ဇွန် – ၈ ၊၂၀၂၆ ၊နိုင်ပကောင်း/People’s Spring
အာဏာသိမ်းသစ်တပ်က ကရင်ပြည်နယ်၊ဘားအံမြို့နယ်ကသံလွင်မြစ်ကြောင်းမှာမြစ်တွင်းသွား တိုက်ရေယာဉ်တစ်စီးစစ်ရေးလေ့ကျင့်သွားမယ်လို့ကရင်စစ်ရေးသတင်းရင်းမြစ်အချို့ကပြောပါတယ်။
ဇွန်လ ၁၀ ရက်မှာမြစ်တွင်းသွာတိုက်ရေယာဉ် အာဏာသိမ်းစစ်တပ်ရဲ့အမှတ် (၃၀၃) စစ်ရေယာဉ်ကရေပြင်ပစ်မှတ်တွေကို ပစ်ခတ်လေ့ကျင့်မယ်လို့ဆိုပါတယ်။
အဲဒီစစ်ရေယာဉ်ဟာသံလွင်မြစ်အတွင်းစစ်ဆင်ရေး၊လုံခြုံရေးနဲ့ မြစ် ကြောင်းပိတ်ဆို့ရေးတာဝန်ယူရတာဖြစ်ပြီးတနင်္သာရီတိုင်း ၊ရေဖြူမြို့နယ်၊ ကံပေါက်ဒေသ၊အုန်းပင်ကွင်းကျေးရွာအုပ်စုမှာအခြေစိုက်တဲ့မောရ၀တီရေတပ်စခန်းဌာနချုပ်၊ အမှတ်(၄၆) စစ်ရေယာဉ်စုကွပ်ကဲမှုအောက်မှာရှိတာပါ။
Public Service Announcement
ဇွန် ၁၀ ရက်နေ့မှာဘားအံမြို့နယ်၊ သံလွင်မြစ်ကြောင်းအတွင်း၊ ကော့လှိုက်ကျွန်းအနီးမှာရေပြင်ပစ်မှတ်ပြုလုပ်ပြီးလက်နက်ကြီးတွေလေ့ကျင့်ပစ် ခတ်ဖို့စီစဉ်ထားတာကြောင့်အဲဒီနေ့ရက်မှာစစ်ရေးလေ့ကျင့်မယ့်ဧရိယာရဲ့ သုံးမိုင်ပတ်လည်အတွင်းလူနဲ့ငါးဖမ်းရေယာဉ်တွေ၊လှေတွေ မဝင်လာစေဖို့အတွက်စစ်ရေယာဉ်မှုးကမြို့နယ်ထွေအုပ်ကတဆင့် ကျေးရွာအုပ်ချုပ်ရေးမှုးတွေထံကြိုတင်အသိပေးထားတယ်လို့သိရပါတယ်။
အခုလိုစစ်ရေးလေ့ကျင့်တာကဒေသတွင်းမှာစစ်တပ်ရဲ့စစ်ရေးလှုပ်ရှားမှုတွေရှိလာနိုင်ပြီး ပုံမှန်လေ့ကျင့်ရေးထက် KNU နဲ့ ကရင်လက်နက်ကိုင်တပ်တွေအပေါ် စစ်ရေးအရခြိမ်းခြောက်တာမျိုးလည်း ဖြစ်နိုင်တယ်လို့ ရေတပ်သားဟောင်းတစ်ဦးနဲ့ ကရင်သတင်းရင်းမြစ်တစ်ဦးက ဆိုပါတယ်။
“မြစ်ကြောင်းတလျှောက်မှာတပ်စခန်းတွေရှိတယ်၊ ကရင်အဖွဲ့အစည်းတွေရဲ့ထိန်းချုပ်နယ်မြေတွေ၊ ရွာတွေရှိတယ်၊အုပ်ချုပ်ထောက်ပံ့အတွက်ပဲဖြစ် ဖြစ် စစ်ဆင်ရေးအတွက်ပဲဖြစ်ဖြစ် မြစ်ကြောင်းကို ပိုင်ထားတဲ့သူက ပိုအသာစီးယူနိုင်တဲ့အတွက် သူတို့လေ့ကျင့်ပြန်လုပ်တာပေါ့” လို့ အဲဒီကရင်သတင်းရင်းမြစ်က ပြောပါတယ်။
သံလွင်မြစ်မှာရေတပ်ရဲ့လက်နက်ကြီးလေ့ကျင့်ပစ်ခတ်မှုဟာမြေပြင်တပ်နဲ့ ရေတပ်အချိတ်ဆက်မိမိ စစ်ဆင်ရေးလှုပ်ရှားနိုင်အောင် ဖြစ်သလို ဒေသတွင်းမှာ စစ်ရေးလှုပ်ရှားဆောင်ရွက်ဖို့လည်း ရှိနိုင်တယ်လို့ ကရင်သတင်းရင်းမြစ်က သုံးသပ်ထားပါတယ်။
ဘားအံမြို့နယ်၊သံလွင်မြစ်ကြောင်းအတွင်းမှာအရင်က စစ်တပ်ရဲ့ရေတပ်ကလက်နက်ကြီးလေ့ကျင့်ပစ်ခတ်မှုတွေ လုပ်ဆောင်ခဲ့တာတွေ ရှိခဲ့ပေမယ့် ဒီနှစ်နောက်ပိုင်းမှာတော့ လေ့ကျင့်မှုတွေ မလုပ်ဖြစ်တော့တာ ကြာပြီလို့ ဒေသခံတွေက ပြောပါတယ်။
စစ်ကောင်စီရေတပ်ရဲ့လက်နက်ကြီးလေ့ကျင့်ပစ်ခတ်မှုဟာမြစ်ထဲမှာ ပစ်မှတ်လုပ်ကာအဲဒီပစ်မှတ်ကိုတိုက်ရေယာဉ်ကကျည်အစစ်နဲ့ပစ်ခတ်တာ ဖြစ်ပါတယ်။
တိုက်ရေယာဉ်နဲ့ လက်နက်ကြီးလေ့ကျင့်ပစ်ခတ်မယ့်နေရာဒေသဟာ KNU တပ်မဟာ (၁) ထိန်းချုပ်တဲ့ ဒေသတွေနဲ့ နီးစပ်နေတာပါ။
လက်ရှိဖာပွန်ထိုးစစ်အတွင်းစစ်တပ် ရေကြောင်းဖြစ်တဲ့ သံလွင်မြစ်ကနေ တိုက်ရေယာဉ်နဲ့ ထောက်ပံ့ပို့ဆောင်ရေး၊ စစ်ရေးလှုပ်ရှားတာတွေ မရှိသေးပေမယ့်လှိုင်းဘွဲမြို့နယ်၊ မြိုင်ကြီးငူဒေသကနေ ဖာပွန်မြို့နယ်၊ ကမောင်းဗျူဟာဆီသံလွင်မြစ်ကနေစက်လှေတွေနဲ့ ကူးပြီးစစ်ရေးအင်အားဖြည့် ဆည်းမှုတွေတော့ ရှိနေပါတယ်။
