ပြည်သူ့တော်လှန်စစ်များဆင်နွှဲရာတွင် (၁၈)နှစ်အောက် ကလေးသူငယ်များအပေါ် သက် ရောက်လာနိုင်သော ရုပ်ပိုင်းဆိုင်ရာ၊ စိတ်ပိုင်းဆိုင်ရာ ထိခိုက်မှုများ လျှော့ချနိုင်ရန်နှင့် အကာအကွယ်များပေးရန် အမျိုးသားညီညွတ်ရေးအစိုးရ(NUG)ကာကွယ်ရေးဝန်ကြီးဌာနက ယနေ့ ထုတ်ပြန်သည်။
လက်နက်ကိုင်တိုက်ပွဲများအတွင်း ကလေးသူငယ်များအား အကာအကွယ်ပေးရန် ပြည်သူ့ကာကွယ် ရေးတပ်ဖွဲ့များအတွက် လမ်းညွှန်ချက်ထုတ်ပြန်ရာတွင် အသက် ၁၈ နှစ်ပြည့်ပြီးသူများကိုသာ တပ်သားအဖြစ် လက်ခံစုဆောင်းရေးကို အထူးကြပ်မတ်ဆောင်ရွက်ကြရန် ကာကွယ်ရေး ဝန်ကြီးဌာနက ညွှန်ကြားသည်။
အကြောင်းအမျိုးမျိုးကြောင့် (၁၈)နှစ်အောက် ကလေး သူငယ်များ မိမိတို့ တပ်စခန်းနေရာအသီးသီးတွင် ရောက်ရှိနေသည်ဆိုပါက နောက်ဆက်တွဲ ညွှန်ကြားချက်များပါ အစီအမံတိုင်း ဆောင်ရွက်ထားရှိကြရန်လည်း ဆက်လက် ညွှန်ကြားသည်။
NUG ကာကွယ်ရေးဝန်ကြီးဌာနသည် ပြည်သူ့ခုခံစစ် လက်နက်ကိုင်တိုက်ပွဲများတွင် အသက် ၁၈ အောက် ကလေးသူငယ်များအား ကာကွယ်စောင့်ရှောက်ရန် ကျင့်ဝတ်များ၊ စည်းမျဉ်းများ ထုတ်ပြန်ထားပြီးဖြစ်သည်ဟုဆိုသည်။
ထို့အပြင် ပြည်သူ့ကာကွယ်ရေးတပ်ဖွဲ့များသည် လက်နက်ကိုင်ပဋိပက္ခများတွင် ဖြစ်လေ့ရှိသော အသက် ၁၈ နှစ်အောက် ကလေးသူငယ်များအပေါ်ချိုးဖောက်သည့် ဆိုးရွားသောအကြမ်းဖက်ခြင်း ၆ ချက် (Six Grave Violations) ကို မကျူးလွန်စေရေး အလေး ထား၍ အထူးသတိပြုရန် လိုအပ်ကြောင်း သတိပေးထုတ်ပြန်ထားသည်။