စက်တင်ဘာ-၂၈၊၂၀၂၆။အိမ်သွင်၊ကတ်သရင်း/People’s Spring
ရှမ်းပြည်နယ်မြောက်ပိုင်း၊မိုးမိတ်မြို့အနီးမှာ ဒီနေ့ တိုက်ပွဲပြင်းထန်နေပြီး စစ်တပ်ကလေကြောင်းကနေပစ်ကူပေးဗုံးကြဲနေပါတယ်။
မိုးမိတ်မြို့နဲ့ ၂မိုင်ခန့်အကွာညောင်နီရွာမှာစက်တင်ဘာလ၂၈ရက်မနက်ပိုင်းကနေတိုက်ပွဲစတင်ဖြစ်ပွားခဲ့ပြီး နေ့လယ် ၁၂နာရီခန့်မှာ စစ်တပ်ကလေကြောင်းကနေဗုံးကြဲသွားတာဖြစ်ပါတယ်။
“လေယာဉ်က ရွာဘက်နားထိခေါင်းကြီးထိုးစိုက်ပီးပစ်တာ”လို့ဒေသခံတစ်ဦးကပြောပါတယ်။
Public Service Announcement
အခြားဒေသခံတစ်ဦးက” စစ်တပ်ဘက်မှာ ဒရုန်းထိပြီး သေဆုံးတာတွေများတယ်လို့ကြားတယ်။ လေယာဉ်ကတော့ ဆက်ပြီး လာနေတုန်းပဲ။ တိုက်ပွဲဖြစ်တဲ့အသံတွေလည်းကြားနေရတယ်”လို့ပြောပါတယ်။
စစ်တပ်ရဲ့စခန်းအချို့ကို ကချင်လွတ်လပ်ရေးတပ်မတော်(KIA) ၊ပြည်သူ့ကာကွယ်ရေးတပ်မတော် (PDF) နဲ့မဟာမိတ်တွေက တိုက်ခိုက်ပြီးတိုက်ပွဲဖြစ်ပွားတာလို့ ဒေသခံအချို့ကပြောပါတယ်။
တော်လှန်ရေးအဖွဲ့တွေနဲ့နီးစပ်တဲ့စစ်ရေးရင်းမြစ်အချို့က စစ်တပ်စခန်းအချို့ကို KIA ၊PDF ပူးပေါင်းတပ်က တိုက်ခိုက်တာဖြစ်ပြီး စစ်စခန်းတစ်ခုကိုသိမ်းပိုက်ထားတယ်လို့ ပြောပါတယ် ။
တော်လှန်ရေး ရဲဘော်တဦးကလည်း “စခန်းကုန်းတချို့ရထားတာရှိတယ်လို့သိရတယ်။အရင်ထဲက ဒီနေရာ တွေကိုလိုချင်လို့ စစ်တပ်ကထိုးစစ် ဆင်ဖို့ကြိုးစားခဲ့ဘူးတယ်။ဒီတကြိမ်ကကိုယ့်ဘက်ကထိုးစစ်ပါ”လို့ပြောပါတယ်။
ညောင်နီရွာအနီးကို စစ်တပ်က နယ် မြေတိုးချဲ့ ထိန်းချုပ်ချင်တာ ကြောင့် ပြီးခဲ့တဲ့ ဩဂုတ်လပဲ မြေပြင်စစ် ကြောင်းထိုးတာ တွေ ၊မိုးမိတ်မြို့ကိုအင်အားတိုးတာ တွေပြုလုပ်ခဲ့ပါတယ်။ဒါပေမယ့်စစ်တပ်က လေကြောင်းပစ်ကူနဲ့ စစ် ကြောင်းထိုးခဲ့ ပေမယ့် အထိနာကာ ပြန်ဆုတ်သွားပါတယ်။
မိုးမိတ်မြို့အနီးမှာရှမ်းပြည်တိုးတက်ရေးပါတီ ၊ရှမ်းပြည်တပ်မတော်(SSPP/SSA)လည်း တပ်စွဲထားပြီး ပြီးခဲ့တဲ့သြဂုတ်လကလည်း ညောင်နီရွာအနီးမှာ စစ်တပ်နဲ့ SSPP/SSA တိုက်ပွဲဖြစ်ပွားခဲ့တယ်လို့ဒေသခံတွေကပြောပါတယ်။
သြဂုတ်လကဖြစ်ပွားတဲ့တိုက်ပွဲတွေအတွင်း စစ်တပ်က လေကြောင်းကနေ ဗုံးကြဲလို့ အရပ်သားတချို့ထိခိုက်သေဆုံးခဲ့ဖူးပါတယ်။
ဒီနေ့မနက်ဗုံးကြဲမှုကြောင့် ထိခိုက်သေဆုံးမှုရှိ ၊မရှိကိုတော့မသိရသေးပါဘူး။
မိုးမိတ်မြို့ဟာ ၁၀၂၇ စစ်ဆင်ရေးနဲ့အတူ တအာင်းအမျိုးသားလွတ်မြောက်ရေတပ်မတော်(TNLA)နဲ့မဟာမိတ်တွေက သိမ်းပိုက်ထိန်းချုပ်ခဲ့တဲ့မြို့ဖြစ်ပါတယ်။ဒါပေမယ့် တရုတ်အစိုးရရဲ့ကြားဝင်မှုနဲ့ မိုးမိတ်မြို့နဲ့ မိုးကုတ်မြို့ကို စစ်တပ်ကကျည်တချက်မဖောက်ရဘဲ ၂၀၂၅ အောက်တိုဘာလမှာTNLA ကပြန်လွှဲပေးခဲ့တာပါ။ အဲဒီနောက်ပိုင်း ဝင်လာတဲ့ စစ်ကောင်စီတပ်တွေကို PDF ပူးပေါင်းတပ်တွေက တိုက်ခိုက်ခဲ့ကြပါတယ်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန(MOD) စစ်ရုံးချုပ်က မိုးကုတ် – မိုးမိတ်ဒေသ စစ်ဆင်ရေးစစ်ဦးစီးအဖွဲ့ကို နိုဝင်ဘာလ (၉) ရက်နေ့မှာဖွဲ့စည်းခဲ့ပြီး စစ်တပ်စစ်ကြောင်းတွေကို တိုက်ခိုက်ခဲ့တာပါ။
မတ်လဆန်းထဲမှာ တိုက်ပွဲတွေပိုမိုပြင်းထန်လာပြီးတဲ့နောက်ပိုင်း PDFပူးပေါင်းတပ်တွေက ဆုတ်ခွာခဲ့ရပါတယ်။
အဲ့ဒီနောက်ပိုင်း စစ်တပ်က မြို့ထဲမှာတပ်စွဲထားပြီးကျေးရွာတွေဘက်မှာတော့ KIA၊ PDFနဲ့ ပူးပေါင်းတပ်တွေအပြင်SSPP/SSAလည်း တပ်စွဲလှုပ်ရှားနေပါတယ်။
