ဧပြီ-၂၂၊ ၂၀၂၅။ ကျော်ဇော/People’s Spring
ထိုင်းတွင်ဖမ်းဆီးခံရပြီးပြန်ပို့ခံရသောမြန်မာလုပ်သားများကို စစ်ကောင်စီက စစ်သားသစ်စုဆောင်းပြီးစစ်သင်တန်းသို့ ပို့ဆောင်ရာတွင် မြိတ်မြို့မှ ခရိုနီလုပ်ငန်းရှင်များအနေဖြင့် ဆက်လက်ပူးပေါင်းခြင်းမပြုရန် မြိတ်မြို့နယ် ပြည်သူ့ကာကွယ်ရေးအဖွဲ့(ပကဖ)မှ သတိပေးလိုက်သည်။
စစ်ကောင်စီနှင့် ပူးပေါင်နေသည်ဆိုသည့် မြိတ်မြို့မှ လုပ်ငန်းရှင်များမှာ သီတာအုပ်စု၊ ငွေဇင်ယော်အုပ်စု၊ ထူးထူးတိုးအုပ်စု၊ ကိုဝေလင်းအုပ်စု စသူတို့သည် လိုင်းဖြူလှေများဖြင့် ထိုင်းတွင်ဖမ်းဆီးခံရပြီးပြန်ပို့သော မြန်မာနိုင်ငံသား ၂,၅၀၀ ဦးခန့်အား စစ်မှုထမ်းသင်တန်းများသို့ ပို့ဆောင်ခဲ့ကြရာတွင် စစ်ကောင်စီကို ကူညီခဲ့ကြောင်း မြိတ်ပကဖ ကဧပြီ ၂၂ရက်တွင်ထုတ်ပြန်သည်။
“၂,၅၀၀ ခန့်က စစ်မှုထမ်းဥပဒေထုတ်ပြီး စတင်ဖမ်းဆီးစဉ်ကနေ ခုနောက်ဆုံးအထိပါ။ ကော့သောင်းမှာ ခုလက်ရှိဖမ်းဆီးစုဆောင်းထားတာ ရှိသေးတယ်လို့ သိရတယ်။ အဲဒီလူတွေက ၂,၅၀၀ ထဲမှာ မပါသေးဘူး”ဟု စစ်မှုထမ်းသင်တန်းများသို့ ပို့ဆောင်ခံထားရသော မြန်မာရွှေ့ပြောင်းလုပ် သားများနှင့်ပတ်သက်ပြီး မြိတ်မြို့နယ် ပကဖ မှ တာဝန်ရှိသူတစ်ဦးက လူထုနွေဦးသို့ ပြောသည်။
Public Service Announcement
သတိပေးစာပါ ခရိုနီလုပ်ငန်းရှင်ဟုဆိုသော သီ တာအုပ်စု၊ ငွေဇင်ယော်အုပ်စု၊ ထူးထူးတိုးအုပ်စု၊ ကိုဝေလင်းအုပ်စု စသူတို့သည် စစ်ကောင်စီ၏ ချောဆွဲခံရခြင်းကြောင့် ယခုကဲ့သို့ စစ်မှုထမ်းစု ဆောင်းခံရသူများကို ပို့ဆောင်ပေးနေခြင်းနှင့် ၎င်းတို့ကိုယ်တိုင် စစ်ကောင်စီနှင့် တက်တက်ကြွကြွ ပူးပေါင်းပါဝင်နေခြင်း ဟုတ်၊မဟုတ်ဆိုသည်တို့ကို တိတိကျကျ မသိရသေးဟု ပကဖ တာဝန် ရှိသူက ဆက်ပြောသည်။
လက်ရှိတွင် အဆိုပါ လုပ်ငန်းရှင်အုပ်စုသည် ထိုင်းအာဏာပိုင်များက စစ်ကောင်စီနှင့်ချိတ်ဘဆက်၍ ရနောင်းမှတဆင့် ကော့သောင်းမြို့သို့ ဖမ်းဆီးခံ မြန်မာနိုင်ငံသားများအားပြန်ပို့လျှက်ရှိရာယင်းလုပ်ငန်းရှင်များသည် ဖမ်းဆီးပြန်ပို့ခံရသူများကို ကော့သောင်းမှတဆင့် မြိတ်မြို့သို့လည်းကောင်း၊ ကျွန်းစုရေတပ်သို့လည်းကောင်း၊ ပလောက်တန်းမြင့်လေ့ကျင့်ရေးကျောင်းသို့လည်းကောင်း အသုတ်ခွဲကာ ပို့ဆောင်ပေးနေခြင်းဖြစ်ကြောင်း သတိပေးစာတွင် ဖော်ပြသည်။
“သတိပေးစာမှာ ရေးထားသလို စစ်ကောင်စီခိုင်းတာကိုမလုပ်ဘဲ မပူးပေါင်းဘဲရှောင်ကျဉ်ဖို့နဲ့ မလိုက်နာရင် ထိရောက်တဲ့အရေးယူမှုတွေ ခံရမှာဖြစ်တယ်”ဟု မြိတ်မြို့နယ် ပကဖ မှတာဝန်ရှိသူက စစ်ကောင်စီနှင့်ပူးပေါင်းနေသည့်လုပ်ငန်းရှင်များနှင့်စပ်လျဥ်းပြီး မှတ်ချက်ပေးသည်။
ပကဖ ထုတ်ပြန်သည့် သတိပေးစာတွင်လည်း စစ်ကောင်စီနှင့်ပေါင်း၍ စစ်မှုထမ်းအားကောင်စေရေး လိုက်ပါလုပ်ဆောင်နေသော ခရိုနီလုပ် ငန်းရှင်များအနေဖြင့် စစ်ကောင်စီအလိုကျ ဆက်လက်လုပ်ကိုင်ခြင်းမပြုကြရန် ယခုစာထုတ်ချိန်မှစ၍ တားမြစ်လိုက်ပြီး လိုက်နာခြင်းမရှိပါကပြင်းပြင်းထန်ထန်အရေးယူသွားမည်ဟု ဖော်ပြထားသည်။
