မြောက်ဦးမြို့သားဖွားဆေးရုံကို စစ်တပ်ဗုံးကြဲ၊ကလေးငယ်နဲ့အမျိုးသမီးအပါအ၀င် ၄ ဦး သေဆုံး

နိုဝင်ဘာ-၁၊၂၀၂၆။ခိုင်မြတ်/People’s Spring

မြောက်ဦးမြို့၊ လေးမြို့စားရပ်ကွက်ရှိ ယာယီဖွင့်လှစ်ထားတဲ့ သားဖွားဆေးရုံကို အာဏာသိမ်းစစ်တပ်က ဒီနေ့ ညနေပိုင်းမှာ ဗုံးကြဲခဲ့တာကြောင့် ကလေးငယ်၊ အမျိုးသမီးအပါအ၀င် ၄ ဦး သေဆုံးပြီး ၄ ဦးထက်မနည်း ဒဏ်ရာရသွားခဲ့တယ်လို့ ဒေသခံတွေက ပြောကြပါတယ်။

နိုဝင်ဘာ ၁ ရက်နေ့ ညနေ ၅ နာရီကျော်အချိန်မှာ ဂျက်ဖိုက်တာနှစ်စီးနဲ့ လသားအရွယ်ကလေးတွေ၊ ကိုယ်၀န်ဆောင်တွေ၊ လူနာစောင့်တွေ ရှိ‌နေတဲ့ သားဖွား‌ဆေးရုံတည့်တည့်ကို ဗုံးကြဲချခဲ့တာဖြစ်ပါတယ်။

“ဒီ‌ဆေးရုံက အရင်ဆေးရုံဗုံးကြဲခံရလို့ အသစ်ဖွင့်ထားတာပါ၊ အဲဒါကို ရည်ရွယ်ချက်ရှိရှိ ပစ်တာပါ။ သူတို့ ဒီလောက် ကင်းထောက်နေတာ ဆေးရုံမှန်း မသိဘဲမနေဘူး” လို့ မြောက်ဦးမြို့ခံတဦးက ပြောပါတယ်။

Public Service Announcement

စစ်တပ်က ဆေးရုံဗုံးကြဲလို့ သေဆုံးသွားတဲ့အထဲမှာ ၁ နှစ်ကျော်ကလေးငယ်တဦး၊ အမျိုးသမီး ၂ဦးပါ၀င်ပြီး ဒဏ်ရာရသူတွေထဲမှာလည်း အမျိုးသမီးနဲ့ ကလေးငယ်တွေ ပါ၀င်တယ်လို့ သိရပါတယ်။

စစ်တပ်ဟာ ပြီးခဲ့တဲ့ ၂၀၂၅ ခု ဒီဇင်ဘာ ၁၀ ရက် အပြည်ပြည်ဆိုင်ရာ လူ့အခွင့်အရေးနေ့ကလည်း မြောက်ဦးပြည်သူ့ဆေးရုံကြီးကို ဂျက်ဖိုက်တာနဲ့ ဗုံးကြဲခဲ့တာကြောင့် လူနာ၊ လူနာစောင့်၊ ၀န်ထမ်းစတဲ့ အပြစ်မဲ့အရပ်သားပြည်သူ ၃၄ ဦးသေဆုံးပြီး ၇၆ ဦး ဒဏ်ရာရခဲ့ပါတယ်။

နို၀င်ဘာ ၁ ရက်နေ့ညနေပိုင်းမှာ စစ်တပ်က ကျောက်တော်မြို့နယ် ဝါးတောင်ကျေးရွာအနီး ယိုးချောင်းတံတားကိုလည်း ဗုံးကြဲခဲ့ပြီး ၇ ဦးထက်မနည်း သေဆုံးကာ ၃ ဦးထက်မနည်း ဒဏ်ရာရခဲ့ပါတယ်။

ဒါ့အပြင် ဒီနေ့ မနက်အစောပိုင်း ၄ နာရီဝန်းကျင်မှာလည်း ပေါက်တောမြို့ပေါ်နဲ့ ပေါက်တောမြို့နယ်ရွာချောင်းကြီးရွာတို့ကို ထောက်ပို့လေယာဉ် Y12 နဲ့ ဗုံးအလုံး ၃၀ ကျော် ကြဲချတိုက်ခိုက်ခဲ့တာကြောင့် သက်ကြီးအမျိုးသား ၁ ဦး သေဆုံးပြီး စစ်ဘေးရှောင်ကလေးငယ် ၂ ဦး အပါအဝင် ၄ ဦးဒဏ်ရာရခဲ့ပါတယ်။

ဒါကြောင့်စစ်တပ်က နိုဝင်ဘာ ၁ ရက်နေ့မှာတင် မြောက်ဦး၊ ကျောက်တော်၊ ကျောက်ဖြူမြို့နယ် တွေကိုဗုံးကြဲခဲ့တာကြောင့် ၁၀ ဦးထက်မနည်းသေဆုံးပြီး အများအပြားသေဆုံးခဲ့ပါတယ်။

အာဏာသိမ်းစစ်တပ်ဟာ ပေါက်တောမြို့နယ်ငပြီကျွန်းကမ်းတက်တိုက်ပွဲ၊ စစ်တွေ၊ ကျောက်ဖြူမြို့နယ်တို့အတွင်း က တိုက်ပွဲတွေမှာ အထိနာအကျအဆုံးများပြီး တပ်စခန်းတွေ လက်လွှတ်နေရချိန် အခုလို အရပ်သားလူနေကျေးရွာ တွေကိုပါ မချန်ဗုံးကြဲတိုက်ခိုက်နေတာဖြစ်ပါတယ်။

စစ်တပ်ဟာ ငပြီကျွန်းပေါ် ကမ်းတက်နိုင်ခဲ့ပေမယ့် ကမ်းပေါ်က စစ်တပ်ခြေကုတ်နေရာအားလုံးကို အာရက္ခတပ် တော် (AA)က အပြီးပြတ်သိမ်းပိုက်လိုက်ပြီဖြစ်ပြီး စစ်တွေမြို့နယ်အတွင်းက တပ်စခန်း ၁၃ ခု၊ ကျောက်ဖြူမြို့နယ် အတွင်းက တပ်စခန်း ၂ ခုထက်မနည်းတို့ကို သိမ်းပိုက်ထားပါတယ်။ဒါ့အပြင် စစ်တွေတိုက်ပွဲမှာ စစ်တပ်ရဲ့ စစ်သင်္ဘော ၅ စီးထက်မနည်းဟာလည်း AA ရဲ့ တိုက်ခိုက်မှုကြောင့် ထိခိုက်၊ ပျက်စီးခဲ့ရပါတယ်။

လူထုနွေဦးက ကောက်ယူပြုစုထားတဲ့အချက်အလက်တွေအရ စစ်တပ်ရဲ့ စစ်ဆင်ရေးစတဲ့ စက်တင်ဘာ ၄ ရက်နေ့ ကနေ နိုဝင်ဘာ ၁ ရက်နေ့ထိ နှစ်လနီးပါးအတွင်း စစ်တပ်လက်ချက်ကြောင့် သေဆုံးရတဲ့ ရခိုင်ဒေသခံအရပ်သား ပြည်သူ ၁၁၈ ဦးနဲ့ ထိခိုက်ဒဏ်ရာရသူ ၁၉၃ ဦးထက်မနည်း ရှိသွားခဲ့ပြီဖြစ်ပါတယ်။