ဇူလိုင်-၂၉၊၂၀၂၆။ဇော်၀င်း/People’s Spring
ကရင်နီပြည်နယ်၊ဒီးမော့ဆိုမြို့အနီးအာဏာသိမ်းစစ်တပ်စစ်ကြောင်းတိုးလာလို့ တိုက်ပွဲပြင်းထန်နေတယ်လို့ ဒေသခံစစ်ရေးသတင်းရင်းမြစ်တွေကလူထုနွေဦးကို ပြောပါတယ်။
ဒီးမော့ဆိုမြို့အနီးဒေါငံခါးရွာကို စစ်တပ်က နယ်မြေထိန်းချုပ်နိုင်ဖို့ကြိုးစားနေတာကြောင့်ကရင်နီ ပူးပေါင်းတပ်တွေနဲ့ နေ့စဉ် တိုက်ပွဲ ဖြစ်နေတာလို့သိရပါတယ်။
“နန်းဖယ်ခုံနဲ့ ဒေါငံခါးလမ်းပိုင်းကို လိုချင်နေတာပေါ့။အင်အားတော်တော်များပါတယ်”လို့ စစ်တပ်စစ်ကြောင်းတိုးလာတာနဲ့ ပတ်သက်ပြီး မြေပြင်သတင်းရင်းမြစ်က ရှင်းပြပါတယ်။
Public Service Announcement
စစ်တပ်ကလေကြောင်း၊လက်နက်ကြီးတွေနဲ့ ပစ်ကူပေးပြီးတိုက်ခိုက်နေတာကြောင့်ဒေါငံခါးရွာ အနီးက ကာကင်းတချို့ကို လက်လွှတ်ထားရတယ်လို့ အသိပေးပါတယ်။
“စစ်တပ်စစ်ကြောင်းဒေါငံခါးကို မကျော်သေးဘူး။အကုန်လုံးကြိုးစားပြီးကာနေကြတယ်”လို့ ကရင်နီစစ် ရေးသတင်းရင်းမြစ်က ပြောပါတယ်။
ဒေါငံခါးရွာဟာ လွိုင်ကော်-ဒီးမော့ဆို လမ်းဆုံ နဲ့ မိုးဗြဲ-နန်းမယ်ခုံ-ဒီးမော့ဆို လမ်းပိုင်းပေါ်မှာ ရှိပြီးစစ်တပ်ရဲ့အခြေစိုက်တပ်တွေကိုချိတ် ဆက်ဖို့ အရေးပါတဲ့ နေရာတစ်ခုဖြစ်ပါတယ်။
စစ်တပ်က ဒေါငံခါးရွာ မှာရှိတဲ့ နှစ်သက်တမ်း ၆၀ ကျော်ရှိတဲ့ ဒေါငံခါးဘုရား ကျောင်းဝင်းထဲကသီလရှင်ကျောင်းဆောင်တွေကိုလည်း၂၀၂၆ မေလကမီးရှို့ဖျက်ဆီးထားပါတယ်။
စစ်တပ်စစ်ကြောင်းမှာဒီးမော့ဆိုအခြေစိုက် ခလရ ၁၀၂ ၊ ခမရ ၄၂၇ နဲ့ စစ်တပ်လက်အောက်ခံပအိုဝ်းပြည်သူ့စစ် PNOတွေပါ၀င်တယ်လို့ တော်လှန်ရေးတပ်ဖွဲ့ဝင်တချို့က ပြောထားပါတယ်။
ပြီးခဲ့တဲ့နှစ်ဩဂုတ်လပိုင်းမှာစစ်တပ်က အင်အားအလုံးအရင်းနဲ့ စစ်ကြောင်းထိုးလာပြီးနောက် ဒီးမော့ဆိုမြို့ပေါ်က နေရာအများစုကို ပြန်လည်ထိန်းချုပ်ခဲ့ပါတယ်။အဲဒီနောက်ပိုင်းမြိုအနီးပတ်ဝန်းကျင်နေရာတွေကိုအထိုင်ချတပ်စွဲပြီးစစ်ကြောင်းထိုးတာ၊လက်နက်ကြီးနဲ့ပစ်ခတ်မှုတွေမကြာခဏရှိပါတယ်။
