ပူတင်ဟာ စစ်ရာဇဝတ်မှုတွေ ကျူးလွန်နေတယ်လို့ ဗြိတိန် ဝန်ကြီးချုပ် စွပ်စွဲ

ရုရှား သမ္မတ ဗလာဒီမာ ပူတင်ဟာ ယူကရိန်းမှာ စစ်ရာဇဝတ်မှုတွေ ကျူးလွန်နေပြီလို့ ဗြိတိန် ဝန်ကြီးချုပ် ဘောရစ်ဂျွန်ဆန်က ဝေဖန် စွပ်စွဲသွားခဲ့ပါတယ်။

ပူတင်ရဲ့ ညွှန်ကြားချက်အရ ရုရှားစစ်တပ်က အပြစ်မဲ့ ယူကရိန်း ပြည်သူတွေကို ဗုံးကြဲနေကတည်းက စစ်ရာဇဝတ်မှုတွေဆိုတာ ရုပ်လုံးပေါ်နေပြီလို့ ဂျွန်ဆန်က ဆိုပါတယ်။ စကော့ အမျိုးသား ပါတီအမတ် အီယန် ဘလက်ဖို့ဒ်က ပူတင်ကို တရားစွဲဆိုသင့်ကြောင်း အဆိုပြုချက်နဲ့ ပတ်သက်ပြီး ဂျွန်ဆန်က အခုလို တုံ့ပြန်ခဲ့တာပါ။

ဒီအတောအတွင်း နိုင်ငံတကာ ရာဇဝတ်ခုံရုံးရဲ့ ရှေ့နေ ကာရင်မ်ခန်းက သူဟာ ယူကရိန်း စစ်ပွဲအတွင်း စစ်ရာဇဝတ်မှုနဲ့ လူသားမျိုးနွယ်စုအပေါ် ကျူးလွန်တဲ့ ရာဇဝတ်မှုတွေ ရှိမရှိ ဆန်းစစ် စုံစမ်းသွားမယ်လို့ အတည်ပြုခဲ့ပါတယ်။

အစောပိုင်းမှာ ယူကရိန်း သမ္မတ ဗိုလိုဒီမာ ဇီလန်စကီး ကိုယ်တိုင်ကလည်း ခါကစ်ဗ်မြို့က လေကြောင်း တိုက်ခိုက်မှုတွေမှာ ရုရှားဟာ စစ်ရာဇဝတ်မှုတွေ ကျူးလွန်ခဲ့ကြောင်း ထုတ်ဖော် စွပ်စွဲခဲ့ပါတယ်။ ယူကရိန်း အစိုးရက ရုရှားဟာ ပိတ်ပင်ထားတဲ့ စစ်လက်နက်တွေကိုပါ အသုံးပြုခဲ့တယ်လို့ ပြောကြားထားပါသေးတယ်။

Public Service Announcement

ဗြိတိန် ဝန်ကြီးချုပ် ဂျွန်ဆန်က ရုရှားစစ်တပ်ဟာ ယူကရိန်းက မြို့ကြီးတွေကို ဝန်းရံပိတ်ဆို့ပြီး ရိက္ခာ ဖြတ်တောက်ဖို့ ကြိုးစားနေကြောင်း၊ ဒီနည်းဗျူဟာ လူမဆန်ဘဲ ရက်စက် ကြမ်းကြုတ်လွန်းကြောင်း ဝေဖန်ခဲ့ပါတယ်။

ရုရှားဟာ ပြီးခဲ့တဲ့ သီတင်းပတ်ကစလို့ ယူကရိန်းနိုင်ငံ မြောက်ပိုင်း၊ တောင်ပိုင်းနဲ့ အရှေ့ပိုင်းတွေကနေ တပြိုင်တည်း ထိုးစစ်ဆင် တိုက်ခိုက်ခဲ့ပါတယ်။ လတ်တလောမှာ ယူကရိန်းရဲ့ မြို့တော် ကိယက်ဗ်ကို မိုင် ၄၀ လောက်ထိ ရှည်လျားတဲ့ ရုရှား စစ်ယာဉ်တန်းကြီး ချီတက်သွားပေမယ့် အားကောင်းတဲ့ ခုခံမှုတွေကြောင့် ရှေ့ကို သိပ်မတိုးနိုင်ဘဲ ဖြစ်နေတယ်လို့လည်း သိရပါတယ်။