ဆိုင်းမင်း/People’s Spring
စစ်ကောင်စီက ဆိုက်ဘာလုံခြုံရေးဥပဒေ ပြဌာန်းလိုက်ပြီး ရက်ပိုင်းအကြာမှာပဲ မန္တလေးမြို့ ၊ ချမ်းအေးသာစံမြို့နယ် အတွင်း လမ်းသွားလမ်းလာပြည်သူတွေကို VPN အသုံးပြုတာ ရှိ မရှိ စစ်ဆေးတာတွေ ရှိလာတယ်လို့ ကိုယ်တိုင်ကြုံတွေ့ခဲ့ရသူထံကသိရပါတယ်။
မနေ့ (ဇန်နဝါရီ ၇ ရက် ) မနက်ပိုင်း ၁၀ နာရီဝန်းကျင်က ချမ်းအေးသာစံမြို့နယ် ၊ လမ်း ၃၀ အနီး ဆေးတက္ကသိုလ်တဝိုက်မှာ စစ်ဆေးခံခဲ့ရတာလို့ ကြုံတွေ ခဲ့ရသူအမျိုးသားက ပြောပါတယ်။
ရဲ၊ ယာဥ်ထိန်းနဲ့ အရပ်ဝတ်အဖွဲ့တွေက သွားလာနေတဲ့ဆိုင်ကယ်တွေကို တားပြီး စစ်ဆေးနေတာလို့သိရပါတယ်။
Public Service Announcement
“ယာဥ်ထိန်းက ဆိုင်ကယ်နဲ့ပတ်သက်ပြီး စစ်တယ်၊ ရဲက ဖုန်းယူပြီး VPN ရှိမရှိစစ်တာ”လို့ စစ်ဆေးခံရတဲ့ အမျိုးသားတစ်ဦးကပြောပါတယ်။
အခုလ ဇန်နဝါရီ ၁ ရက်နေ့မှာ ဆိုက်ဘာလုံခြုံရေးဉပဒေကို အာဏာသိမ်းစစ်ကောင်စီခေါင်းဆောင်က ပြဌာန်းပါတယ်။
အဲဒီဉပဒေမှာ ခွင့်ပြုချက်မရဘဲ ဗီပီအန် ( VPN ) ထူထောင်တာ ဒါမှမဟုတ် VPN ဝန်ဆောင်မှုပေးရင် ထောက်ဒဏ် ၆ လအထိ ချနိုင်တဲ့ ဆိုင်ဘာလုံခြုံရေးဉပဒေကို စစ်ကောင်စီက ဇန်နဝါရီလ ၁ ရက်မှာထုတ်ပြန်လိုက်ပါတယ်။
ပြည်တွင်းမှာ လူသုံးများတဲ့ ဖေ့ဘွတ်ခ်ကိုစစ်ကောင်စီက ပိတ်ပင်ထားပြီးနောက် လူထုက ဖေ့ဘွတ်ခ်သုံးရာမှာ VPN ကိုကြားခံ အသုံးပြုနေရပါတယ်။
ဇန်နဝါရီ ၁ရက်က ပြဌာန်းလိုက်တဲ့ စစ်ကောင်စီ ဉပဒေ ရဲ့ ပြစ်မှု ပြစ်ဒဏ်ပိုင်းမှာ တော့ ခွင့်ပြုချက်မရ ဘဲ မည်သူမဆို VPN ထူထောင်တာ ဒါမှမဟုတ် VPN ဝန်ဆောင်မှုပေးရင် ထောင်ဒဏ် တစ်လကနေ ခြောက်လအထိ ချနိုင်သလို ၊ ငွေဒဏ်ချမယ်ဆိုရင်လည်း ကျပ်ဆယ်သိန်းကနေ ကျပ်သိန်းတစ်ရာအထိ ချမှတ်ရမယ်လို့ပါရှိပါတယ်။
လူပုဂ္ဂိုလ်တစ်ဦးချင်း အနေနဲ့ VPN သုံးစွဲရင် ဒီဉပဒေ နဲ့ ညှိစွန်းမှု ရှိ မရှိကို စစ်ကောင်စီ က ရှင်းရှင်းလင်းလင်း မရေးထားပါဘူး။
ပြီးခဲ့တဲ့ နှစ်တွေအတွင်းကလည်း စစ်ကောင်စီထိန်းချုပ်မှုအောက်မှာ ရှိနေတဲ့မြို့ကြီးတွေမှာ ပြည်သူတွေကို VPN သုံးစွဲတာ ရှိ မရှိ စစ်ဆေးပြီး ဖမ်းဆီးအရေးယူတာ ၊ငွေညှစ်ခံရတဲ့သတင်းတွေ ကျယ်ကျယ်ပြန့်ပြန့် ထွက်ခဲ့ပါသေးတယ်။
စစ်ကောင်စီကတော့ နိုင်ငံ ရဲ့အရေးကြီးအချက်အလက်တွေ လုံခြုံဖို့ ၊ အချုပ်အခြာအာဏာနဲ့ တည်ငြိမ်အေးချမ်းမှု ထိခိုက်စေတာက ကာကွယ်ဖို့ ဆိုက်ဘာ လုံခြုံရေးဉပဒေကို ပြဌာန်းရတာလို့ဆိုပါတယ်။
