တရားမဝင်ရွှေ့ပြောင်းလုပ်သားများ အွန်လိုင်းမှတ်ပုံတင်ခြင်း ခွင့်ပြုပေးမည်ဟု ထိုင်းအလုပ်သမားဝန်ကြီးဌာနပြော

ထိုင်းအလုပ်သမားဝန်ကြီးဌာနသည် နိုင်ငံအတွင်းရှိ မြန်မာများအပါအဝင် တရားမဝင်ရွှေ့ပြောင်းအလုပ်သမားများအတွက် မှတ်ပုံတင်ခြင်းကို ခွင့်ပြုပေးမည်ဟု Bangkok Post သတင်းဌာနက ယမန်နေ့တွင် ဖော်ပြသည်။

ရွှေ့ပြောင်းအလုပ်သမားများ မူဝါဒစီမံခန့်ခွဲရေးကော်မတီနှင့် သက်ဆိုင်ရာ အေဂျင်စီများအကြား ယမန်နေ့တွင်ပြုလုပ်သော ဆွေးနွေးပွဲ၌ အကြောင်းအရာလေးခုကို သဘောတူညီချက်ရရှိခဲ့ကြောင်း အလုပ်သမားရေးရာဌာန ညွှန်ကြားရေးမှူးချုပ် Pairoj Chotikasathien က ပြောသည်။

အထက်ပါဆွေးနွေးပွဲတွင် ကမ္ဘောဒီးယား၊ လာအို၊ မြန်မာနှင့် ဗီယက်နမ်တို့မှ တရားမဝင်အလုပ် သမားများအတွက် မှတ်ပုံတင်ခြင်းကို ခွင့်ပြုပေးတော့မည်ဟု သဘောတူညီခဲ့သည်ဟု ဆိုသည်။

အလုပ်သမားခွင့်ပြုချက် သက်တမ်းကုန်နေသည့်အလုပ်သမားများနှင့် အလုပ်သမားခွင့်ပြုချက် မရှိသည့် အလုပ်သမားများအတွက် အဆိုပါ မှတ်ပုံတင်ခြင်းက အကျုံးဝင်မည်ဖြစ်သည်။

Public Service Announcement

အွန်လိုင်းမှတ်ပုံတင်ခြင်းအစီအစဉ်သည် လက်ရှိထိုင်းနိုင်ငံအတွင်းရှိ ရွှေ့ပြောင်းအလုပ်သမားများအတွက်ဖြစ်ပြီး အသစ်ရောက်ရှိလာသည့် အလုပ်သမားများအတွက် အကျုံးဝင်မည်မဟုတ်ကြောင်းPairoj Chotikasathien က ပြောသည်။

အဆိုပါ အွန်လိုင်းမှတ်ပုံတင်ခြင်းလျှောက်ထားရန် အလုပ်ရှင်များက ၎င်းတို့၏ ရွှေ့ပြောင်းအလုပ် သမားစာရင်းကို အလုပ်သမားဝန်ကြီးဌာနထံ စာရင်းတင်သွင်းရမည်ဖြစ်သည်။ အဆိုပါ အလုပ် သမားများသည် ထိုင်းနိုင်ငံအတွင်း လာမည့် ၂၀၂၃ ဖေဖော်ဝါရီ မတိုင်ခင်အထိ အလုပ်လုပ်ခွင့် ရရှိမည်ဖြစ်သည်။

ထို့အပြင် ဩဂုတ် ၁ ရက်မတိုင်မီနှင့် နောက်ပိုင်း ဗီဇာဖြင့် အလုပ်လုပ်မည့် ရွှေ့ပြောင်းအလုပ် သမားများသည် ထိုင်းနိုင်ငံအတွင်း ဆက်လက်အလုပ်လုပ်လိုပါက ၎င်းတို့၏အလုပ်ခွင့်ပြုချက် များ(work permits)ကို သက်တမ်းတိုးရန် လိုအပ်မည်ဖြစ်သည်။ ယင်းသို့လုပ်ဆောင်ပါက အဆိုပါအလုပ်သမားများသည် နောက်ထပ် ၂ နှစ် အလုပ်လုပ်ခွင့်ရရှိမည်ဖြစ်သည်။

တတိယသဘောတူညီချက်မှာ ဗီဇာခများကို လျှော့ချပေးမည်ဖြစ်သည်။ ပြည်ထဲရေးနှင့် လူဝင်မှုကြီးကြပ်ရေးဗျူရိုသည် ဗီဇာခ ဘတ်၂၀၀၀ မှ ၅၀၀သို့ လျှော့ချရန် ဌာနအတွင်း ညွှန်ကြားချက်တစ်စောင်ကို ပူးတွဲမူကြမ်းရေးဆွဲနေသည်ဟု ဆိုသည်။

စတုတ္ထသဘောတူညီချက်မှာ အိမ်နီးချင်းနိုင်ငံများနှင့် MoU စာချုပ်ဖြင့် ရောက်ရှိလာသော ရွှေ့ပြောင်းအလုပ်သမားများကို ကူညီပေးနိုင်ရေး ဒွန်မောင်းနှင့် သု၀ဏ္ဏဘူမိလေဆိပ်များတွင် ဆိုက်ရောက်နှင့် ပြန်လည်ပေါင်းစည်းရေးစင်တာများ ထပ်မံတိုးချဲ့ရေးအစီအစဉ်ဖြစ်သည်။