စက်တင်ဘာ-၂၊ ၂၀၂၅။ခွန်ဖ/People’s Spring
ကရင်ပြည်နယ်၊ ကော့ကရိတ်မြို့အကျော်ကအာရှလမ်းပိုင်းမှာ တိုက်ပွဲပြင်းထန်နေပြီး အင်အားအများအပြားနဲ့ ရှေ့တိုးဖို့ကြိုးပမ်းတဲ့ စစ်ကောင်စီရဲ့ အောင်ဇေယျစစ်ကြောင်းဟာ ပြန်လန်ကျသွားတယ်လို့ လူထုနွေဦးရဲ့ ကရင်စစ်ရေးသတင်းရင်းမြစ်အချို့က ပြောပါတယ်။
အာရှလမ်းပိုင်းမှာ ပိတ်မိနေတဲ့အောင်ဇေယျစစ်ကြောင်းနဲ့ ကရင်အမျိုးသားလွတ်မြောက်ရေးတပ်မတော်(KNLA)နဲ့ PDFပူးပေါင်းတပ်တွေစက်တင်ဘာ၁ရက် ညနဲ့ ဒီကနေ့ စက်တင်ဘာ၂ ရက် နံနက်မှာ တိုက်ပွဲပြင်းထန်နေတာပါ။
အာရှလမ်းပိုင်းမှာ အောင်ဇေယျစစ်ကြောင်းကို ဖြတ်တောက်တိုက်ခိုက်နေတဲ့ တော်လှန်ရေးတပ်ဖွဲ့ဝင်တွေကို ၂၀၂၄ ခုနှစ်မှာတွေ့ရစဥ်။ ဓါတ်ပုံ-Cobra Column အာရှလမ်းပိုင်းမှာ အောင်ဇေယျစစ်ကြောင်းကို ဖြတ်တောက်တိုက်ခိုက်နေတဲ့ တော်လှန်ရေးတပ်ဖွဲ့ဝင်တွေကို ၂၀၂၄ ခုနှစ်မှာတွေ့ရစဥ်။ ဓါတ်ပုံ-Cobra Column အာရှလမ်းပိုင်းမှာ အောင်ဇေယျစစ်ကြောင်းကို ဖြတ်တောက်တိုက်ခိုက်နေတဲ့ တော်လှန်ရေးတပ်ဖွဲ့ဝင်တွေကို ၂၀၂၄ ခုနှစ်မှာတွေ့ရစဥ်။ ဓါတ်ပုံ-Cobra Column
“မနေ့ညကရော၊ဒီမနက်ရောလက်နက်ကြီးတောက်လျှောက်ပစ်တယ်။ပြီးတော့တိုးတယ်။ဒီကလည်းစောင့်နေသူမို့ လာပါပေါ့။ ပြန်လန်တာပဲ။ သူတို့တွက်ထားတာစပယ်ရှယ်ပစ်မယ်၊တက်မယ်။
Public Service Announcement
ဒီကလည်း ကြိုတင်တွက်ဆထားတာပဲလေ”လို့ ကရင်စစ်ရေးသတင်းရင်းမြစ်ကစက်တင်ဘာ၂ရက် နေ့ခင်းပိုင်းမှာ ပြောပါတယ်။
ပြီးခဲ့တဲ့ ဩဂုတ် ၂၅ရက်လောက်က တိုက်ပွဲမှာလည်း တော်လှန်ရေးတပ်တွေက အောင်ဇေယျရဲ့ ကုန်းတကုန်းကို သိမ်းရခဲ့ပါသေးတယ်။ ဒါ့အပြင် စစ်သား အလောင်းငါးလောင်းနဲ့ လက်နက် ငါးလက်လည်း တော်လှန်ရေးတပ်တွေက ရခဲ့တယ်လို့ ကရင်စစ်ရေးသတင်းရင်းမြစ်က ပြောပါတယ်။
“သူတို့ (စစ်တပ်)စိတ်ထဲမှာသိနေတာက ဝေါလေ မှာသွားချရင် ဒီဘက်လူမရှိတော့ဘူး။ဒီဘက်ချရင်ဝေါလေလူမရှိတော့ဘူး။ ကြည့်ပေါ့ဘာဖြစ်မလဲဆိုတာ”လို့ ကရင်စစ်ရေးသတင်းရင်းမြစ်က ပြောပါတယ်။
၂၀၂၄ ဧပြီလကတည်းကမော်လမြိုင်မြို့ကနေ မြဝတီကို လေးရက်နဲ့ အရောက်ချီတက်မယ်ဆိုပြီးရက်ပေါင်း ၄၈၀ ကျော်အကြာတဲ့အထိ အောင်ဇေယျစစ်ကြောင်းဟာ ဒေါနတောင်ပေါ်မှာ ပိတ်မိနေတာပါ။ ၂၀၂၅ သြဂုတ်လအရောက်မှာတော့ ရက်ပေါင်း(၉၀)အတွင်း မြဝတီရောက်အောင်သွားပြီး ဆုံးရှုံးထားတဲ့စခန်းတွေ ၊နယ်မြေတွေပြန်သိမ်းမယ်ဆိုပြီး စစ်ကြောင်းထိုးလမ်းဖွင့်ဖို့ ကြိုးစားနေတာဖြစ်ပါတယ်။
ကော့ကရိတ်မြို့အကျော်ကတတန်းကူးကျေးရွာနားမှာ ပိတ်မိနေတဲ့အောင်ဇေယျအဖွဲ့ဟာ မိုင်(၂၀)လောက်ပဲ ကွာဝေးတော့တဲ့ နယ်စပ်မြို့ မြဝတီကို ရက်(၉၀)နဲ့ အရောက်ချီတက်မယ့်ခရီးဆိုပြီး အခု ဩဂုတ်လဆန်းက စတင်ခဲ့တာလို့ လူထုနွေဦးရဲ့ ကရင်စစ်ရေးသတင်းရင်းမြစ်က ပြောပါတယ်။
ဒါပေမယ့်စက်တင်ဘာလထဲရောက်ပြီမို့ ရက် ၃၀ လောက်အချိန်ကုန်သွားပေမယ့် စစ်ကြောင်းရှေ့မတိုးနိုင်သေးပါဘူး ။
KNLA နဲ့ PDF ပူးပေါင်းတပ်တွေဟာ ၂၀၂၄ နှစ်ကုန်ပိုင်းလောက်စပြီး အောင်ဇေယျစစ်ကြောင်းရဲ့ အလယ်ကနေဖြတ်တောက်ပြီး ပိတ်ဆို့ထားလိုက်ပါတယ်။အဲလိုဖြတ်တောက် ပိတ်ဆို့မှုကြောင့်ဒေါနတောင်ပေါ် တောနောရေတံခွန်နားက အောင်ဇေယျအဖွဲ့ဟာဝိုင်းပတ်ပိတ်ဆို့ဖြတ်တောက်ခံရတာကြောင့်အစာ ရေစာငတ်ပြတ်တဲ့အထိဖြစ်ကာ အလင်းဝင်လာသူတွေ အများအပြားရှိခဲ့ပါတယ်။ တောနောရေတခွန်နားက အောင်ဇေယျစစ်ကြောင်းနဲ့ ကော့ကရိတ်ကထွက်လာတဲ့စစ်ကြောင်းဟာလည်း မချိတ်ဆက်နိုင်ပဲ တော်လှန်ရေးတပ်တွေရဲ့ဖြတ်တောက်ပိတ်ဆို့တိုက်ခိုက်မှုကိုခံနေရတာဖြစ်ပါတယ်။
၂၀၂၄ မတ်လနဲ့ ဧပြီက ကရင်အမျိုးသားလွတ်မြောက်ရေးတပ်မတော်(KNLA)နဲ့ PDF ပူးပေါင်းတပ်တွေက မြဝတီမြို့နားက သင်္ဃန်းညီနောင်ဗျူဟာနဲ့ တပ်ရင်းတွေ၊ လေးကေ့ကော်နဲ့ မြဝတီမြို့စောင့်တပ် ခမရ(၂၇၅)တပ်ရင်းတွေတိုက်ခိုက်သိမ်းပိုက်ခဲ့ပါတယ်။
အဲဒီနေရာတွေကို ပြန်လည်ထိန်းချုပ်မယ်လို့ဆိုကာ အာဏာသိမ်းစစ်ကောင်စီရဲ့ ဒုခေါင်းဆောင် ဒုဗိုလ်ချုပ်မှူးကြီးစိုးဝင်း ကိုယ်တိုင်ကွပ်ကဲတဲ့ နိုင်ငံတော်အဆင့် “အောင်ဇေယျစစ်ဆင်ရေး”လို့ အမည်ပေးပြီး တပ်မ(၅၅)ဦးဆောင်တဲ့ အင်အား ၁၂၀၀ခန့်ပါ အောင်ဇေယျစစ်ကြောင်းဟာ ၂၀၂၄ ဧပြီ ၉ရက်ကစလို့ မော်လမြိုင်က ချီတက်လာခဲ့ပါတယ်။
လေးရက်နဲ့ မြဝတီမြို့ကို အရောက်ချီတက်မယ်လို့ ကြွေးကြော်ခဲ့ပေမယ့် တနှစ်ခွဲနီးပါးကြာတဲ့အထိ ဒေါနတောင်ပေါ်၊ တောနောရေတံခွန်မှာ ရှေ့ဆက်မတိုးနိုင်တော့ဘဲ ပိတ်မိနေပါတယ်။
