MNDAA က အုပ်ချုပ်ရေးယန္တရားအခိုင်အမာတည်ဆောက်နေသည့် သိန္နီကို စစ်ကောင်စီထပ်တောင်းနေဟု​ဆို

သြဂုတ်-၁၄၊၂၀၂၅။လူအေး/People’s Spring

MNDAA အရာရှိအချို့ နှင့် စစ်​ကောင်စီ၏အရှေ့မြောက်တိုင်းစစ်ဌာနချုပ် တိုင်းမှူးဗိုလ်မှူးချုပ်အေးမင်းဦးတို့သည် လားရှိုးမြို့၌ ယနေ့ ထပ်မံတွေ့ဆုံဆွေးနွေးခဲ့ရာ စစ်​ကောင်စီက သိန္နီမြို့ကို ပြန်ပေးရန်တောင်းဆိုခဲ့ကြောင်း ​ဒေသခံသတင်းရင်းမြစ်အချို့က ပြောသည်။

လားရှိုးမြို့ရှိ ဆင်နှစ်ကောင်ဟိုတယ်တွင် သြဂုတ်လ ၁၄ရက်နံနက်ပိုင်းကတွေ့ဆုံ​ဆွေး​နွေးခဲ့ကြခြင်းဖြစ်သည်။

“သိန္နီကိုပြန်တောင်းတယ်။ဆွေးနွေးပွဲအဖြေမထွက်ဘဲရပ်လိုက်တယ်” ဟု အထက်ပါသတင်းရင်းမြစ်ကပြောသည်။

Public Service Announcement

ဆွေးနွေးရာတွင် ဝတပ်ဖွဲ့(UWSA)ကိုယ်စားလှယ်အချို့ပါဝင်ကြောင်း၎င်းက ပြောသည်။သို့​သော်People’s Spring ကသီးခြားအတည်မပြုနိုင်​​သေးပေ။

ဆွေးနွေးပွဲရလဒ် မထွက်ခြင်း၊ သိန္နီကို ပြန်ပေးရန် စစ်​ကောင်စီကဖိအားပေးနေခြင်းတို့ကြောင့် ရှမ်းပြည်နယ်မြောက်ပိုင်းနိုင်ငံရေးအခြေအနေသည် မှန်းဆရန်ခက်ခဲသွားပြီဟု အထက်ပါသတင်းရင်းမြစ်က​ပြောသည်။ ​ဆွေး​နွေးပွဲနှင့်ပက်သက်၍ MNDAA ကိုဆက်သွယ်ရန်ကြိုးစား​သော်လည်း ဆက်သွယ်၍မရ​သေးပါ။

သိန္နီမြို့မြို့ကို စစ်ကောင်စီက ပြန်လည်တောင်းယူနေကြောင်း သတင်းများသည် ပြီးခဲ့သည့် ဇွန်လကတည်းကထွက်ပေါ်ခဲ့သည်။ မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)သည် သိန္နီမြို့ကို အုပ်ချုပ်ရေး ဆက်တိုက်အရှိန်မြှင့်နေပြီး ရဲတပ်ဖွဲ့သင်တန်းဆင်းခြင်း၊ တရားဥပဒေစိုးမိုးရေးလုပ်ငန်းများဖော်ဆောင်ခြင်း၊ စျေးများတည်ဆောက်ခြင်း၊ ခရိုင်​ဆေးရုံ​ဆောက်ရန်အုတ်မြစ်ချခြင်း ၊ကျန်းမာရေးဆိုင်ရာဝန်​ဆောင်မှုများတိုးမြှင့်​ပေး​နေခြင်း၊ မြို့တွင်းလျှပ်စစ်မီးတိုင်များ စိုက်ထူပြီး မြို့ပြလုပ်ငန်းများကို အရှိန်မြှင့်လုပ်ကိုင်​နေ​ကြောင်း The Kokang ​ဖေစ်ဘွခ်စာမျက်နှာတွင် ဆက်တိုက် ဖော်ပြနေသည်။

ထိုအပြင် တရုတ်နိုင်ငံသား စီးပွားရေးလုပ်ငန်းရှင်များလည်း သိန္နီမြို့တွင် ဟိုတယ်လုပ်ငန်း၊ ဖျော်ဖြေလုပ်ငန်းများ၌ လာရောက်ရင်းနှီးမြှပ်နှံနေသည်ကိုတွေ့ရသည်ဟု ဒေသခံသတင်းရင်းမြစ်များကပြောသည်။

စစ်ကောင်စီသည် သိန္နီမြို့ကို ပြန်ပေးရေးအပြင် လားရှိုး-သီပေါနယ်စပ်ရှိစစ်တပ်ရင်းများမှ ပြန်ဆုတ်ခွာပေးရေးလည်း တောင်းဆိုထားပြီး MNDAAက လက်မခံဘဲ နှစ်ဘက် ဆက်ဆံရေးတင်းမာလာနိုင်ကြောင်း သုံးသပ်မှုများလည်းရှိနေသည်။

လားရှိုးမြို့ကို တရုတ်အစိုးရ၏ ဖိအား​ပေးမှုဖြင့်စစ်ကောင်စီက ပြီးခဲ့သည့် ဧပြီလ‌ ၂၀ရက်က ပြန်ဝင်လာပြီး‌နောက် မြို့ပေါ်ရပ်ကွက်၁၂ခုကိုထိန်းချုပ်ထားသည်။သို့​သော် လားရှိုးမြို့ပြင်ပရှိ​ကျေးရွာများတွင် MNDAA ကတပ်စွဲထားသည်။

လက်ရှိတွင်MNDAA မှတ်ပုံတင်ထားသည့်ယာဉ်များကို လားရှိုးမြို့ထဲသို့ စစ်ကောင်စီကဝင်ခွင့်မပြုတော့သလို မြောက်ပိုင်းမှာမဟာမိတ်သုံးဖွဲ့ထိန်းချုပ်ထားသည့် ဒေသများမှလာရောက်သည့် ကုန်စည်များကို စစ်ကောင်စီဖမ်းဆီးနေသည်။

ပြီးခဲ့သည့် ဇူလိုင်လ ၃၀ရက် နံနက်က ကွတ်ခိုင်မြို့ ရပ်ကွက်(၂)ရှိ ရာစုသစ်ဟိုတယ်(၂) အနီးကို စစ်ကောင်စီက ဗုံးကြဲခဲ့ပြီး ယင်းလုပ်ရပ်သည်တရုတ်အစိုးရ၏စေ့စပ်ညှိနှိုင်းမှုများဖြင့်ခက်ခဲစွာရရှိထားသည့် အပစ်ရပ်သဘောတူညီချက်ကို ပြင်းထန်စွာ ချိုးဖောက်လိုက်ခြင်းဖြစ်ပြီး နှစ်ဖက်ယုံကြည်မှုကို ထိခိုက်စေကာရှမ်းပြည်မြောက်ပိုင်း၌ တိုက်ပွဲများပြန်ဖြစ်နိုင်ခြေကို အရှိန်မြင့်လိုက်ခြင်းဖြစ်ကြောင်းMNDAAက ယင်းနေ့တွင် သတင်းထုတ်ပြန်ခဲ့သည်။သို့​သော်MNDAA ဘက်မှ ထိန်းသိမ်းနိုင်စွမ်းကို ဆက်လက်ထိန်းသိမ်းထားဆဲဟုအသိပေးထားသည်။ထို့အပြင် လူထုဘေးကင်းလုံခြုံရေးအတွက် လိုအပ်သော အစီအစဥ်များချမှတ်သွားမည်ဟု ထုတ်ပြန်ကြေညာခဲ့သည်။

ကွတ်ခိုင်မြို့အား ဗုံးကြဲမှုတွင်အရပ်သား (၇) ဦးသေဆုံး၊ (၁၃) ဦးဒဏ်ရာရခဲ့သည်။ဒဏ်ရာရရှိသူများတွင် အသက် ၂၀ အရွယ် တရုတ်နိုင်ငံသားတစ်ဦး ပါဝင်ခဲ့သည်။ ထို့နောက်ပိုင်းတွင်လည်း စစ်ကောင်စီကကွတ်ခိုင်မြို့နယ်အတွင်းလေကြောင်းမှကင်းထောက်မှုများဆက်လက်ပြုလုပ်နေသည်။