ပြည်တွင်း၊ ပြည်ပရှိ ချင်းအမျိုးသားတစ်ရပ်လုံး အနေဖြင့် ချင်းအမျိုးသားတပ်မတော် (CNA) နှင့်အတူ အာဏာရှင် ဆန့်ကျင်တော်လှန်ရေးတွင် မိမိတက်ကျွမ်းရာ ကဏ္ဍအသီးသီးမှ တတက်တအား ပူးပေါင်းပါဝင်ကြရန် CNFက တိုက်တွန်းနှိုးဆော်လိုက်သည်။
ဖေဖော်ဝါရီ ၂၀ရက်တွင် ကျရောက်မည့် (၇၅) နှစ်မြောက် ချင်းအမျိုးသားနေ့ ထုတ်ပြန်ကြေညာချက်ကို ယနေ့တွင် ထုတ်ပြန်ခဲ့ရာ အထက်ပါအတိုင်း တိုက်တွန်းလိုက်ခြင်းဖြစ်ပြီး ချင်းအမျိုးသားနေ့ အား အမျိုးသားနိုင်ငံရေးအနှစ်သာရရှိရှိ ကျင်းပရန် ဖော်ပြထားသည်။
၂၀၂၁အလွန် အာဏာရှင်ဆန့်ကျင်တွန်းလှန်သည့် စစ်ရေး၊ နိုင်ငံရေးလှုပ်ရှားမှုများသည် ပြည်သူ အခြေပြု ပြည်သူ့တော်လှန်ရေးဖြစ်သည်ဟု CNFက ဆိုသည်။
CNF/CNAအနေဖြင့် လက်ရှိဆင်နွှဲနေသော တော်လှန်ရေး စစ်ပွဲကို အမျိုးသားလွတ်မြောက်ရေး အောင်ပွဲအဖြစ် ခံယူလျက် နိုင်ငံရေးဦးတည်ချက် ယုံကြည်ချက်တူညီသော ညီနောင်လက်နက်ကိုင်မဟာမိတ်များ၊ အမျိုသားညီညွတ်ရေးအစိုးရ၊ ဒေသကာကွယ်ရေးတပ်ဖွဲ့များနှင့်အတူ ဆက်လက် တိုက်ပွဲဝင်သွားမည်ဟုလည်း ထုတ်ပြန်သည်။
Public Service Announcement
ချင်းအမျိုးသားတည်ဆောက်ရေးနှင့် ချင်းပြည် ထောင်တည်ဆောက်ရေးကိုလည်း Stakeholder များနှင့်အတူ ဆက်လက် အကောင်အထည်ဖော်မည်ဟုလည်း ဖော်ပြသည်။
စစ်အာဏာရှင်စနစ်ကို အမြစ်ဖြတ်ချေမှုန်းပြီး ဖက်ဒရယ်ဒီမိုကရေစီ အုပ်ချုပ်ရေးစနစ် ထူထောင်ရန် ရရာလက်နက် စွဲကိုင်ပြီး နွေဦးတော်လှန်ရေး အတွက် အသက်၊ သွေး၊ချွေး၊ အိုးအိမ်၊ စည်းစိမ်ပေါင်းများစွာ စတေးလျက် ခုခံတော်လှန်စစ်ဆင်နွှဲခဲ့ရာ နွေဦးတော်လှန်ရေး၌ သွေးမြေကျခဲ့သော အာဏာနည်များ၊ ဒဏ်ရာရ ရဲဘော်ရဲဘက်များအားလုံးအပေါ် လေးစားဂါရ၀ပြုကြောင်းလည်း CNFက ထုတ်ပြန်ခဲ့ပြီး လူမှုဒုက္ခပေါင်းစုံရင်ဆိုင်ကြုံတွေ့နေရသော ပြည်သူအားလုံးအပေါ် လေးစား စာနာကြောင်း ဖော်ပြထားသည်။
