ရွှေကူမြို့နယ်က စစ်တပ်ရဲ့ခြေကုပ်စခန်း ၁ခု KIA သိမ်းပိုက်၊ လက်နက်ခဲယမ်းတွေရ

ဩဂုတ် ၄၊ ၂၀၂၆။ ထားမြတ်/People’s Spring

ကချင်ပြည်နယ်၊ ရွှေကူမြို့နယ် ရွှေဘုန်းမြင့်ကျေးရွာက စစ်တပ်စခန်း ၁ခုကို ကချင်လွတ်လပ်ရေးတပ်မတော်(KIA) ပူးပေါင်းတပ်က သိမ်းပိုက်နိုင်ခဲ့ကြောင်း ကချင်စစ်ရေးသတင်းရင်းမြစ်က ပြောပါတယ်။

ဩဂုတ် ၃ရက်က ရွှေဘုန်းမြင့်စခန်းကို သိမ်းနိုင်ခဲ့တာဖြစ်ပြီး စစ်တပ်က တန်ပြန်ထိုးစစ်ဆင်လာတာကိုလည်း ဟန့်တားနိုင်ခဲ့ကြောင်း အသိပေးပါတယ်။

“ မနေ့က လက်နက်ခဲယမ်းရတယ်။ ဒီနေ့ နေ့လည် ၁၂နာရီမှ လက်နက်ကြီး အသံတိတ်တယ်” လို့ စစ်ရေးသတင်းရင်းမြစ်က ရွှေကူမြို့နယ် ရွှေဘုန်းမြင့်ဒေသတိုက်ပွဲ အခြေအနေကို ပြောပါတယ်။

Public Service Announcement

KIA ပူးပေါင်းတပ် သိမ်းရခဲ့တဲ့ တပ်စခန်းဟာ အရေးပါတဲ့ စစ်တပ်အခြေကုတ်စခန်းနေရာဖြစ်တယ်လို့ ပြောပါတယ်။

KIA ပူးပေါင်းတပ် အနေနဲ့ အလားတူ စစ်ဆင်ရေးမျိုး ဖြေးဖြေးမှန်မှန် ဆက်လက်ဖော်ဆောင်သွားရန်ရှိတယ်လို့လည်း ပြောပါတယ်။

“တောကိုအခြေခံ မြို့ကို၀ိုင်း ရန်သူက မြို့မှာ ပိတ်မိနေတဲ့ သဘော” ပေါ့လို့ လက်ရှိ တော်လှန်ရေးပူးပေါင်းတပ်တွေ ဖော်ဆောင်နေတဲ့ စစ်ရေးဗျူဟာ အခြေအနေကို ကချင်သတင်းရင်းမြစ်က ရှင်းပြပါတယ်။

အာဏာသိမ်းစစ်တပ်ဟာ ကချင်ဒေသက ဆုံးရှုံးနယ်မြေတွေ ပြန်ထိန်းချုပ်နိုင်ဖို့ စစ်ရေးလှုပ်ရှားမှုတွေ ဆက်တိုက်လုပ်ဆောင်လျက်ရှိရာ ရွှေကူမြို့နယ်မှာ မေလကတည်းက တိုက်ပွဲတွေ ပြင်းထန်နေတာဖြစ်ပါတယ်။ လက်ရှိမှာ ခေါင်လန်ဖူးမြို့နယ်၊ ဗန်းမော်မြို့နယ်၊ ဖားကန့်မြို့နယ်တွေမှာလည်း KIAနဲ့ စစ်ကောင်စီအကြား တိုက်ပွဲတွေရှိနေပါတယ်။