မိမိတို့၏ ရပိုင်ခွင့်အခွင့်အရေး၊ လွတ်လပ်ရေးတို့အတွက် ရဲရင့်စွာတိုက်ပွဲဝင်နေသော LGBTQIA+ အသိုင်းအဝန်းအပါအဝင် မြန်မာပြည်သူအားလုံးကို လေးစားဂုဏ်ပြုကြောင်း ဗြိတိန်သံရုံးက သတင်းထုတ်ပြန်သည်။
ယနေ့(မတ်လ၁ ရက်) ကျရောက်သော နိုင်ငံတကာခွဲခြားဆက်ဆံမှုပပျောက်ရေးနေ့တွင် မြန်မာနိုင်ငံဆိုင်ရာ ဗြိတိန်သံရုံးက ထုတ်ပြန်ခြင်းဖြစ်သည်။
“လုံခြုံခိုင်မာ၊ ဘေးကင်းပြီး စည်ပင်သာယာဝပြောတဲ့ လူ့အဖွဲ့အစည်းဆိုတာ အကြမ်းဖက်ခံရမှု (သို့မဟုတ်) ခွဲခြားဆက်ဆံခံရမှုတို့ကိုကြောက်ရွံ့ နေရခြင်းမရှိဘဲ လူသားတိုင်း လွတ်လပ်စွာ နေထိုင်နိုင်တဲ့ လူ့အဖွဲ့အစည်းပဲဖြစ်ပါတယ်”ဟု ဗြိတိန်သံရုံးက ဆိုသည်။
မြန်မာအပါအဝင် ကမ္ဘာတဝန်းရှိ LGBT+ အခွင့်အရေးအတွက် ဆက်လက်ကာကွယ်ပြီး ပံ့ပိုးလုပ်ဆောင်သွားရန် ဗြိတိန်အစိုးရက ကတိကဝတ်ပြုထားပြီးဖြစ်ကြောင်းလည်း ထပ်လောင်း အသိပေးသည်။
ပထမဦးဆုံး ကမ္ဘာလုံးဆိုင်ရာ LGBT+ ညီလာခံ ‘Safe To Be Me’ ကို လာမည့် ဇွန်လကုန်တွင် ဗြိတိန်က ဦးစီးကာ အိမ်ရှင်အဖြစ်လက်ခံ ကျင်းပသွားမည်ဖြစ်သည်။
ယင်းညီလာခံ၌ LGBT+ အခွင့်အရေးနှင့်ပတ်သက်ပြီး အဓိကပြသနာများကို ဆွေးနွေးရန်၊ အပြုသဘောဆောင်သည့် နိုင်ငံတကာလုပ်ဆောင်ချက်များ လုပ်ဆောင်ရန် ကတိကဝတ်များထားရှိရေးအတွက် လူမှုအဖွဲ့အစည်းများနှင့် နိုင်ငံ အားလုံး အတူတကွဆွေးနွေးနိုင်မည့် အခွင့်အလမ်း များရရှိမည်ဖြစ်ကြောင်း သံရုံးထုတ်ပြန်ချက်၌ ဖော်ပြသည်။
ဓာတ်ပုံ – ဗြိတိန်သံရုံး