မေ-၂၉၊၂၀၂၆။ခိုင်မြတ်/People’s Spring
ချင်းပြည်နယ်၊ ပလက်၀မြို့နယ် ဝါးရူးနဲ့ ကယက်ကျေးရွာကြားကိုအာဏာသိမ်းစစ်တပ်ကဂျက်ဖိုက်တာနဲ့ ပေါင်ငါးရာဗုံးလေးလုံး ကြဲချ၊ တိုက်ခိုက်ခဲ့တာကြောင့် အရပ်သားပြည်သူ တဦးသေဆုံးပြီး နှစ်ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။
မေလ ၂၈ ရက် မနက် ၁၁ နာရီ၀န်းကျင်လောက်မှာ စစ်တပ်ကဂျက်ဖိုက်တာတစီးနဲ့ နှစ်ကြိမ်တိုင် ဗုံးကြဲခဲ့တာပါ။
“ဒဏ်ရာရတဲ့သူတွေက ဒေသခံတော့ မဟုတ်ဘူး၊ ခရီးသွားတွေ လမ်းမှာထိသွားတာ။ တယောက်က ပွဲချင်းပြီး သေတယ်။ နောက်နှစ်ယောက်က ဒဏ်ရာနည်းနည်းပြင်းတယ်” လို့ ပလက်၀မြို့နယ် ဆမီးမြို့မှာ နေထိုင်တဲ့ ဒေသခံတဦးက ပြောပါတယ်။
Public Service Announcement
ဗုံးကြဲခံရတဲ့နေရာဟာဆမီးမြို့ နဲ့ဆယ်မိုင်၀န်းကျင်အကွာ ဆမီး-မတူမီလမ်းပေါ် တည်ရှိတာဖြစ်ပြီး စစ်ဘက်နေရာမဟုတ်ဘဲ အရပ်သားတွေ သွားလာနေတဲ့ နေရာဖြစ်တယ်လို့ ဆိုပါတယ်။
အခုရက်ပိုင်းမှာ စစ်တပ်ကပလက်၀အပါအ၀င်ရခိုင်ပြည်နယ်အတွင်း လေကြောင်းတိုက်ခိုက်မှုတွေ ဆက်တိုက်လုပ်နေပြီး Y 12 ၊ ဒရုန်းတွေနဲ့ ကင်းထောက်တာတွေလည်း နေ့စဉ်ရှိတယ်လို့ ဒေသခံတွေက ပြောကြပါတယ်။
“Y12 နဲ့အကြာကြီးဝဲနေခဲ့သေးတယ်။ကင်းထောက်တာ။ ပြီးမှ လေယာဉ်နဲ့ ဗုံးလာကြဲတယ်။ အရပ်သားနေရာမှန်း သိသိကြီးနဲ့ လုပ်တာပါ” လို့ ဆမီးဒေသခံက ပြောပါတယ်။
စစ်တပ်ကပလက်၀မြို့နယ်အပြင် ရခိုင်ပြည်နယ်၊ ပေါက်တောမြို့နယ် ဒါးကိုင်၊ ကြိမ်ခွေမော်ကျေးရွာတွေအနီး၀န်းကျင်ကိုလည်း မေလ ၂၈ ရက် နေ့လယ်ပိုင်းမှာ ဂျက်ဖိုက်တာ နှစ်စီး၊ Y12 တစီးနဲ့ တနာရီ၀န်းကျင်ကြာ ဗုံးကြဲခဲ့ပါသေးတယ်။
အဲဒီဗုံးကြဲမှုကြောင့် လူအထိအခိုက်မရှိပေမယ့် မပေါက်ကွဲသေးတဲ့ ဗုံးတွေ ကျန်နေခဲ့တာကြောင့် ပြည်သူတွေ စိုးရိမ်၊ တိမ်းရှောင်နေကြရတယ်လို့ ဆိုပါတယ်။
“ဗုံးအလုံး ဆယ်ချီတယ်၊သုံးဆယ်လောက်ရှိမယ်၊ ရှောင်တဲ့သူတွေ ရှောင်နေကြတယ်”လို့ပေါက်တောမြို့နယ်ဒါးကိုင်ရွာမှအမျိုးသမီးတဦးက ပြောပါတယ်။
စစ်တပ်ဟာ ဂျက်တိုက်လေယာဉ် သုံးစီး (သုံးစီးအထက်)နဲ့ ကင်းထောက်လေ ယာဉ်တွေ တပြိုင်တည်းသုံးပြီး အုပ်စုဖွဲ့ ဗုံးကြဲတဲ့ ပုံစံတွေအရင်ကထက် ပြင်းပြင်းထန်ထန် လုပ်လာတာကြောင့် လေကြောင်းအန္တရာယ်ကို အထူးသတိထားကြဖို့ AA က အသိပေးထားပါတယ်။
