တောင်ကိုရီးယားရောက်မြန်မာတွေလုပ်ဆောင်တဲ့ One Day Challenge ကနေ အမျိုးသားညီညွတ်ရေးအစိုးရ NUG ကို လစဉ် အမေရိကန်ဒေါ်လာတစ်သိန်းကျော် ထောက်ပံ့နိုင်ပြီလို့ အဲဒီလှုပ်ရှားမှု လုပ်ဆောင်နေသူတွေက ကြေညာထားပါတယ်။
တောင်ကိုရီးယားရောက် မြန်မာတွေဟာ လစဉ် သူတို့လစာထဲက တစ်ရက်စာ လှူဒါန်းမယ့် One Day Challenge ကိုလုပ်ဆောင်နေပြီး အောက်တိုဘာ ၃ ရက်အထိ အဲဒီလှုပ်ရှားမှုကို ပါဝင်သူ အဖွဲ့ဝင် ၁၂၇၄ ဦး ရှိနေကာ NUG ကို လစဉ် ဝမ် ၁,၁၉၆ သိန်း ၉ သောင်း ထည့်ဝင်လှူဒါန်း သွားမယ်လို့ သိရပါတယ်။
စစ်အာဏာရှင်စနစ်ကို အမြစ်ဖြတ်ပြီး ဖက်ဒရယ်ဒီမိုကရေစီနိုင်ငံတော်တည်ဆောက်ရေးမှာ တောင်ကိုရီးယားရောက်မြန်မာရဲဘော်တွေကို နိုင်ငံတော်က လုံး၀ အလိုရှိနေတယ်လို့ စစ်အာဏာသိမ်းမှုဆန့်ကျင်ရေးကော်မတီ- ကိုရီးယားက ထုတ်ပြန်ပါတယ်။
သူရဲကောင်းတွေ၊ အသက်တွေပေးဆပ်နေကြတဲ့ ဒီမိုကရေစီ တော်လှန်ရေးမှာ ပြည်ပရောက် မြန်မာတွေရဲ့တစ်ရက်စာလုပ်အားခကို ပေးဆပ်ဖို့ ဝန်မလေးရင် One Day Challenge မှာပူးပေါင်းပေးကြဖို့လည်းတိုက်တွန်းထားပါတယ်။
One Day Challenge မှာ အဖွဲ့ဝင်လိုသူတွေဟာ https://onedaykorea.org/request-form ကတဆင့် အချက်အလက်ဖြည့်သွင်းပြီး မန်ဘာဝင်နိုင်တယ်လို့ စစ်အာဏာသိမ်းမှုဆန့်ကျင်ရေးကော်မတီ-ကိုရီးယားက ထုတ်ပြန်ထားပါတယ်။
ကမ္ဘာတစ်ဝန်းရှိ ပြည်ပရောက်မြန်မာတွေဟာ မြန်မာနိုင်ငံမှာ စစ်အာဏာသိမ်းမှုကို ကန့်ကွက်ရှုတ်ချကာ လိုအပ်တဲ့နေရာတွေမှာ ကူညီပံ့ပိုးဖို့အတွက် အလှူငွေကောက်ခံတာ၊ ရန်ပုံငွေ စုဆောင်းကောက်ခံတာ စသဖြင့်တောက်လျှောက်လုပ်ဆောင်နေတာတွေ့ရပါတယ်။