နာမည်ကျော် လူမှုကွန်ရက်တွေဖြစ်တဲ့ Facebook နဲ့အတူ Instagram နဲ့ WhatsApp တို့ နာရီနဲ့ချီပြီး အသုံးပြုလို့မရအောင်ပြတ်တောက်သွားပြီးတဲ့နောက် မက်ဇူကာဘတ် ဟာ သူရဲ့ချမ်းသာကြွယ်ဝမှုကနေ အမေရိကန် ဒေါ်လာ ၆ ဘီလီယံလောက်ဆုံးရှုံးသွားတယ်လို့သိရပါတယ်။
မနေ့က မြန်မာစံတော်ချိန် ညပိုင်း ၁၀ နာရီလောက်ကစပြီး ကမ္ဘာတလွှားမှာ facebook ၊Instagram နဲ့ WhatsApp တို့ သုံးစွဲလို့မရအောင်ပြတ်တောက်သွားတာပါ။
ဒီပြတ်တောက်မှုဟာ ၆ နာရီကျော်ကြာမြင့်ခဲ့တယ်လို့သိရပါတယ်။
ဒီအကျိုးဆက်ကြောင့် ဆိုရှယ်မီဒီယာ ကုမ္ပဏီကြီးရဲ့ရှယ်ယာဟာ ၄.၉ ရာခိုင်နှုန်းထိ ထိုးကျသွား သလို မတ်ဇူကာဘတ်ဟာ လည်း ဘီလီယံနာ စာရင်းမှာ နံပါတ် ၅ နေရာထိလျောကျသွားပါတယ်။
Facebook ဟာ လတ်တလောမှာ သူရဲ့ထုတ်ကုန်တွေနဲ့ပတ်သက်ပြီး အခက်အခဲတွေ ရင်ဆိုင်နေရပါတယ်။
ကုမ္ပဏီဟာထုတ်ကုန်တွေနဲ့ပတ်သက်တဲ့ပြဿနာတွေကို သိရှိထားပေမယ့် ထိခိုက်လာနိုင်ခြေတွေကို မကိုင်တွယ်နိုင်ခဲ့ဘူးလို့ ပြီးခဲ့တဲ့ စက်တင်ဘာလအတွင်းက ဝေါစရိဂျာနယ်က Facebook အကြောင်းကို စတင်ရေးသားခဲ့ပါတယ်။
ဝေါစရိဂျာနယ်ကို Facebook ကုမ္ပဏီရဲ့အချက်အလက်တွေ ဖွင့်ချ ခဲ့တဲ့ အသက် ၃၇ နှစ်အရွယ် အမျိုးသမီး Frances Haugen ဟာ facebook မှာ ၂ နှစ်နီးပါးအလုပ်လုပ်ခဲ့သူပါတယ်။
ပြီးခဲ့တဲ့ ရက်ပိုင်းမှာ အဲဒီအမျိုးသမီးဟာ CBS ရုပ်သံရဲ့ 60 Minutes အစီအစဉ်မှာ Facebook နဲ့ပတ်သက်တဲ့မကျေနပ်ချက်တွေကို ထုတ်ပြောခဲ့တာတွေရှိခဲ့ပါတယ်။