ဇူလိုင်-၁၂၊၂၀၂၆။ထားမြတ်/People’s Spring
မကွေးတိုင်း၊ချောက်မြို့နယ်၊တိုက်ပွဲမှာ ကျဆုံးခဲ့တဲ့ မကွေးခရိုင် မှ ကျဆုံးရဲဘော် အာဇာနည်များအား ဦးညွှတ်ကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက ဒီကနေ့ မနက်မှာ ထုတ်ပြန်ပါတယ်။
ဇူလိုင် ၁၀ရက်က ချောက်မြို့နယ် တောင်သာရွာအနီး တိုက်ပွဲမှာ PDF ရဲဘော် ၂၀ဦး ကျဆုံးခဲ့တာနဲ့ ပတ်သက်ပြီး ကြယ်ဖြူ ၂၀ လုံးပါ ပုံကိုဖော်ပြပြီး “၂၀၂၆ ခုနစ်၊ ဇူလိုင်လ (၁၀) ရက်၊မကွေးခရိုင်မှ ကျဆုံးရဲဘော် အာဇာနည်များအား ဦးညွှတ်ပါ၏”လို့ ဇူလိုင် ၁၂ရက်မှာထုတ်ပြန်ခဲ့တာပါ။
ချောက်မြို့နယ် တိုက်ပွဲကို သက်ဆိုင်ရာ တပ်ရင်းတပ်ဖွဲ့နဲ့ ကာကွယ်ရေးဝန်ကြီးဌာနက အသေးစိတ် ထုတ်ပြန်တာမျိုး မရှိသေးပါဘူး။
Public Service Announcement
ဒေသ သတင်းရင်းမြစ်အချို့ပြောကြားချက်အရ ချောက်မြို့နယ်အတွင်း စစ်ကြောင်းထိုးလာတဲ့ စစ်တပ်စစ်ကြောင်းကိုခုခံတိုက်ခိုက်ဖို့ ကြိုးပမ်းရင်းရဲဘော်တွေကျဆုံးတာ၊ ဖမ်းဆီးခံရပြီး သတ်ဖြတ်ခံခဲ့ရတာဖြစ်ပါတယ်။
ချောက်မြို့နယ် တိုက်ပွဲမှာPDF ရဲဘော်တွေ ကျဆုံးခဲ့ရမှုကို အခြားဒေသရှိ ကာကွယ်ရေးတပ်ဖွဲ့အချို့ကလည်း ဝမ်းနည်းကြောင်းအထိမ်းအမှတ် သေနတ်ပစ်ဖောက် အလေးပြုတာ၊ PDF အလံကို တဝက်လွှင့်ထုတာတွေ ပြုလုပ်ခဲ့ပါတယ်။
“ မကွေးတိုင်း ချောက်မြို့နယ် တောင်သာကျေးရွာအနီးမှာ အကြမ်းဖက်စစ်ကောင်စီနဲ့ ဖြစ်ပွားခဲ့တဲ့ တိုက်ပွဲမှာ ကျနော်တို့ ပြည်သူ့ကာကွယ်ရေး တပ်ဖွဲ့ဝင် ရဲဘော်အများအပြား ထိခိုက်ကျဆုံးခဲ့ရပါတယ်ခင်ဗျာ။ အဲဒီဖြစ်စဉ် အတွက် ကျနော်တို့ စဉ့်ကိုင်မြို့နယ် ပြည်သူ့ကာကွယ်ရေး အဖွဲ့အနေဖြင့် များစွာ ဝမ်းနည်းစိတ်မကောင်းဖြစ်ခဲ့ရပါတယ်”လို့စဉ့်ကိုင်း
ပကဖ တာဝန်ရှိသူက ချောက်မြို့နယ်မှာ ကျဆုံးရဲဘော်တွေကိုသေနတ်ပစ်ဖောက်အလေးပြုခဲ့တဲ့ အခမ်းအနားမှာ ပြောကြားခဲ့ပါတယ်။
စစ်အာဏာရှင်အမြစ်ပြတ်ကျဆုံးတဲ့အချိန်ထိ တိုက်ပွဲဝင်သွားမယ်လို့လည်း စဉ့်ကိုင်ပကဖ တာဝန်ရှိသူက ချောက်တိုက်ပွဲမှာကျဆုံးခဲ့တဲ့ ရဲဘော်တွေကို တိုင်တည် ကတိသစ္စာပြု ပြောကြားခဲ့ပါတယ်။
PDF ဗျူဟာ ၃၃ ဗျူဟာမှူး ရဲဘော်စောဒါးကိုကလည်း “နောက်ဆုံး ကျန်တဲ့ ကျည်ဆံတတောင့်အထိ ငါတို့ခုခံတော်လှန်ကြမယ်…ဒီစစ်ပွဲဟာ ငါတို့မျိုးဆက်နောက်ဆုံးဖြစ်ပါစေ” လို့ ရေးသားကာ ချောက်တိုက်ပွဲကျဆုံးရဲဘော်တွေ ကို အလေးပြုကြောင်း ဖော်ပြထားပါတယ်။
