မြန်မာပြည်သူများနှင့်အတူ ရပ်တည်ပြီး NUGကို ပံ့ပိုးကူညီမည်ဟု ဗြိတိန်အာရှရေးရာဝန်ကြီးပြော

ဗြိတိန်သည် မြန်မာပြည်သူများနှင့်အတူ ရပ်တည်ကြောင်းနှင့် အမျိုးသားညီညွတ်ရေးအစိုးရ NUG ၏ ရည်မှန်းချက်များအကောင်အထည်ဖော်ရန် ကူညီထောက်ပံ့မည်ဖြစ်ကြောင်း အာရှရေးရာဝန်ကြီး အမန်ဒါမီလင်းက ပြောသည်။

ဗြိတိန်နိုင်ငံခြားရေးဌာန၊ အာရှရေးရာဝန်ကြီး အမန်ဒါမီလင်းသည် မတ်လ ၇ ရက်တွင် NUG နိုင်ငံခြားရေးဝန်ကြီးဒေါ်ဇင်မာအောင်နှင့် အွန်လိုင်းမှတဆင့်တွေ့ဆုံခဲ့မှုနှင့်ပတ်သက်၍ ဝမ်းမြောက်ကြောင်း ၎င်း၏တွစ်တာစာမျက်နှာ၌ ရေးသားဖော်ပြသည်။

ငြိမ်းချမ်းသော၊ အားလုံးပါဝင်သော၊ ဒီမိုကရက်တစ်မြန်မာနိုင်ငံအတွက် NUG ၏ ရည်မှန်းချက်များကို ဗြိတိန်က ပံ့ပိုးကူညီမည်ဖြစ်ကြောင်းနှင့် စစ်တပ်၏ တိုက်ခိုက်မှုများကြောင့် ထောင်ပေါင်းများစွာသော နေရပ်စွန့်ခွာထွက်ပြေးတိမ်းရှောင်သူများကို အရေးပေါ်အကူအညီပေးမည် ဖြစ်ကြောင်းလည်း ဝန်ကြီး အမန်ဒါမီလင်းက ထုတ်ပြန်သည်။

အထက်ပါ ဗြိတိန်ဝန်ကြီးနှင့်တွေ့ဆုံမှုတွင် ဗြိတိန်နှင့် NUG အကြား ပိုမိုထိရောက်စွာပူးပေါင်း ဆောင်ရွက်နိုင်ရေး၊ ကုလသမဂ္ဂ အပါအဝင် နိုင်ငံတကာမျက်နှာစာတွင် မြန်မာ့အရေးကို မျက်ခြေမပြတ် ဆက်လက်အလေးထားဆောင်ရွက်ရေးနှင့် အကြမ်းဖက်စစ်တပ်၏ ချိုးဖောက်ကျူး လွန်မှုများအတွက် တာဝန်ခံနိုင်ရေး စသည့်ကိစ္စရပ်များကို ထည့်သွင်းဆွေးနွေးခဲ့ကြောင်း NUGက သတင်းထုတ်ပြန်ထားသည်။

Public Service Announcement