■စစ်ရုံးချုပ်ရဲ့ကွပ်ကဲမှုအောက်မှာ ”အထူးလှုပ်ရှားတပ်မ”အဖြစ်တာဝန်ထမ်းဆောင်နေကြောင်းအသိပေး
ဖေဖော်ဝါရီ-၂၅၊ ၂၀၂၆။ ထားမြတ်/People’s Spring
နွေဦးတော်လှန်ရေးကာလအတွင်း ပြည်သူလူထုထဲမှမွေးဖွားပေါ်ပေါက်လာခဲ့တဲ့ ပြည်သူ့ကာကွယ်ရေးတပ်မတော်(မန္တလေး)-MDY PDF ဟာ တော်လှန်ရေးရဲ့ အနိမ့်အမြင့် အတက်အကျ လောကဓံတရားကို ကြံ့ကြံ့ခံ ဖြတ်သန်းရင်း ဒီကနေ့ ဖေဖော်ဝါရီ ၂၅ရက်မှာ တပ်ဖွဲ့စည်းမှု ၅နှစ်ပြည့်ပြီဖြစ်ကြောင်း မန္တလေး PDFက အသိပေးပြီး စစ်အာဏာရှင် စနစ် အမြစ်ပြတ်တဲ့အထိ ဦးလည်မသုန် တိုက်ပွဲဝင်သွားမယ်လို့ ကတိသစ္စာပြုကြောင်း ဖော်ပြထားပါတယ်။
မန္တလေး PDFဟာ လက်နက်ကိုင်တော်လှန်ရေး စတင်လုပ်ဆောင်ဖို့ ဆုံးဖြတ်ချက်ချခဲ့သည့် ၂၀၂၁ ဖေဖော်ဝါရီ ၂၅ရက်ကို အစွဲပြုပြီး တပ်မွေးနေ့အဖြစ် သတ်မှတ်ကျင်းပနေခြင်းဖြစ်ပါတယ်။
Public Service Announcement
လက်ရှိမှာ မန္တလေး PDFဟာ အမျိုးသားညီညွတ်ရေးအစိုးရ ၊ ကာကွယ်ရေးဝန်ကြီးဌာန ၊ စစ်ရုံးချုပ်ရဲ့ကွပ်ကဲမှုအောက်မှာ ”အထူးလှုပ်ရှားတပ်မ”အဖြစ် တော်လှန်ရေးတာဝန်တွေ ထမ်းဆောင်လျက်ရှိတယ်လို့လည်း အသိပေးထားပါတယ်။
တပ်မကွပ်ကဲရေးမှူး ရဲဘော်ကိုနေ “ငါးနှစ်ပြည့်တပ်မွေးနေ့မှာ တပ်ထဲက ရဲဘော်တွေသာ မကဘဲ မြန်မာတနိုင်ငံလုံးမှာရှိတဲ့ အခြားသော တော်လှန်ရေးရဲဘော်ရဲဘက် ညီအကိုတွေကိုလည်း ကျနော့်အနေနဲ့ မှာကြားလိုတာရှိပါတယ်။ အဲဒါကတော့ ကျနော်တို့ရဲ့ ခြေလှမ်းတိုင်း ကျနော်တို့ရဲ့ လုပ်ငန်းစဉ်တိုင်းဟာ ပြည်သူလူထုရဲ့ မျှော်မှန်းချက် မျှော်လင့်ချက်တွေဖြစ်ပါတယ်။ ဒါကြောင့် လက်ရှိ တော်လှန်ရေးကာလအတွင်းမှာ ဘယ်လောက်ပဲ ပင်ပန်းပင်ပန်း ဘယ်လောက်ပဲ ခက်ခဲခက်ခဲ တော်လှန်ရေးကနေ မရပ်နားဖို့နဲ့ တော်လှန်ရေးကို သစ္စာမဖောက်ဖို့ တော်လှန်ရေးကို ဆက်ပြီး ယုံယုံကြည်ကြည် ဆက်လှမ်းသွားဖို့အတွက် ကျနော့်အနေနဲ့ တိုက်တွန်းပြောကြားလိုပါတယ်။
လက်ရှိ တော်လှန်ရေး (၅)နှစ်တာအတွင်း အပြည့်အ၀ပူးပေါင်းလာပေးတဲ့ ပြည်သူလူထုကို ကျေးဇူးတင်ကြောင်းလည်း မန္တလေး PDFအထူးလှုပ်ရှားတပ်မ ကွပ်ကဲရေးမှူးက ပြောပါတယ်။
တော်လှန်ရေးမှာ ကျဆုံးရဲဘော်တွေကို ဦးညွှတ်ဂုဏ်ပြုကြောင်း ကိုယ်လက်အင်္ဂါစွန့်လွှတ်ရသူတွေအပါအဝင် ထိခိုက်ဒဏ်ရာရ ရဲဘော်တွေကို ဂုဏ်ပြုကြောင်း တပ်မ ကွပ်ကဲရေးမှူးက ပြောကြားပြီး တော်လှန်ရေးခရီးကို အာလုံးစည်းလုံးညီညွတ်စွာ လက်တွဲဖော်ဆောင်ဖို့လည်း တိုက်တွန်းခဲ့ပါတယ်။
တပ်မွေးနေ့ ရုပ်သံမှတ်တမ်းမှာ လူထုတွေက စစ်အာဏာရှင်စနစ်ကို ငြိမ်းချမ်းစွာ ဆန္ဒထုတ်ဖော်ခဲ့ကြတဲ့ မြင်ကွင်းနဲ့ နောက်ပိုင်းမှာ စစ်တပ်ကို လက်နက်စွဲကိုင်တိုက်ခိုက်ဖို့ မန္တလေး မြို့ပေါ် လူငယ်အချို့ဟာ ရှမ်းမြောက်က တအာင်းအမျိုးသားလွတ်မြောက်ရေးတပ်မတော် (TNLA)ထံ စစ်ပညာ သင်ယူခဲ့တဲ့ အခြေအနေကို အသိပေးထားပါတယ်။
” နှစ်ခြောက်ဆယ်ကျော်သက်တမ်းရှိတဲ့ အကြမ်းဖက်စစ်တပ်ကို ပြန်လည်တိုက်ခိုက်ဖို့ တကယ်က လွယ်ကူမနေခဲ့ပါဘူး။ ERO တွေနဲ့ ယုံကြည်မှုကို တည်ဆောက်ရင်း ပင်ပန်းခက်ခဲတဲ့ စစ်သင်တန်းတွေကို ကြိုးစားသင်ယူပြီးတဲ့အချိန်မှာတော့ MDY -PDF ပြည်သူ့ကာကွယ်ရေးတပ်မတော်(မန္တလေး)အဖြစ် စစ်အာဏာရှင်တွေကို ထိပ်တိုက်ရင်ဆိုင်ဖို့ အဆင်သင့်ဖြစ်နေခဲ့ပါပြီ” လို့ တပ်မွေးနေ့ ရုပ်သံမှာ ပြောကြားထားတာ တွေ့ရပါတယ်။
တပ်ဖွဲ့ ဖွဲ့စည်းပြီးနောက် မဟာမိတ် EROတွေ၊ မိတ်ဖက်တော်လှန်ရေးအဖွဲ့တွေနဲ့ လက်တွဲပူးပေါင်းကာ ဝါဆို စစ်ဆင်ရေး၊ သပြေညိုစစ်ဆင်ရေး၊ ၁၀၂၇ အပိုင်း(၁) စစ်ဆင်ရေးတွေမှာ ပူးပေါင်းတိုက်ပွဲဝင်ခဲ့ကြောင်း အသိပေးပါတယ်။ ၁၀၂၇ စစ်ဆင်ရေး အပိုင်း(၂)မှာတော့ ညီနောင်မဟာမိတ်တပ်တွေနဲ့ ပူးပေါင်းပြီး စဉ့်ကူး၊ မတ္တရာ၊ သပိတ်ကျင်း နယ်တွေကို ဟန်ချက်ညီစွာ ထိန်းချုပ်စိုးမိုးနိုင်ခဲ့တယ်လို့ MDY PDFက အသိပေးပါတယ်။
ဒီလို အောင်ပွဲတွေရရှိခဲ့တာဟာ တပ်ဖွဲ့ဝင်ရဲဘော်တွေ ရဲ့ အသက်ပေါင်းများစွာ ရင်းနှီးခဲ့ရကြောင်း ဖော်ပြပါတယ်။စစ်ကောင်စီနဲ့ ပြင်းထန်တဲ့ တိုက်ပွဲတွေ ရင်ဆိုင်ခဲ့ရပြီး ကိုယ်လက်အင်္ဂါ ပေးဆပ်ခဲ့ရတဲ့ ရဲဘော်တွေလည်း ရှိခဲ့တယ်လို့ အသိပေးပါတယ်။
အထူးလှုပ်ရှားတပ်မ စစ်ရေးအရာရှိ ရဲဘော်ဂစ်ဘွန်းကလည်း ” ကျမတို့ရဲ့ ၅နှစ်တာ တပ်မဟာဆိုရင် ပြည်သူလူထုရဲ့ လက်ခုပ်သံတွေကြားမှာလည်း ပျော်မွှေ့ခဲ့ရဖူးပါတယ်။ ပြည်သူလူထုရဲ့ ဝေဖန်တိုက်ခိုက်သံ အမျိုးမျိုးကိုလည်း သင်ယူပြီးမြောက်ခဲ့ရတဲ့ တပ်မတခုပေါ့။
ဒီလို ဖြတ်သန်းခဲ့လာရတဲ့ ကာလအတွင်းမှာ မေ့ထားမရတာက ရှေ့တန်းက ရဲဘော်တွေဖြစ်ပြီး လက်ရှိအထိ တော်လှန်ရေးနဲ့အတူ ရှိနေတဲ့ ပြည်သူလူထုက အားအင်တရပ်ဖြစ်တယ်လို့ စစ်ရေးအရာရှိက ပြောပါတယ်။
“ပြည်သူလူထု ရှိနေသေးသရွေ့ ကျမတို့ တော်လှန်ရေးဆက်ရှိနေပါမယ်” လို့ ရဲဘော် ဂစ်ဘွန်းက ပြောပါတယ်။
