တမူး၊နမ့်မွန်းတားရွာကို လာတိုက်သည့် စစ်တပ် ပိတ်ဆို့တိုက်ခိုက်ခံရပြီးဆုတ်ခွာထွက်ပြေး

သြဂုတ်-၆၊၂၀၂၅။အိမ်သွင်/People’s Spring

ပြည်သူ့ကာကွယ်ရေးတပ်ဖွဲ့များထိန်းချုပ်ထားသည့် စစ်ကိုင်းတိုင်း၊တမူးမြို့နယ်မှ နမ့်မွန်းတားရွာအား စစ်ကြောင်းထိုးသည့် စစ်ကောင်စီတပ်နှင့် ပျူ‌စောထီးပူးပေါင်းတပ် ပိတ်ဆို့တိုက်ခိုက်ခံရပြီး ပြန်လည်ဆုတ်ခွာထွက်ပြေးသွားသည်။

နမ့်မွန်းတားရွာတွင်ဩဂုတ်လ ၅ရက် နေ့လယ်မှစ၍တိုက်ပွဲဖြစ်ခဲ့ပြီး စစ်တပ်စစ်ကြောင်းသည် နာရီပေါင်းများစွာပိတ်ဆို့တိုက်ခိုက်ခံခဲ့ရပြီး ည ၁၀နာရီခန့်တွင်မှ ပြန်လည်ဆုတ်ခွာထွက် ပြေးသွားခြင်းဟု မြေပြင်သတင်းရင်းမြစ်ကပြောသည်။

“တိုက်ပွဲကတစ်နေ့ခင်းလုံးဖြစ်တယ်။။ ည၇နာရီလောက်မှာရွာက ဘုရားကျောင်းထဲကို ဝင်သွားတော့ PDFတွေက ဝိုင်းပိတ်တိုက်တာ။ စကစဘက်က သေတာတွေရှိတယ်။ ကိုယ့်ဘက့်(PDFဘက်)က လုံးဝအထိခိုက်မရှိဘူး”ဟု အဆိုပါသတင်းရင်းမြစ်ကပြောသည်။

Public Service Announcement

နမ့်မွန်းတားရွာသည်ကလေး-တမူးအာရှလမ်းပေါ်တွင်တည်ရှိပြီးတမူးမြို့ နှင့်၁၂မိုင်အကွာ၌ရှိသည်။

နမ့်မွန်းတားရွာနှင့် တမူးမြို့ကြား ပန်းသာရွာ၌ တပ်စွဲထားသည့်စစ်ကောင်စီတပ်က စစ်ကြောင်းထိုးလာခြင်းဖြစ်သည်။

ဇူလိုင်လ ၁၆ရက်ကလည်းပန်းသာရွာမှစစ်တပ်နှင့် ပျူစောထီးစစ်ကြောင်းက ခမိတ်ရွာကိုလာရောက်တိုက်ခိုက်ရာ တိုက်ပွဲပြင်းထန်ခဲ့သည်။

နမ့်မွန်းတားရွာတွင် ဖြစ်ပွားသောတိုက်ပွဲနှင့်ပတ်သက်၍ တမူးခရိုင် PDFတပ်ရင်းများက သတင်းထုတ်ပြန်ထားခြင်းမရှိသေးပေ။ မြေပြင်သတင်းရင်းမြစ်အချို့၏ပြောကြားချက်အရ စစ်သားအလောင်းနှစ်လောင်း နှင့် သေနတ် ၄ လက်ကို ပြည်သူ့ကာကွယ်ရေးတပ်ဖွဲ့များကသိမ်းဆည်းနိုင်ခဲ့ကြောင်းသိရသည်။

တမူးမြို့တွင်ပန်းသာရွာ၊မင်းသာရွာအပြင်နေရာသုံးခု၌ စစ်ကောင်စီက အခိုင်အမာတပ်စွဲထားပြီး ပန်းသာရွာ၌ အဓိကအထိုင်စခန်းအဖြစ် ပြင်ဆင်ထားသည်။တမူးခရိုင်အတွင်း ခါမ်းပတ်မြို့နှင့်မြို့သစ်မြို့ကို ပြည်သူ့ကာကွယ်ရေးတပ်ဖွဲ့များက ကထိန်းချုပ်ထားပြီး စစ်ကောင်စီက တမူးမြို့ကိုသာ ထိန်းချုပ်ထားနိုင်သည်။