သြဂုတ်-၃၁၊ ၂၀၂၆။ သော်မွန်/People’s Spring
ဖိလစ်ပိုင်နိုင်ငံ၊ မနီလာမြို့အခြေစိုက် Ramon Magsaysay Award Foundation က ဂုဏ်ပြုချီးမြှင့်တဲ့ ၂၀၂၆ ခုနှစ် ရာမွန်မက်ဆေဆေဆုကို နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP)ပူးတွဲတည်ထောင်သူ ဦးဘိုကြည် ရရှိခဲ့ပါတယ်။
AAPPရဲ့ တွဲဖက်အတွင်းရေးမှူးလည်းဖြစ်သူ ဦးဘိုကြည်ဟာ ၂၀၂၆ ခုနှစ် ရာမွန်မက်ဆေဆေဆု(Ramon Magsaysay Award)ဂုဏ်ပြုချီးမြှင့်ခံရတဲ့အတွက် ဝမ်းမြောက်ဂုဏ်ယူကြောင်း AAPP က ဒီနေ့ သြဂုတ် ၃၁ရက်မှာ ထုတ်ပြန်ပါတယ်။
ဖိလစ်ပိုင်သမ္မတဟောင်း ရာမွန်မက်ဆေဆေကို ဂုဏ်ပြုပြီး ပေးအပ်ချီးမြှင့်တဲ့ Ramon Magsaysay Award ကို ၁၉၅၈ ခုနှစ်မှာ စတင်ခဲ့ပြီး အာရှတိုက်ရဲ့ နိုဗယ်ငြိမ်းချမ်းရေးဆုအဖြစ် တင်စားကြပါတယ်။
Public Service Announcement
၂၀၂၆ ခုနှစ်အတွက် ရာမွန်မက်ဆေဆေဆုကို စင်ကာပူနိုင်ငံက တွန်မီကို၊ ဘင်္ဂလားဒေ့ရှ်နိုင်ငံက ရူနာခမ်း၊ မြန်မာနိုင်ငံက ဦးဘိုကြည်တို့ ရရှိကြောင်း ရာမွန်မက်ဆေဆေဆုဖောင်ဒေးရှင်းဥက္ကဋ္ဌ အက်ဂါချူးက ဒီနေ့ ကြေညာပါတယ်။
ရာမွန်မက်ဆေဆေဆုဖောင်ဒေးရှင်းဆုရွေးချယ်ရေးအဖွဲ့ဟာ ၈၈ မျိုးဆက် နိုင်ငံရေးအကျဥ်းသားဟောင်းလည်း ဖြစ်သူ ဦးဘိုကြည်ရဲ့ ဘဝတလျှောက် လုပ်ဆောင်ချက်များကို အမှန်တရား၊ တာဝန်ခံမှုနဲ့ တရားမျှတမှုတို့အတွက် မယိမ်းမယိုင်းဘဲ ကြိုးပမ်းရှာဖွေမှုအဖြစ် အသိအမှတ်ပြုထားကြောင်း ဖော်ပြပါတယ်။
ဦးဘိုကြည်ရဲ့ မဆုတ်မနစ်သော ကတိကဝတ်ဟာ ထူးကဲသော ကိုယ်ကျင့်တရားဆိုင်ရာ သတ္တိ၊ ပုဂ္ဂိုလ်ရေးအရ ပေးဆပ်စွန့်လွှတ်မှု၊ ဒီမိုကရေစီနဲ့ လူသားဂုဏ်သိက္ခာတို့အပေါ် အမြဲတစေ ကာကွယ်စောင့်ရှောက်ထိုက်သော အရာများဖြစ်တယ်ဆိုတဲ့ ခိုင်မာသော ယုံကြည်ချက်တို့ကို ထင်ဟပ်စေကြောင်း ဆုရွေးချယ်ပေးအပ်ရေးအဖွဲ့က ထုတ်ပြန်ပါတယ်။
ဒီဆုဟာ မတရားမှုကို ဆန့်ကျင်တွန်းလှန်နေကြတဲ့ မြန်မာပြည်သူများ၊ အထူးသဖြင့် သံတိုင်များနောက်ကွယ်မှာ ကြံ့ကြံ့ခံ ရပ်တည်နေကြဆဲဖြစ်တဲ့ နိုင်ငံရေးအကျဉ်းသားများအတွက် ရည်ညွှန်းဂုဏ်ပြုအပ်ကြောင်း ဦးဘိုကြည်က အသိပေးပါတယ်။
ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားအားလုံး လွတ်မြောက်ရေးအတွက် အားလုံး စည်းလုံးညီညွတ်စွာ ဆက်လက်လက်တွဲ ကြိုးပမ်းကြမယ်ဆိုရင် ပြည်သူလူထုနဲ့ ဒေသတွင်းအတွက် ငြိမ်းချမ်းရေး၊ ဖွံ့ဖြိုးသာယာဝပြောရေးနဲ့ တည်ငြိမ်အေးချမ်းရေးတို့ကို ဆောင်ကြဉ်းပေးနိုင်မယ့် မြန်မာနိုင်ငံတော်သစ်တစ်ခုကို တည်ဆောက်နိုင်မယ်လို့ အခိုင်အမာ ယုံကြည်ကြောင်းလည်း ဦးဘိုကြည်က ဖော်ပြပါတယ်။
“ဒီဆုဟာ ကျွန်တော်တစ်ဦးတည်းနဲ့သာ သက်ဆိုင်တာမဟုတ်ဘဲ AAPP အဖွဲ့ဝင်အားလုံးနဲ့ သက်ဆိုင်တဲ့ဆုဖြစ်ပါတယ်”လို့ ဦးဘိုကြည်က ရေးသားပါတယ်။
ရာမွန်မက်ဆေဆေဆုကို မြန်မာနိုင်ငံက ဦးလောရုံ၊ ဒေါ်တီးတီး၊ ဒေါက်တာစင်သီယာမောင်၊ ကစောဝါး၊ လဖိုင်းဆိုင်းရော်၊ ဦးကျော်သူနဲ့ ဦးဆွေဝင်းတို့ ရရှိခဲ့ပါတယ်။
