Connect with us

Hi, what are you looking for?

LuduNwayOo

နိုင်ငံတကာ

တရုတ် စစ်လေယာဉ်တွေကြောင့် အလုပ်ရှုပ်သွားတဲ့ မလေးရှားလေတပ်

တရုတ် စစ်လေယာဉ်တွေ ချဉ်းကပ်လာမှုကြောင့် မလေးရှားက တိုက်လေယာဉ်တွေ အရေးပေါ် ပျံတက်စေပြီး လုံခြုံရေး စောင့်ကြပ်ခဲ့ရကြောင်း သိရပါတယ်။

မလေးရှား နိုင်ငံခြားရေး ဝန်ကြီးဌာနက ဇွန်လ ၂ ရက်မှာ တရုတ် သံအရာရှိတွေကို ဆင့်ခေါ်ပြီး ဒီဖြစ်ရပ်အတွက် ဖြေရှင်းချက် တောင်းဆိုသွားမယ်လို့ ပြောပါတယ်။ တရုတ် ပြည်သူ့လွတ်မြောက်ရေး တပ်ရဲ့ လေယာဉ် ၁၆ စီးဟာ တောင်တရုတ် ပင်လယ်ထဲက မလေးရှားရဲ့ အထူးစီးပွားရေးဇုန် သတ်မှတ် ဧရိယာနားထိ ချဉ်းကပ်ခဲ့တာလို့ ဆိုပါတယ။

ဘော်နီယို ကျွန်းဖက်ကို လေယာဉ်တွေ အုပ်စုဖွဲ့ ပျံသန်းလာတဲ့ မသင်္ကာစရာ လှုပ်ရှားမှုမျိုးကို မလေးရှား လေတပ်က ဇွန်လ ၁ ရက်မှာ ထောက်လှမ်း တွေ့ရှိခဲ့တဲ့နောက် ချက်ချင်း လိုအပ်သလို အရေးယူ တုံ့ပြန် ဆောင်ရွက်ခဲ့တာပါ။ တရုတ် လေယာဉ်တွေဟာ မလေးရှားရဲ့ ဆာရာဝက်ခ် ပြည်နယ်ကမ်းလွန် ရေမိုင် ၆၀ နားလောက်ထိ ချဉ်းကပ်ခဲ့တယ်လို့ သိရပါတယ်။

တရုတ် လေယာဉ်တွေဟာ ဒေသခံ လေကြောင်းထိန်းသိမ်းရေး မျှော်စင်ကို အဆက်အသွယ် မလုပ်ခဲ့သလို မလေးရှားဖက်က အကြိမ်ကြိမ် စုံစမ်းမေးမြန်းမှုကိုလည်း မတုံ့ပြန်ခဲ့ပါဘူး။ ဒီလုပ်ရပ်မျိုးဟာ မလေးရှားရဲ့ အမျိုးသား လုံခြုံရေး ကဏ္ဍကိုရော၊ လေကြောင်း လုံခြုံရေး ကဏ္ဍကိုပါ အကြီးအကျယ် ခြိမ်းခြောက်ရာ ကျနေတယ်လို့ မလေးရှား လေတပ်က ဝေဖန်ခဲ့ပါတယ်။

မလေးရှား နိုင်ငံခြားရေး ဝန်ကြီး ဟီရှမ်မူဒင် ဟူစိန်က အခုဖြစ်ရပ်အပေါ် သံတမန် နည်းလမ်းအရ အရေးဆိုသွားမယ်လို့ အတည်ပြုခဲ့ပါတယ်။ မလေးရှားရဲ့ နိုင်ငံခြားရေး မူဝါဒက ရိုးရှင်းကြောင်း၊ နိုင်ငံရဲ့ အချုပ်အခြာ အာဏာကို မထိပါးတဲ့ ဘယ်နိုင်ငံကိုမဆို မိတ်ဆွေအဖြစ် သဘောထားမှာဖြစ်ကြောင်း သူက ဆိုပါတယ်။ အစောပိုင်းမှာ တရုတ်သံရုံးက ကြေညာချက်တစ်စောင် ထုတ်ပြန်ခဲ့ရာမှာတော့ တရုတ် စစ်လေယာဉ်တွေဟာ နိုင်ငံတကာ သတ်မှတ် စည်းမျဉ်းတွေနဲ့အညီ ပျံသန်းခဲ့တယ်လို့ ဖော်ပြထားပါတယ်။

တရုတ်ဟာ တောင်တရုတ်ပင်လယ်ပြင် ဧရိယာ တစ်ခုလုံးကို ပိုင်နယ် နက်မြေအဖြစ် သတ်မှတ်လိုတာကြောင့် မလေးရှား အပါအဝင် ဒေသတွင်း နိုင်ငံတွေနဲ့ ရေပိုင်နက် အငြင်းပွားမှု ပြဿနာတွေ ပေါ်ပေါက်နေပါတယ်။

You May Also Like

နိုင်ငံတကာ

ဆန္ဒပြသူတွေဟာ တရုတ်ရဲ့ တင်းကျပ်တဲ့ ဥပဒေတွေကို ရှောင်လွှဲဖို့အတွက် ဘာစာသားမှ ရေးမထားတဲ့ စာရွက်ဖြူ အလွတ်တွေကို ကိုင်ဆောင်လာကြပါတယ်။

သတင်း

ယမန်နေ့ တိုက်ခိုက်ခံရမှုကြောင့် လေယာဥ်ထိခိုက်ပျက်စီးမှု၊ စစ်ကောင်စီတပ်သားသေဆုံးမှုရှိသည်ဟု သတင်းရေးသားဖော်ပြမှုများကိုတွေ့ရသော်လည်း ယင်းအခြေအနေအပေါ် သီးခြားအတည်မပြုနိုင်ပေ။

နိုင်ငံတကာ

မြောက်ကိုရီးယားဟာ ပြီးခဲ့တဲ့ လတုန်းကလည်း နှစ်နိုင်ငံ နယ်ခြားမျဉ်းနားကို စစ်လေယာဉ် ၁၀ စီးလောက် ချဉ်းကပ် ပျံသန်းစေခဲ့တဲ့အတွက် တောင်ကိုရီးယား လေတပ်က တိုက်လေယာဉ်တွေ အရေးပေါ် ပျံတက်ပြီး စောင့်ကြည့်စေခဲ့ရဖူးကြောင်း သိရပါတယ်။

သတင်း

မြန်မာစစ်တပ်ကို အိန္ဒိယ၊ တရုတ်နဲ့ ရုရှားတို့က ဝိုင်းကူနေသလိုပဲ မြန်မာ့ ဒီမိုကရေစီရေး အင်အားစုတွေကိုလည်း နိုင်ငံတကာ အသိုက်အဝန်းက ဝိုင်းဝန်း ကူညီကြဖို့ အဲဒီ ဥပဒေပြု အမတ်တွေ အစုအဖွဲ့က ဆော်ဩခဲ့ပါတယ်။