ဩဂုတ် ၁၃၊ ၂၀၂၆။ ထားမြတ်/People’s Spring
လူမျိုးများ၊ ပြည်သူလူထုများအားလုံး စည်းလုံးညီညွတ်ကြရမှာ ဖြစ်ပြီး စစ်အာဏာရှင်စနစ်မှ လွတ်မြောက်ကာ လွတ်လပ်ရေးနဲ့ ဖက်ဒရယ်ဒီမိုကရေစီစနစ် ဖြစ်ပေါ်လာတဲ့အထိ တော်လှန်ရေးကို ဆက်လက်ဆင်နွှဲသွားကြရမယ်လို့ ကရင်အမျိုးသားအစည်းအရုံး(KNU) မြိတ်ထားဝယ်ခရိုင် အတွင်းရေးမှူး ပဒိုစောအယ်နားက ပြောပါတယ်။
KNU မြိတ်ထားဝယ်ခရိုင်မှာ ဩဂုတ် ၁၂ရက်က ကရင့်အာဇာနည်နေ့အခမ်းအနား ကျင်းပခဲ့တာနဲ့ပတ်သက်ပြီး ပဒိုစောအယ်နားကို ဆက်သွယ်မေးမြန်းရာ အသက်ပေးလှူခဲ့ကြတဲ့ အာဇာနည်တွေကို ဂုဏ်ပြုကြောင်း ပြောကြားကာ အထက်ပါအတိုင်း အသိပေးခဲ့တာပါ။
လွတ်လပ်ရေး ကရင်လူမျိုးအခွင့်အရေး နဲ့ စစ်အာဏာရှင်စနစ်မှ လွတ်မြောက်ရေးတို့အတွက် အသက်ပေးခဲ့သော ကရင်ရဲဘော်များ၊ ကရင်ခေါင်းဆောင်များနဲ့ ကရင် ပြည်သူ့ များ အာဇာနည်များကို ဂုဏ်ပြုအလေးပြုအပ်ကြောင်းနဲ့ အာဇာနည်များအတွက် လွတ်လပ်ရေးဟာ သူတို့ရဲ့ အသက်ထက်ပင် ပိုတန်ဖိုးထားကြကြောင်းပဒိုစောအယ်နားက ပြောပါတယ်။
Public Service Announcement
” လွတ်လပ်ရေးအတွက် ၎င်းတို့၏ အသက်ပေးလှူခဲ့ကြခြင်း ကို ကျွန်ုပ်တို့ မမေ့နိုင်ပါ” လို့ ပဒိုစောအယ်နားက ပြောပါတယ်။
ဒါ့အပြင် ကရင်တော်လှန်ရေးနဲ့အတူ ပူးပေါင်းတိုက်ပွဲ ဝင်ရင်း အသက်ပေးလှူခဲ့ကြတဲ့ မဟာမိတ်တပ်ဖွဲ့ဝင်များနဲ့ အရပ်သားပြည်သူများအား လေးစားဂုဏ်ပြုကြောင်းလည်း ပဒိုစောအယ်နားက ပြောပါတယ်။
KNU မြိတ်ထားဝယ်ခရိုင်မှာ မနေ့က ကျင်းပတဲ့ ကရင်အာဇာနည်နေ့အခမ်းအနားကို KNU အုပ်ချုပ်ရေးနဲ့ စစ်ရေးဆိုင်ရာ တာဝန်ရှိသူတွေတက်ရောက်ခဲ့ကြပြီး ဒဏ်ရာရ ရဲဘော်တွေကို ဆုငွေပေးအပ်တာတွေ ပြုလုပ်ခဲ့ပါတယ်။
