သုည/People’s Spring
ကရင်ပြည်နယ်နဲ့ စစ်ကိုင်းတိုင်းမှ သပိတ်အဖွဲ့တွေ၊ ဒေသခံပြည်သူတွေက စစ်အာဏာရှင်စနစ်ကို ဆန့်ကျင်ကြတဲ့ လူထုသပိတ်လှုပ်ရှားမှုတွေ ဒီကနေ့ (ဖေဖော်ဝါရီ ၁၁)မှာ အသီးသီး ပြုလုပ်ခဲ့ကြပါတယ်။
ကရင်ပြည်နယ် ဒူးပလာယာခရိုင်မှာ ကေဝိုင်အို – ကရင်လူငယ်အစည်းအရုံး ဗဟို၊ ခရိုင်နဲ့ မြို့နယ်ရှိ ကရင်လူငယ်တွေ ဦးဆောင်ပြီး (၇၇)နှစ်မြောက် ကရင်အမျိုးသားနေ့ကို ကြိုဆိုဂုဏ်ပြုတဲ့အနေနဲ့ အာဏာရှင်စနစ် ဆန့်ကျင်ရေးသပိတ်တွေ ချီတက်ဆန္ဒပြခဲ့ပါတယ်။
Public Service Announcement
ယနေ့ခေတ် ကရင်လူငယ်တွေ ရင်ဆိုင်ကြုံတွေ့နေရသော ဒေသအတွင်း မူးယစ်ဆေးဝါး စိန်ခေါ်မှုတွေ၊ နိုင်ငံရေး မျှော်မှန်းချက် သဘောထားတွေနဲ့ အကြမ်းဖက်စစ်တပ်မှ အတင်းအဓ္ဓမ စစ်မှုထမ်းစေခိုင်းခြင်းဆိုင်ရာ သဘောထားတွေကို ငြိမ်းချမ်းစွာ ချီတက်ဆန္ဒထုတ်ဖော်ခဲ့ပါတယ်။
စစ်ကိုင်းတိုင်း ယင်းမာပင်မြောက်ခြမ်းမှာလည်း နောက်ပြန်မလှည့်ကြေး ဒီတော်လှန်ရေး သပိတ်စစ်ကြောင်းက “အထွေထွေဖိနှိပ်မှုကို အံတုကြ ဘုံရန်သူကို ထွက်ပေါက်မပေးနဲ့” စာသားကိုင်ဆောင်ပြီး ဒီကနေ့မှာ ချီတက်ဆန္ဒပြခဲ့ပါတယ်။
အလားတူ ယင်းမာပင်မြို့နယ် ကျေးရွာတစ်ရွာမှာလည်း အောင်လံလွှင့်မည် ရွှေရေကြည် သပိတ် စစ်ကြောင်းက ဒေသခံပြည်သူတွေနဲ့ပူးပေါင်းပြီး စစ်အာဏာရှင်ကို ဆန့်ကျင်ကြောင်း ကြွေးကြော်ဆန္ဒပြခဲ့ပါတယ်။
ဓာတ်ပုံ – စစ်ကိုင်းဒေသသပိတ်အင်အားစု၊ ရွာပေါင်းစုံသပိတ်၊ KYO
