ဧပြီ−၉၊ ၂၀၂၆။ ထားမြတ်/People’s Spring
ကရင်အမျိုးသားအစည်းအရုံး(KNU) တပ်မဟာ(၇) ဖားအံခရိုင်အတွင်း ဖားအံခရိုင် အကျဉ်းထောင်က အကျဉ်းသူ၊ အကျဉ်းသား ၃၈ ဦး လွတ်ငြိမ်းချမ်းသာခွင့်ပေးခဲ့တယ်လို့ KNU ဗဟိုက ထုတ်ပြန်ပါတယ်။
ဧပြီ ၆ရက်မှာ လွတ်ငြိမ်းချမ်းသာခွင့်ပေးခဲ့တာဖြစ်ပြီး မိသားစုနဲ့ ပြန်လည်ပေါင်းစည်းနိုင်ဖို့ ရည်ရွယ်ကြောင်း ဖော်ပြထားပါတယ်။
ဒီလို လွှတ်ပေးရာမှာ အကျင့်စာရိတ္တကောင်းမွန်သူတွေ၊ အသက်အရွယ်ကြီးရင့်သူတွေနဲ့ ကျန်းမာရေးချို့တဲ့သူတွေကို ဦးစားပေး စိစစ်ရွေးချယ်လွှတ်ပေးခဲ့တာလို့ ဖော်ပြပါတယ်။
Public Service Announcement
လွတ်ငြိမ်းချမ်းသာခွင့်ရသူတွေအနေနဲ့ နောက်နောင်မှာ ပြစ်မှု ထပ်မံကျူးလွန်မှု မရှိစေရေး တာဝန်ရှိသူတွေက ဩဝါဒပေးတာ ပြုလုပ်ခဲ့သလိုခရီးစရိတ်နဲ့ စားစရိတ်ထောက်ပံ့တာ၊ ရပ်ရာတွေကို ဘေးကင်းစွာ ရောက်ရှိနိုင်ရေး စီစဉ်ပေးတာ လုပ်ဆောင်ခဲ့တယ်လို့ ထုတ်ပြန်ပါတယ်။
KNU အနေနဲ့ အရင်ကလည်း အကျဉ်းသားတွေကို အခုလိုလွတ်ငြိမ်းချမ်းသာခွင့်ပေးတာမျိုး ပြုလုပ်ခဲ့ဖူးပါတယ်။
၂၀၂၆ ဖေဖော်ဝါရီ ၂၃ရက်ကလည်း KNU တပ်မဟာ(၆) ဒူးပလာယာခရိုင် အကျဉ်းထောင်မှ အကျဉ်းသား အကျဉ်းသူ ၁၀၄ဦးကို KNU ဗဟို ဥက္ကဋ္ဌ အမိန့်နဲ့ လွတ်ငြိမ်းချမ်းသာခွင့်ပေးခဲ့ပါတယ်။
အဲဒီလို လွတ်ငြိမ်းချမ်းသာခွင့်ပေးရာမှာ မုဒိမ်းလူသတ်မှု၊ မုဒိမ်းမှုနဲ့ မူးယစ်ဆေးဝါးမှုမှာထောင်ဒဏ် ၇နှစ်အထက်ကျူးလွန်သူတွေပါဝင်ခြင်းမရှိပါဘူး။ အကျဉ်းကျနေသူတွေအနေနဲ့ မိမိအမှားတွေကိုသင်ခန်းစာယူပြီး စည်းကမ်းလိုက်နာရင် လျှော့ရက်တွေ ပေးထားတယ်လို့လည်း KNUက အသိပေးထားပါတယ်။ စည်းကမ်းလိုက်နာပြီး ကောင်းမွန်စွာ နေထိုင်သူတွေအနေနဲ့ နောက်ထပ်လွတ်ငြိမ်းခွင့်နဲ့ အခါအခွင့်သင့်ရင် အခွင့်အရေးတွေ ထပ်မံ ရရှိနိုင်မယ်လို့ KNUက ထုတ်ပြန်ထားပါတယ်။
