ဖေဖော်ဝါရီ−၂၅ ၊၂၀၂၆။ဒလပန်း/People’s Spring
အာဏာသိမ်းစစ်တပ်ရဲ့ ဒရုန်းကြောင့် ဒီမိုကရေစီအကျိုးပြုကရင့်တပ်မတော် (DKBA)တပ်ဖွဲ့ဝင် သုံးဦးသေဆုံးခဲ့ရတဲ့ဖြစ်ရပ်ဟာ မတော်တဆဖြစ်တာလို့ DKBA အမှတ်(၁)ကွပ်ကဲရေး နည်းဗျူဟာမှူး ဗိုလ်မှူးကြီး စောတရီးထူးက ပြောပါတယ်။
“တခြားကိစ္စ ပြောချင်တာမရှိဘူး။သူတို့သွားတာ ကျွန်တော်တို့ မသိရဘူး။ဒါဟာ မတော်တဆလို့ ပြောရမှာပေါ့။ထွေထွေထူးထူးတော့ ပြောဖို့မရှိဘူး။အဲဒီနေရာက စစ်မြေပြင်ဖြစ်တယ်။စစ်ဖြစ်နေတဲ့ နေရာဖြစ်တော့ သွားတော့ ဒီလိုကတော့ ဖြစ်မှာပဲ။ဒီလိုကိစ္စက ဖြစ်တက်တယ်”လို့ ဗိုလ်မှူးကြီးစောတရီးထူးက ပြောပါတယ်။
DKBA တပ်ဖွဲ့ဝင်သုံးဦးသေပြီး အရာရှိ တစ်ဦး ဒဏ်ရာရတယ်လို့ သတင်းရပါတယ်။
Public Service Announcement
ကရင်ပြည်နယ်၊မြဝတီမြို့တောင်ဘက်က ဖလူး-မဲကနယ် လမ်းပိုင်းတနေရာမှာ ဖေဖော်ဝါရီ ၂၄ ရက်က စစ်တပ်ရဲ့ ဒရုန်းနဲ့ကြဲမှုကြောင့် DKBAတပ်ရဲ့ အရာရှိတစ်ဦး ဒဏ်ရာရပြီး ရဲဘော် သုံးဦး သေဆုံးခဲ့ရတာ ဖြစ်ပါတယ်။
” တပ်ဖွဲ့ဝင်ပဲ အရာရှိတော့ မဟုတ်ဘူး။ရွာကနေ မြဝတီကို စျေးသွားမလို့။သွားရင်းနဲ့ အဲဒီနေရာက စစ်မြေပြင် ဖြစ်တဲ့အတွက် အဲဒီလို ဘယ်လိုပြောမလဲ ဆိုတော့ စစ်မြေပြင်ဆိုတော့ ရန်သူမိတ်ဆွေခွဲ ခြားလို့ မသိတော့ ဖြစ်သွားတာပေါ့။အဲဒီမှာ ပြည်သူတွေလည်းပါတယ်။ကျွန်တော်တို့ ရဲဘော်က သုံးယောက် ပြည်သူက နှစ်ယောက်။ထိတာ(ဒဏ်ရာရတာ)ခြောက်ယောက်။တပ်ဖွဲ့ဝင်အရာရှိ တစ်ယောက်ပါတယ်။ကျန်တဲ့ငါးယောက်က ပြည်သူ”လို့ ဗိုလ်မှူးကြီး စောတရီးထူးက လူထုနွေဦးကို ပြောပါတယ်။
ဒါအပြင် ဒီဖြစ်စဥ်အပေါ် DKBAက တုံ့ပြန်ဖို့ မရှိဘူးလို့ သူက ဆက်ပြောပါတယ်။DKBA ဟာစစ်တပ်နဲ့အပစ်ရပ်လက်မှတ်ထိုးထားပြီး စစ်တပ်အာဏာသိမ်းပြီးနောက်ပိုင်း စစ်တပ်ဖိတ်ခေါ်တဲ့ငြိမ်းချမ်းရေးဆွေးနွေးပွဲတိုင်းကိုတက်ရောက်နေတဲ့ စစ်တပ်နဲ့ နီးကပ်တဲ့အဖွဲ့ဖြစ်ပါတယ် ။တဖက်မှာ အမေရီကန်နိုင်ငံသားတွေကို ဦးတည်ပြီးတော့ အွန်လိုင်ငွေလိမ်လုပ်ငန်းတွေလုပ်တာကြောင့်ဆိုပြီး အမေရီကန်အစိုးရက DKBA နဲ့ခေါင်းဆောင်တွေကို အရေးယူဒဏ်ခတ်ထားပါတယ်။
သေဆုံးသွားတဲ့ DKBA တပ်ဖွဲ့ဝင်တွေကို ဒီကနေ့ မှာ မီးသဂြိုလ်တယ်လို့ ဒေသခံသတင်းရင်းမြစ်က ဆိုပါတယ်။
“သေဆုံးထိခိုက်တဲ့ အရပ်သားတွေက ဘယ်သူမှန်းမသိသေးဘူး”လို့ သူက ပြောပါတယ်။
မဲကနယ်-ဖလူး-ကျောက်ခက်တောလမ်းအနီးဝန်းကျင် ရသေ့ဂူ၊ ဖလူး၊ မင်းလက်ပံကျေးရွာတွေဘက်မှာ စစ်ကောင်စီတပ်က နယ်မြေစိုးမိုးထိန်းချုပ်ဖို့အတွက် စစ်ရေးလှုပ်ရှားတာတွေ ရှိနေတာပါ။
ဒါအပြင် ဒရုန်းနဲ့တိုက်ခိုက်တာ၊လေယာဉ်နဲ့ ဗုံးကြဲတာတွေရှိနေတာကြောင့် သွားလာရာမှာ အထူးသတိပြုကြဖို့၊ အထူးသဖြင့် အဲဒီလမ်းပိုင်းကို အသုံးပြုတာကို ရှောင်ရှားသွားလာကြဖို့လည်း ဒေသခံအချင်းချင်းကြား သတိပေးတာတွေလည်း ရှိနေပါတယ်။
DKBA ဟာ ဦးသိန်းစိန်အစိုးရလက်ထက်က တနိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA)လက်မှတ်ထိုးခဲ့တဲ့အဖွဲ့ဖြစ်ပြီး နေပြည်တော်မှာ အာဏာသိမ်းစစ်ကောင်စီနဲ့လည်း တွေ့ဆုံဆွေးနွေးမှု ရှိခဲ့တာအပြင် ရွေးကောက်ပွဲကို ထောက်ခံတယ်လို့ တရားဝင်ထုတ်ပြန်ထားတဲ့ အဖွဲ့ဖြစ်ပါတယ်။
