မတ္တရာရှိ စစ်ဆေးရေးဂိတ်တစ်ခု မိုင်းဆွဲတိုက်ခိုက်ခံရ

မန္တ​လေးတိုင်း မတ္တရာမြို့ မန္တလေး-မိုးကုတ်လမ်းမကြီးပေါ်ရှိ စစ်ဆေးရေးဂိတ်နေရာကို ဒေသတွင်း တော်လှန် ရေးတပ်ဖွဲ့က ယနေ့နံနက်တွင် မိုင်းဖြင့်တိုက်ခိုက်ခဲ့ကြောင်း ဒေသခံတစ်ဦးက ပြောသည်။

“မတ္တရာမြို့မြောက်ဘက် စိုးမိုး-၂ ဆိုတဲ့နေရာမှာ တစ်လုံးကွဲတယ် အဝေးထိန်းမိုင်းနဲ့ ခွဲတာ။ အဲဒီဟာကို ပူးပေါင်းလုပ်ဆောင်တာက မန္တလေးတိုင်းအခြေစိုက် PACF အဖွဲ့နဲ့ မတ္တရာကောင်းကင်ဆိုတဲ့ အဖွဲ့ ပူးပေါင်းဆောင်ရွက်တာ။ ဆောင်ရွက်ရတဲ့ အကြောင်းအရင်းက မတ္တရာ အရှေ့ပိုင်းနယ်ကို ကျေးရွာတွေကို ဝင်ရောက်ပြီးတော့ မီးရှို့ဖျက်ဆီးတာ ဖမ်းဆီးခေါ်ဆောင်သွားတဲ့ ကိစ္စတွေနဲ့ ပတ်သက်ပြီး သတိပေးတဲ့အနေနဲ့ ခွဲတာ”ဟု ဒေသခံက ပြောသည်။

ယင်းသို့ တိုက်ခိုက်မှုကြောင့် လူသေဆုံးထိခိုက်မှုရှိ၊မရှိ မသိရပေ။

မတ္တရာ ပြည်သူကာကွယ်ရေးတပ်ဖွဲ့(ပကဖ) ကလည်း အဆိုပါ တိုက်ခိုက်မှုကို ၎င်းတို့ ဆောင်ရွက်ခဲ့ခြင်းဖြစ်ကြောင်း ထုတ်ပြန်သည်။

Public Service Announcement

အာဏာသိမ်း အကြမ်းဖက်စစ်ကောင်စီ၏ လက်အောက် ခံဖြစ်သော အကြမ်းဖက် စစ်ကောင်စီတပ်ဖွဲ့ဝင်များ၊ တပ်စခန်းများ၊ စစ်ဆေးရေးဂိတ်များ ၊ ပျူစောထီးအဖွဲ့ဝင်များနှင့် စစ်ကောင်စီခန့် အုပ်ချုပ်ရေးမှူးများကို အဓိက ပစ်မှတ်ထား၍ ဆက်လက်တိုက်ခိုက်သွားမည်ဟုလည်း မတ္တရာ(ပကဖ)က ထုတ်ပြန်သည်။