နိုင်ပကောင်း/People’s Spring
ကရင်ပြည်နယ်၊ ဖာပွန် – ကမမောင်း ကားလမ်းပေါ်က စစ်ကောင်စီတပ်ရဲ့ ဆင်စွယ်စခန်းနဲ့တောင်သုံးလုံးစခန်း တွေကို KNU တပ်မဟာ (၅) ပူးပေါင်းတပ်က သိမ်းယူလိုက်ပြီလို့ တပ်မဟာ (၅) ရဲ့ ပြောရေးဆိုခွင့်ရှိသူ ဗိုလ်မှုးကြီးစောကလယ်ဒိုက ဒီနေ့ ဒီဇင်ဘာလ ၁၁ ရက်မှာ အတည်ပြုပါတယ်။
ကတိုင်တိဒေသမှာ ရှိတဲ့ ဆင်စွယ်စခန်းနဲ့ တောင်သုံးလုံးစခန်း ကို ပြီးခဲ့တဲ့ ရက်ပိုင်း ဒီဇင်ဘာလ ၇ ရက်နဲ့ ဒီဇင်ဘာလ ၁၀ ရက်တို့မှာ KNU က သိမ်းယူခဲ့တာပါ။
စခန်းသိမ်းတိုက်ပွဲမှာ လက်နက်ခဲယမ်းအချို့လည်းသိမ်းဆည်းရမိတယ်လို့သိရပါတယ်။
Public Service Announcement
ဖာပွန်ခရိုင်ထဲက ဆယ်စုနှစ်နဲ့ချီပြီး နေရာယူတပ်စွဲထားတဲ့စစ်တပ်စခန်းတွေဖြစ်တဲ့ ကူးဆိပ် ၊ မထောတပ်စခန်း တွေကို သိမ်းပြီးနောက် အဲဒီစခန်းတွေကို အောက်ဘက်မှာရှိတဲ့ တောင်သုံးလုံးနဲ့ဆင်စွယ်စခန်းတွေကိုKNU က ဆက်လက် တိုက်ခိုက်သိမ်းယူခဲ့တာပါ။
KNU က သိမ်းယူလိုက်တဲ့ တောင်သုံးလုံး၊ ဆင်စွယ်စခန်းတွေက ဖာပွန် – ကမမောင်း ကားလမ်းကိုစိုးမိုးထားတဲ့ စခန်းတွေ ဖြစ်ပါတယ်။
အဲဒီကားလမ်းကိုသုံးပြီး ဖာပွန်ဆီ စစ်ကောင်စီတပ်က ကမမောင်း ဒေသကနေ စစ်ကူတက်ရာမှာ သုံးလေ့ ရှိတယ်လို့သိရပါတယ်။
ဖာပွန်မြို့ကိုတော့ KNU တပ်မဟာ (၅)က ထိန်းချုပ်ထားပြီး ဖာပွန်မြို့ပြင်က အခြေချ စစ်ဗျုဟာကိုလည်း လနဲ့ချီ ပြီး ဝန်းရံပိတ်ဆို့ထားပါတယ်။
KNU ရဲ့ ပိတ်ဆို့ ဖြတ်တောက်တိုက်ခိုက်မှုတွေကြောင့် စစ်ကောင်စီတပ်က မြေပြင်ကနေ ဖာပွန်ဆီ စစ်ကူပို့ဖို့ ခက်ခဲလာသလို ၊ ရိက္ခာ ၊ ခဲယမ်းတွေကိုလည်း လေကြောင်းကနေ ချပေးနေရတဲ့အခြေအနေဖြစ်နေတယ်လို့ KNU တပ်မဟာ (၅) ပြောရေးဆိုခွင့်ရှိသူ ဗိုလ်မှုးကြီး စောကလယ်ဒိုက ပြောထားပါတယ်။
