ကျောက်တံခါးမြို့နယ်က ကျေးရွာကို စစ်တပ် ဒရုန်းနဲ့ ဗုံးကြဲ

ဖေဖော်ဝါရီ-၂၄၊ ၂၀၂၆။ ဒလပန်း/People’s Spring

ပဲခူးတိုင်း၊ ကျောက်တံခါးမြို့နယ် သမင်အင်းကုန်းကျေးရွာကို စစ်တပ်က ဒရုန်းနဲ့ ဗုံးကြဲခဲ့တယ်လို့ ဒေသခံတွေဆီက သိရပါတယ်။

ဒီနေ့ ဖေဖော်ဝါရီ ၂၄ ရက် နေ့လယ် ၁၂ နာရီဝန်းကျင်မှာ အာဏာသိမ်းစစ်တပ်က ဒရုန်းနဲ့ ဗုံးကြဲတိုက်ခိုက်ခဲ့တာပါ။

“ကျောက်တံခါးမြို့စစ်တပ်အထိုင်ချနေရာကနေ ဒရုန်းလာပြီး ကြဲသွားတာ”လို့ ကျောက်တံခါးဒေသခံတစ်ဦးက ပြောပါတယ်။

Public Service Announcement

ဒရုန်းနဲ့ ဗုံးကြဲတိုက်ခိုက်မှုတွေကြောင့် နေအိမ်သုံးလုံးပျက်စီးခဲ့ပြီး လူထိခိုက်မှု မရှိခဲ့ဘူး ဒေသခံတွေက ပြောပါတယ်။

ဒါ့အပြင် ဖေဖော်ဝါရီ ၂၃ ရက်က ကျောက်ကြီးမြို့နယ်၊ နတ်သံကွင်းမြို့က စစ်တပ်ဖွဲ့ဝင်တွေဟာ ကျောက်တံခါးမြို့နယ် ကညင်ကျိုး ကျေးရွာအုပ်စု၊ ကညင်ကျိုးကျေးရွာအတွင်းကို လက်နက်ကြီးတွေနဲ့ ပစ်ခတ်တာတွေ လုပ်ဆောင်ခဲ့ပါတယ်။

လက်နက်ကြီးထိမှန်မှုကြောင့် ကညင်ကျိုးကျေးရွာ ချိန်းချောင်းပိုင်းနေ အမျိုးသမီး သုံးဦး ထိခိုက်ဒဏ်ရာရရှိခဲ့ပါတယ်။

ကျောက်တံခါးမြို့နယ်နဲ့ စစ်တောင်းမြစ်ဝှမ်းက ကျေးရွာတွေကို စစ်တပ်က လက်နက်ကြီး၊ ဒရုန်း၊ လေကြောင်းကနေ တိုက်ခိုက်တာတွေ နေ့စဥ်နီးပါး လုပ်ဆောင်နေတာလည်း ဖြစ်ပါတယ်။

အဲ့ဒီတိုက်ခိုက်မှုတွေကို ပိန်းဇလုတ်မြို့အခြေစိုက် ခမရ-၂၆၄ တပ်ရင်း၊ ပဲနွယ်ကုန်းမြို့ ရွှေဝါကျေးရွာအခြေစိုက် ခမရ-၃၀၇ တပ်ရင်းနဲ့ နတ်သံကွင်းမြို့က စစ်တပ်ဖွဲ့ဝင်တွေက လုပ်ဆောင်နေတာလို့ ဒေသတွင်း သတင်းရင်းမြစ်တွေက ပြောပါတယ်။

ပြီးခဲ့တဲ့ ဖေဖော်ဝါရီ ၂၁ ရက်မှာလည်း ပဲနွယ်ကုန်းမြို့အထွက်မှာ အထိုင်ချထားတဲ့ စစ်တပ်တပ်ဖွဲ့ဝင်တွေက ဇရပ်ခင်ကျေးရွာအတွင်းကို ဒရုန်းနဲ့ဗုံးကြဲတိုက်ခိုက်ခဲ့တာကြောင့် ဒေသခံ ၂ ဦးထိခိုက်ဒဏ်ရာရရှိခဲ့ပါတယ်။