ကချင်ပြည်နယ်၊ ဖားကန့်မြို့နယ်တွင် ကျောက်စိမ်းတူးဖော်ရေးလုပ်ကွက်အတွင်း မြေစာပုံပြိုကျ၍ ကုမ္ပဏီဝန်ထမ်း ငါးဦးသေဆုံးပြီး တစ်ဦးဒဏ်ရာရခဲ့သည်။
ဖားကန့်မြို့နယ်၊ အောင်ဆုကျော်ကျေးရွာမှ ကုမ္ပဏီလုပ်ကွက်အတွင်း ကျောက်တူးနေစဉ် ဖေဖော်ဝါရီ ၁၄ရက်နံနက်က မြေစာပုံပြိုကျခဲ့ခြင်းဟု ဒေသခံတစ်ဦးက ပြောသည်။
” သေဆုံးတာက ငါးယောက်။ အလောင်းပြန်ရတာ လေးလောင်း။ တစ်လောင်းက ရှာနေဆဲ။ ကုမ္ပဏီဝန်ထမ်းဆိုတော့ လူစာရင်းက အတိအကျရတယ်” ဟု ယင်းဒေသခံက ပြောသည်။
Public Service Announcement
ကုမ္ပဏီအမည်ကို ထုတ်ဖော်ပြောကြားခြင်းမရှိသေးဘဲ သေဆုံးသူများအတွက် နစ်နာကြေးရရန်ကိစ္စများ ဆောင်ရွက်နေဆဲဟု ဆိုသည်။ ယခု မြေစာပုံပြိုကျမှုတွင် ဒဏ်ရာရသူတစ်ဦးရှိသေးပြီး ဆေးကုနေသည်ဟု သတင်းရရှိသည်။
ဖားကန့်မြို့နယ် စဘော့ကျေးရွာတွင် ဇန်နဝါရီ ၁၃ရက်နံနက်က ကျောက်စိမ်းတူးဖော်ရေးလုပ်ကွက် နွံကန်ပြိုကျမှုဖြစ်ခဲ့သေးသည်။ အဆိုပါ ဖြစ်စဉ်အတွင်း ကလေးငယ်လေးဦးနှင့် အမျိုးသမီး ၁၄ဦးအပါအဝင် ရုပ်အလောင်း ၃၂လောင်းတွေ့ရှိခဲ့ပြီး သုံးပတ်ကြာ ရှာဖွေကယ်ဆယ်ရေးလုပ်ပြီးနောက် ရှာဖွေရေးရပ်ဆိုင်းခဲ့သည်။
ကျေးရွာအတွင်းရှိ အိမ်ခြေ ၅၇ကျလုံးလည်း ပျက်စီးခဲ့သည်။ နောက်ရက်အနည်းငယ်အကြာတွင် အဆိုပါ မြေစာပုံထပ်ပြိုပြီး သုံးဦး ထပ်မံသေဆုံးခဲ့သည်။
ဖားကန့်တွင် လူသေဆုံးမှုဖြစ်စေသည့် မြေစာပုံပြိုပျမှုသည် တစ်လခန့်အတွင်း သုံးကြိမ်ဖြစ်ပွားခဲ့ခြင်းဖြစ်သည်။
