကိုင်အဖွဲ့) များအားငြိမ်းချမ်းရေးအကြောင်းပြဖိတ်ခေါ်၍ ဗိုလ်ရှုသဘင်ကျင်းပရန်စီစဉ်နေသော အကြမ်းဖက်ခေါင်းဆောင် မင်းအောင်လှိုင်သည် တိုင်းရင်းသားEAOs များကိုတက်ရောက်ရန် ရာပြည့်မှတ
ဆင့် ဆက်သွယ်စည်းရုံးစေရန် ဖိအားပေးနေကြောင်း အတွင်းသတင်းများအရ သိရှိရသည်။

ဦးပိုင်ရှယ်ယာအမြောက်အများနှင့်ကျောက်တွင်းလုပ်ကွက်များရရှိပြီးနောက်ဗိုလ်ချုပ်အသိုင်းအဝိုင်းတွင် ”ကိုရာပြည့်ဂွင်မိသွားပြီ”ဟု အတင်းစကားဆိုနေကြကြောင်း ကြားသိရသည်။စကားပြောညက်သော ဗိုလ်ချုပ်ရာပြည့်သည် သူ့အကျိုးစီးပွါးအတွက် တိုင်းရင်းသားခေါင်းဆောင်များကို ညင်သာသောအပြောများ၊မရေရာသောကတိများဖြင့် စည်းရုံးသိမ်းသွင်းနိုင်မည်ဟုယုံကြည်နေသူဖြစ်ကြောင်း တပ်တွင်းသတင်းများအရကြားသိရသည်။

မူဝါဒခိုင်ခိုင်မာမာမရှိဘဲ မင်းအောင်လှိုင်အလိုကျလိုက်ပါလုပ်ဆောင်နေသော ဗိုလ်ချုပ်ရာပြည့်ကိုတိုင်းရင်းသား လက်နက်ကိုင်အဖွဲ့ ခေါင်းဆောင်များအနေဖြင့်အထူးသတိထားဆက်ဆံရန်လိုအပ်ပေသည်။ အတိတ်သမိုင်းတွင် မြေခွေးဗိုလ်ချုပ်ခင်ညွန့်ကြောင့် အကွဲကွဲအပြားပြားဖြစ်ခဲ့သော မိမိတို့အဖွဲ့အစည်းများ၏ သမိုင်းသင်ခန်းစာကိုပြန်လည်ဆင်ခြင်ရန်လိုအပ်ပြီး ယခုအခါ ဗိုလ်ချုပ်ရာပြည့်မှတဆင့်မင်းအောင်လှိုင်စည်းရုံးနေမှုများကို သတိထားငြင်းပယ်ရန်လိုအပ်လှပေသည်။

မည်သို့ပင်ဆိုစေကာမူ ကတိသစ္စာမတည်သော၊အမြဲလှည့်ဖျားသွေးခွဲတတ်သော စစ်အာဏာရှင်တို့၏အကျင့်စရိုက်များကို သိရှိနားလည်ပြီးဖြစ်သည့် တိုင်းရင်းသားပြည်သူတော်လှန်ရေးအင်အားစုတရပ်လုံးသည် “ဒီတစ်ကြိမ် စစ်အာဏာရှင်စနစ်အမြစ်ပြတ်စေရမည်”ဟူသောခိုင်မာသောစိတ်ဖြင့် အားလုံးစုပေါင်းဆောင်ရွက်ပြီး အကြမ်းဖက်စစ်​ကောင်စီကို အပြီးတိုင်တော်လှန်ဖယ်ရှားကြမည်ကိုပြည်သူများနှင့်အတူ စာ​ရေးသူလည်းယုံကြည်မျှော်လင့်ပါသည်။

အရေးတော်ပုံမုချအောင်ရမည်။