ဗြိတိန်နှင့် NUG အကြား ပိုမိုထိရောက်စွာ ပူးပေါင်းဆောင်ရွက်ရေး ဆွေးနွေး

▪️မြန်မာ့အရေးကို ကုလနှင့် နိုင်ငံတကာမျက်နှာစာတွင် မျက်ခြေမပြတ်အလေးထားမည်ဟုဆို

ဗြိတိန်နှင့် အမျိုးသားညီညွတ်ရေးအစိုးရ(NUG)တို့အကြား ပိုမိုထိရောက်စွာ ပူးပေါင်းဆောင်ရွက် နိုင်ရေး နိုင်ငံခြားရေးဝန်ကြီး ဒေါ်ဇင်မာအောင်နှင့် ဗြိတိန်အာရှရေးရာဝန်ကြီး အမန်ဒါမီလင်းတို့ ယနေ့ တွေ့ဆုံဆွေးနွေးခဲ့သည်။

NUG နိုင်ငံခြားရေးဝန်ကြီး ဒေါ်ဇင်မာအောင်သည် ဗြိတိန်နိုင်ငံခြားရေးဌာန၊ အာရှရေးရာဝန်ကြီး အမန်ဒါမီလင်းကို အွန်လိုင်းမှတဆင့်တွေ့ဆုံခဲ့ခြင်းဖြစ်ပြီး ယင်းတွေ့ဆုံမှုတွင် ဗြိတိန်က ကုလသမဂ္ဂအပါအဝင် နိုင်ငံတကာ မျက်နှာစာတွင် မြန်မာ့အရေးကို မျက်ခြေမပြတ် ဆက် လက် အလေးထားဆောင်ရွက်မည်ဟု ဝန်ကြီး အမန်ဒါမီလင်းက ပြောကြားသည်ဟု ဆိုသည်။

ထို့အပြင် ဗြိတိန်သည် အာဏာသိမ်းစစ်ကောင်စီနှင့်ဆက်စပ်သူများကို စီးပွားရေးပိတ်ဆို့ အရေးယူမှုများ ဆက်လက်လုပ်ဆောင်မည်ဖြစ်ပြီး ရွေးကောက်ခံအစိုးရ NUGကို အားပေးထောက်ခံကြောင်း ဝန်ကြီးအမန်ဒါမီလင်းက ထပ်လောင်းပြောကြားသည်။

Public Service Announcement

အထက်ပါတွေ့ဆုံမှုတွင် အာဆီယံ အထူးကိုယ်စားလှယ်နှင့် မြန်မာ့ခရီးစဉ် အပေါ် သဘောထား ၊ အကျဉ်းထောင်များအတွင်း လူ့အခွင့်အရေး ချိုးဖေါက်မှုများ၊ ICRC အခန်းကဏ္ဌ၊ အကြမ်းဖက်စစ်ကောင်စီ၏ မအောင်မြင်သည့်အာဏာသိမ်းမှု အုပ်ချုပ်ရေးအခြေအနေတို့လည်း ဆွေးနွေးခဲ့သည်ဟု NUG နိုင်ငံခြားရေးက ထုတ်ပြန်ဘသည်။

အကြမ်းဖက်စစ်တပ်က အရပ်သားများအပေါ် ဆက် လက်ကျူးလွန်လျက်ရှိသည့်ရာဇဝတ်မှုများ ၊ နိုင်ငံတကာ ရာဇဝတ်ခုံရုံး ICC ၊ အပြည်ပြည်ဆိုင်ရာ တရားရုံး ICJ တို့တွင် တရားမျှတမှုဖေါ်ဆောင်ရေး၊ လူသားခြင်းစာနာထောက်ထားမှု ဆိုင်ရာအကူအညီပေးရေး စသည်တို့ကိုလည်း ဆွေးနွေးခဲ့သည်ဟု ဆိုသည်။

ယင်းတွေ့ဆုံပွဲသို့ NUG ၏ ဗြိတိန်ဆိုင်ရာ ကိုယ်စားလှယ်များ ဖြစ်သည့် ဦးမောင်မောင်အောင်နှင့် ဒေါက်တာ သက်ကိုကို တို့လည်း တက်ရောက်ခဲ့ကြောင်း သတင်းထုတ်ပြန် သည်။