တရုတ်အစိုးရ၏ တိုက်တွန်းမှုဖြင့် တရုတ်နိုင်ငံ၊ ကူမင်းမြို့တွင် တအာင်းတပ်မတော်(TNLA) နှင့် စစ်ကောင်စီ တွေ့ဆုံဆွေးနွေးနေစဉ် TNLA ထိန်းချုပ်ရာဒေသ နမ္မတူ – ကွတ်ခိုင်မြို့နယ်အစပ်ကို စစ်ကောင်စီက ယနေ့(ဖေဖော်ဝါရီ ၁၇ရက်) ညပိုင်း၌ လေကြောင်းမှ ဗုံးကြဲတိုက်ခိုက်ခဲ့သည်။
ယနေ့ (ဖေဖော်ဝါရီ ၁၇ရက်) ည ၈နာရီခွဲခန့်တွင် စစ်ကောင်စီက ဂျက်ဖိုက်တာဖြင့် ဗုံးနှစ်လုံးကြဲခြင်းဟု ရှမ်းမြောက်ဒေသခံတစ်ဦးက ပြောသည်။
ဗုံးကြဲတိုက်ခိုက်မှုကြောင့် မြေပြင်ထိခိုက်မှုအခြေအနေကို မသိရှိရသေးပေ။
Public Service Announcement
TNLA နှင့်စစ်ကောင်စီသည် ကူမင်းမြို့တွင် ဖေဖော်ဝါရီ ၁၆ရက်ကစ၍ တွေ့ဆုံဆွေးနွေးနေကြသည်။
မဆွေးနွေးမီ ဖေဖော်ဝါရီ ၁၅ရက်ကလည်း TNLA ထိန်းချုပ်ထားသည့် နောင်ချိုမြို့နယ်ကို စစ်ကောင်စီက လေကြောင်းနှင့် လက်နက်ကြီးအသုံးပြုပြီး ဗုံးအလုံးရေ ၂၀၀နီးပါး ကြဲချတိုက်ခိုက်ခဲ့သေးသည်။
ထို့အပြင် ယမန်နေ့ညကလည်း ကွတ်ခိုင်မြို့ကို လေကြောင်းတိုက်ခိုက်ခံရမည်ဟူသော သတင်းများထွက်ပေါ်ခဲ့ပြီး မြို့ပေါ်မှဒေသခံများသည် အခြားနေရာများသို့ ညတွင်းချင်း တိမ်းရှောင်ခဲ့ကြရသည်။
ဆွေးနွေးပွဲရလာဒ်အသေးစိတ်မသိရှိရသေးသော်လည်း အဆင်ပြေမှုမရှိကြောင်း ရှမ်းပြည်နယ်မြောက်ပိုင်းမှ သတင်းရင်းမြစ်တစ်ဦးက ပြောသည်။
” ဆွေးနွေးပွဲ အဆင်မပြေဘူးကြားတယ်။ မိန်းမလိုမိန်းမရစိတ်နဲ့ ဒီကောင်တွေ(စစ်ကောင်စီ) လာပစ်နိုင်တယ်။ တချက်မှ ပေါ့လို့ မရဘူး”ဟု ရှမ်းမြောက်ဒေသခံတစ်ဦးက ပြောသည်။
တရုတ်အစိုးရ၏ တိုက်တွန်းမှုဖြင့် ပြုလုပ်မည့် ကူမင်းဆွေးနွေးပွဲတွင် စစ်ကောင်စီက အထက်စီးမှနေ၍ ဆွေးနွေးနိုင်သလို TNLA ထိန်းချုပ်ဒေသများကိုလည်း တိုက်ခိုက်မှုများပိုမိုပြုလုပ်နေသည်ဟု TNLA အတွင်းရေးမှူးချုပ်ဗိုလ်ချုပ်တာဖုန်းကျော်က ရေးသားထားသည်။
TNLAသည် ၁၀၂၇ စစ်ဆင်ရေးအတွင်း ရှမ်းပြည်နယ်မြောက်ပိုင်းရှိ နမ့်ခမ်း၊ ကွတ်ခိုင်၊ နမ္မတူ၊ မိုင်းငေါ့၊ မိုင်းလုံ၊ နမ့်ဆန်၊ မန်တုံ၊ကျောက်မဲ၊ နောင်ချို၊မိုးမိတ်နှင့် သီပေါမြို့နယ်၊မန္တလေးတိုင်းမှ မိုးကုတ်မြို့နယ်တို့ကို သိမ်းယူထားသည်။
ယနေ့ညပိုင်းတွင် လေကြောင်းအန္တရာယ်သတိပြုကြရန် တော်လှန်ရေးအင်အားစုများနှင့် ဒေသခံများက လူမှုကွန်ရက်မှတစ်ဆင့် သတိပေးနေကြသည်။
