တရုတ်ထုတ် ကိုဗစ်ကာကွယ်ဆေး နှစ်ကြိမ်ထိုးထားတဲ့ ထိုင်းကျန်းမာရေးဝန်ထမ်းတွေ ရောဂါကူးစက်ခံနေရ

တရုတ်နိုင်ငံထုတ် ကိုဗစ်ကာကွယ်ဆေး Sinovac နှစ်ကြိမ်ထိုးထားတဲ့ ထိုင်း ကျန်းမာရေးဝန်ထမ်း ၆၀၀ ကျော် ကိုဗစ်ရောဂါကူးစက်ခံရတယ်လို့ CNA သတင်းဌာနက ဖော်ပြလိုက်ပါတယ်။

ထိုင်းကျန်းမာရေးဝန်ထမ်း ၆ သိန်းကျော်ကို Sinovac ကာကွယ်ဆေးနှစ်ကြိမ်ထိုးပေးထားတာဖြစ်ပြီး အဲဒီထိုးထားသူတွေထဲက ၆၁၈ ဦး ရောဂါကူးစက်ခံရတာဖြစ်တယ်လို့ ထိုင်းကျန်းမာရေးဝန်ကြီးဌာနကို ကိုးကားပြီး CNA သတင်းက ဆိုပါတယ်။

ပြီးခဲ့တဲ့ ရက်ပိုင်းကပဲ အင်ဒိုးနီးရှားနိုင်ငံမှာ အဲဒီ Sinovac ကာကွယ်ဆေးကို စမ်းသပ်ပေးနေတဲ့ စီမံကိန်းခေါင်းဆောင် ကိုဗစ်ရောဂါနဲ့ သေဆုံးခဲ့သလို Sinovac ထိုးထားတဲ့ အင်ဒိုနီးရှား ကျန်းမာရေးဝန်ထမ်းတွေ သေဆုံးမှုကလည်း ၅၀ ကျော်အထိရှိနေတာဖြစ်ပါတယ်။

စင်ကာပူနိုင်ငံကျန်းမာရေးဝန်ကြီးဌာနကတော့ တရုတ်ရဲ့ Sinovac ထိုးထားသူတွေကို ကိုဗစ်ကာကွယ်ဆေးထိုးနှံထားသူတွေလို့ ထည့်သွင်းစဉ်းစားမှာမဟုတ်တဲ့အကြောင်း ထုတ်ပြန်ပြောကြားထားပါတယ်။

Public Service Announcement

မြန်မာနိုင်ငံမှာတော့ အာဏာသိမ်းစစ်ကောင်စီကနေ တရုတ်နဲ့ ရုရှားကာကွယ်ဆေးတွေရောက်ရှိလာဖို့ရှိပြီး ထိုးသင့်ထိုးထိုက်သူတွေကို ထိုးပေးမယ်လို့ ပြောထားတာလည်းရှိနေပါတယ်။