စစ်ကောင်စီရွေးကောက်ပွဲ သပိတ်မှောက်ဖို့ စစ်ကိုင်းတိုင်းက ပြည်သူတွေဆန္ဒပြ

ဒီဇင်ဘာ-၁၆၊၂၀၂၅။ သုည/People’s Spring

စစ်ကိုင်းတိုင်းအတွင်းက သပိတ်အဖွဲ့တွေ၊ ဒေသခံပြည်သူတွေဟာ စစ်ကောင်စီရွေးကောက်ပွဲကို သပိတ်မှောက်ဆန့်ကျင်ကြဖို့ (ဒီဇင်ဘာ ၁၆) မှာ ဆန္ဒပြခဲ့ပါတယ်။

ကလေးမြို့နယ်မှာ လူထုတိုက်ပွဲဦးဆောင်ကော်မတီက ဒေသခံ​ပြည်သူတွေနဲ့ ပူးပေါင်းကာ စစ်ကောင်စီရွေးကောက်ပွဲကို လူထုအားနဲ့ ဆန့်ကျင်ကြဖို့အတွက် ဟောပြောပွဲ လှုပ်ရှားမှုကို ပြုလုပ်ခဲ့ကြပါတယ်။

ဒါ့အပြင်စစ်တပ်စိုးမိုးတဲ့ ဒေသမှ ပြည်သူတွေအနေနဲ့စစ်ကောင်စီရွေးကောက်ပွဲကိုအလုံခြုံဆုံး နည်းလမ်းတွေနဲ့ ဆန့်ကျင်ပေးကြဖို့ မေတ္တာရပ်ခံထားတယ်။

Public Service Announcement

မုံရွာမြို့နယ်အတွင်းမှာလည်း မြို့နယ်ပကဖ က “စစ်အာဏာရှင်စနစ်ချုပ်ငြိမ်းရေးနဲ့ ဒီမိုကရေစီအခြေခံအခွင့်အရေးတွေ ကာကွယ်စောင့်ရှောက်ရေးဥပဒေအရ အရေးယူကြ” ဆိုင်းဘုတ်တွေထောင်လှုပ်ရှားမှု လုပ်ဆောင်ခဲ့ပါတယ်။

ဆိုင်းဘုတ်ပါ စာသားအပြင် စစ်တပ်ရွေးကောက်ပွဲမှာ ဝင်ရောက်အရွေးခံမယ့် ကိုယ်စားလှယ်တွေကိုပါ တပါတည်းသတိပေးပြောကြားလိုက်ပါတယ်။

မြို့နယ်အတွင်း အတုအယောင် ရွေးကောက်ပွဲမှာ ဝင်ပြိုင်မယ့် ကိုယ်စားလှယ်တွေကို အရေးယူသွားမှာဖြစ်ပြီး၊ လူထုအနေနဲ့လည်း ၎င်းတို့ကို လူမှုရေး ပြစ်ဒဏ်ခတ်နိုင်ရန် တော်လှန်ရေး အင်အားစုများမှ ဗီနိုင်း ဆိုင်းဘုတ်တွေ ထောင်ခဲ့တာဖြစ်ပါတယ်။

ကန့်ဘလူမြို့နယ်မှာလည်း လူထုသပိတ်တိုက်ပွဲဦးဆောင်ကော်မတီမှ ဦးဆောင်ကာ စစ်တပ်ရွေးကောက်ပွဲအား လက်မခံကြောင်း ဆန္ဒထုတ်ဖော်သပိတ်မှောက်ခဲ့ပါတယ်။

ယင်းမာပင်မြို့နယ်မြောက်ခြမ်းမှာလည်း နောက်ပြန်မလှည့်ကြေးဒီတော်လှန်ရေးသပိတ်စစ်ကြောင်းမှ စစ်တပ်က ပြုလုပ်မယ့် ရွေးကောက်ပွဲကို ပြည်သူတစ်ရပ်လုံးက ဆန့်ကျင်ကြောင်း ဆန္ဒထုတ်ဖော်ပြသခဲ့ကြပါတယ်။

ဓာတ်ပုံ – ရွာပေါင်းစုံသပိတ်၊ GSCB၊ ကလေးမြို့လူထုတိုက်ပွဲဦးဆောင်ကော်မတီ