ဇူလိုင်-၂၁၊၂၀၂၅။ကဖေး/People’s Spring
၁၀၂၇ စစ်ဆင်ရေးနှင့်အတူ သိမ်းယူခဲ့သည့် မြို့များအနက် ပန်ဆိုင်းနှင့် မုန်းကိုးမြို့မှဌာနဆိုင်ရာရုံများတွင် MNDAAက ၎င်းတို့၏ အလံကိုဖြုတ်ချပြီး စစ်ကောင်စီအသုံးပြုနေသည့်အလံလွှင့်ထူခွင့်ပြုထားကြောင်း သတင်းထွက်ပေါ်နေသည်။
“ပန်ဆိုင်းမှာဆိုရက်နည်းနည်းကြာပြီ။ စစ်ကောင်စီအလံလွှင့်ထားတယ်။လားရှိူးကိုစစ်ကောင်စီဝင်အပြီးသိပ်မကြာဘူးပန်ဆိုင်းမှာလည်းစကစအလံတင်တာ” ဟု တရုတ်နိုင်ငံနှင့် နယ်စပ်ဖြစ်သော ပန်ဆိုင်းမြို့မှ ဒေသခံတဦးကပြောသည်။
မုန်းကိုးမြို့တွင်လည်းဌာနဆိုင်ရာအဆောက်အဦးများတွင် စစ်ကောင်စီအသုံးပြုနေသည့် ၂၀၀၈ ဖွဲ့စည်းပုံအခြေခံဥပဒေကသတ်မှတ်ထားသောဝါစိမ်းနီ သုံးရောင်စပ် ကြယ် တစ်ပွင့်ပုံပါအလံ လွှင့်ထူထားကြောင်း ဇူလိုင်လ ၂၀ရက်မှစ၍သတင်းထွက်ပေါ်ခဲ့သည်။
Public Service Announcement
ဒေသခံများထံ ဆက်သွယ်မေးမြန်းရန်ကြိုးစားသော်လည်း ဖုန်းလိုင်းအခက်အခဲများကြောင့် အသေးစိတ်မသိရှိရသေးပေ။ MNDAAက လားရှ်ိုးမြို့ကို ထိန်းချုပ်ခဲ့စဉ်က လားရှိုးမြို့ပြန်လည်ထူထောင်ရေးအဖွဲ့မှ အဖွဲ့ဝင်တာဝန်ထမ်းဆောင်ခဲ့တစ်ဦးကမူ မုံးကိုးမြို့တွင် စစ်ကောင်စီအလံလွှင့်ထူထားကြောင်းဟုတ် ၊မဟုတ် မြို့တွင်နေထိုင်သူအားမေးမြန်းသောအခါ မဟုတ်မှန်ဟုဖြေကြားကြောင်း လူမှုကွန်ရက်တွင်ရေးသားထားသည်။
မုံးကိုးနှင့် ပန်ဆိုင်းမြို့သည် မူဆယ်မြို့နယ်တွင်ပါဝင်ပြီး ၁၀၂၇ စစ်ဆင်ရေးတွင် MNDAA က သိမ်းယူခဲ့သည့် မြို့များတွင်ပါဝင်သည်။MNDAA သည် ၁၀၂၇ စစ်ဆင်ရေးအတွင်း ရှမ်းပြည်နယ်မြောက်ပိုင်းမှ လားရှိုး၊ လောက်ကိုင်၊ ချင်းရွှေဟော်၊ ကုန်းကြမ်း၊ ပန်လုံ၊ ကွမ်းလုံ၊ သန္ဓီ၊ တာမိုးညဲ၊ ပန်ဆိုင်း၊မုန်းကိုးနှင့်ဖောင်းဆိုင်မြို့ စုစုပေါင်း ၁၁ မြို့ကို သိမ်းယူခဲ့သည်။
စစ်ကောင်စီ နှင့် အပစ်ရပ်ရန် တရုတ်အစိုးရက ဖိအားပေးပြီးနောက် MNDAAက အပစ်ရပ်ခဲ့သလို ပြီးခဲ့သည့် ဧပြီလတွင် လားရှ်ိုးမြို့ပေါ် ရပ်ကွက်(၁၂)ခုအား စစ်ကောင်စီထံပြန်လည်ပေးအပ်ခဲ့သည်။ယခုအခါစစ်ကောင်စီကလားရှိုးမြို့၌ အုပ်ချုပ်ရေး ယန္တရားလည်ပတ်နေသလို သိန္နီမြို့ကိုပါ ပြန်ပေးရေးနှင့် လားရှိုး-သီပေါနယ်စပ်ရှိ MNDAA တပ်ရင်းများမှ ပြန်ဆုတ်ခွာပေးရေး ထပ်မံတောင်းဆိုနေသည်ဟု သတင်းများထွက်ပေါ်နေသည်။
MNDAAသည် လားရှိုးမြို့ကိုသိမ်းယူစဉ်က ပြည်သူလူထုဆန္ဒအတိုင်း စစ်အာဏာရှင်ပြုတ်ကျသည့်အထိတိုက်ခိုက်သွားမည်ဟုထုတ်ပြန်ခဲ့သည်။သို့သော် တရုတ်အစိုးရ၏ အစီအစဉ်ဖြင့် လားရှိုးမြို့ကို ၂၀၂၅ ဧပြီလတွင် ကျည်တစ်ချက်မဖောက်ရဘဲ စစ်ကောင်စီလက်ထဲ ပြန်အပ်သည့်ဖြစ်စဉ်အပါအဝင် လားရှိုးမြို့အရေးနှင့်ပတ်သက်၍ သတင်းထုတ်ပြန်ခြင်းမရှိတော့ပေ။ ၁၀၂၇ စစ်ဆင်ရေးကာလတွင် MNDAA ကသတင်းဌာနများသို့ အဖွဲ့ပြန်ကြားရေးတာဝန်ခံကဖြေကြားပေးသော်လည်း လားရှိုးမြို့သိမ်းပြီးနောက်ပိုင် ၂၀၂၄ နှစ်ကုန်ပိုင်းမှစ၍ မဖြေကြားတာ့ပေ။
ထို့အပြင်သိန္နီမြို့ကိုစစ်ကောင်စီထံပြန်လည်လည်းပြောင်းပေးမည်ဟူသော သတင်းများ ဇူလိုင်လဆန်းပိုင်းမှစ၍ ထွက်ပေါ်နေပြီး ဒေသခံများအကြားစိုးရိမ်မှုများရှိနေသည်။ အဆိုပါသတင်းကို MNDAAက ရှင်းလင်း အသိပေးခြင်းမရှိသေးပေ။
သို့သော်လည်းသိန္နီမြို့မှဆိုင်းဘုတ်များကို တရုတ်ဘာသာဖြင့်သာ ရေးရမည်ဟု သတင်းထွက်ပေါ်နေပြီး ထိုသတင်းမှာ မှားယွင်းကြောင်း MNDAA ၏ သတင်းများဦးစားပေးဖော်ပြနေသော The Kokang က ဇူလိုင်၂၁ရက်၌ ဖော်ပြသည်။
MNDAA ထိန်းချုပ်ဒေသများမှ မြို့နယ်များတွင်လုပ်ငန်းဆိုင်းဘုတ်များ၊ ကြေညာချက်များ နှင့် အုပ်ချုပ်ရေးဌာနဆိုင်ရာဆိုင်းဘုတ်များကိုမြန်မာ၊တရုတ် နှစ်ဘာသာဖြင့်ရေးသားရမည်ဟု သတိပေးကြေညာထားကြောင်း MNDAA၏ သတင်းထုတ်ပြန်ရေးစာမျက်မှာ The Kokang News တွင် ဖော်ပြထားသည်။
“အရင်ကဒီဖက်လောက်ကိုင်၊ကွမ်းလုံ နှင့် ချင်းရွှေဟော် စတဲ့မြို့တွေမှာ တရုတ်စာနဲ့ဘဲဆိုင်းဘုတ်တွေတင်ကြတာများပါတယ်။ အခုမိမိတို့MNTJP/MNDAAအုပ်ချုပ်တဲ့အထူးဒေသ(၁)ဟာတိုင်းရင်းသားလူမျိုးပေါင်းစုံ စုပေါင်း နေထိုင်တဲ့ဒေသဖြစ်သည့်အတွက် ဆိုင်းဘုတ်တွေ၊ကြော်ငြာစာတွေမှာ မြန်မာစာပါထည့်သွင်း ရေးသားရမယ်ဆိုပြီး သတ်မှတ်ခဲ့တာဖြစ်ပါတယ်။ လက်တလောပိုင်းတွင် သိန္နီမြို့မှာဆိုင်းဘုတ်တွေ ကို တရုတ်လိုဘဲရေးရမယ်ဆိုပြီးသတင်းထွက်နေတာကြားမိပါတယ်။တကယ်တော့ အဲ့လိုမဟုတ် ပါဘူး။အထူးဒေသ(၁)တစ်ခုလုံးမှာ မိမိတို့MNTJP/MNDAAတပ်ဖွဲ့ဝင်တွေ၊ကိုးကန့်လူမျိုးတွေက ကျယ်ပြန့်စွာတပ်ဖြန့်၊နေထိုင်၊တာဝန်ထမ်းဆောင်နေရတဲ့အတွက်ကြောင့် ဒေသတစ်ခုလုံးမှာရှိတဲ့ ဆိုင်းဘုတ်တွေ၊ကြော်ငြာစာတွေကို မြန်မာ/တရုတ် နှစ်ဘာသာစလုံးနဲ့ရေးသားဖို့သတ်မှတ်လိုက်တာဖြစ်ပါတယ်”ဟု MNDAA တာဝန်ရှိသူတစ်ဦး၏ပြောဆိုချက်ကို The Kokang News ကဖော်ပြထားသည်။
လက်ရှိတွင်သိန္နီမြို့၌ တရုတ်နိုင်ငံသားလုပ်ငန်းရှင်အများအပြား ရောက်ရှိနေပြီး ဟိုတယ်လုပ်ငန်း၊ ဖျော်ဖြေရေးလုပ်ငန်းများ လုပ်ဆောင်နေသည်ကိုတွေ့ရသည်ဟု ဒေသခံတစ်ဦးကပြောသည်။
လားရှိူးမြို့ကို စစ်ကောင်စီထံပြန်လည်ပေးအပ်ခဲ့သည့် MNDAA၏ လုပ်ရပ်အပေါ် မြောက်ပိုင်းမဟာမိတ်ညီနောင်သုံးဖွဲ့ကြားတွင် အပြင်းအထန်ဝေဖန်ခံခဲ့ရကြောင်း စစ်ရေးသတင်းရင်းမြစ်အချို့က ပြောသည်။
ပြီးခဲ့သည့် ဧပြီ ၁၀ရက်ကကျရောက်သည့် အာရက္ခတပ်တော်(AA) တည်ထောင်ခြင်း(၁၆) နှစ်ပြည့်သို့MNDAAနှင့်TNLA တို့ကသဝဏ်လွှာပေးပို့ခဲ့ရာတွင်အခက်အခဲဖိအားပေါင်းစုံကို နည်းလမ်းပေါင်းစုံဖြင့် စုစည်းညီညွတ်စွာအတူတကွဖြတ်ကျော်ပြီး ၁၀၂၇ စစ်ဆင်ရေးစီမံချက်လှိုင်းလုံးများနှင့်အတူ တော်လှန်ရေးအောင်ပွဲရောက်ရှိသည်အထိ ခိုင်မာသောညီနောင်မဟာမိတ်စိတ်ဓာတ်ဖြင့် စည်းလုံးညီညွတ်ကြမည်ဟု ဖော်ပြခဲ့သည်။
လက်ရှိတွင် MNDAA က ပြည်သူလူထုအား ပွင့်ပွင့်လင်းလင်းအသိပေးခြင်းမရှိတော့သလိုစစ်ကောင်စီနှင့်အပစ်ရပ်ထားသည်။ AAက မြို့သိမ်းတိုက်ပွဲဆက်လက်တင်နွှဲနေသလို TNLAကလည်း စစ်ကောင်စီ၏ထိုးစစ်ကို ခုခံတိုက်ခိုက်နေသည်။
