ကိုဗစ်ရောဂါထိန်းချုပ်ကန့်သတ်နိုင်ဖို့အတွက် ဖာပွန်-ကမမောင်း-ဘားအံလမ်းပိုင်းမှာ သွားလာနေတဲ့ ခရီးသည်နဲ့ ယာဉ်တွေကို ဇူလိုင် ၁၃ ရက်ကစပြီး အသွားအလာကန့်သတ်တော့မယ်လို့ ဖာပွန်မြို့နယ်အုပ်ချုပ်ရေးအဖွဲ့ထံကနေ သိရပါတယ်။
ဖာပွန်မြို့ပေါ်မှာ ကိုဗစ်ရောဂါဖြစ်ပွားမှုနှုန်းတွေ မြင့်မားလာတာကြောင့် ကူးစက်ပြန့်ပွားမှုကို ထိန်းချုပ်တဲ့အနေနဲ့ ဖာပွန် – ကမမောင်း – ဘားအံလမ်းပိုင်းမှာ သွားလာနေတဲ့ ခရီးသည်နဲ့ မော်တော်ယာဉ်တွေကို ၁၀ ရက် တစ်ကြိမ်၊ တစ်ကြိမ်ကို ၂ ရက်သာ သွားလာခွင့်ပြုမှာဖြစ်ပါတယ်။
“ဖာပွန်မြို့ပေါ်မှာ ပိုးတွေ့တာတအားများတယ်။ မနက်ဖြန်နောက်ဆုံးနေ့ပေါ့။ ဘားအံ ဖာပွန်အတက်အဆင်းကားတွေကို ၁၀ ရက် တစ်ကြိမ်သာ အတက်အဆင်းလုပ်ကြဖို့ မြို့နယ်အုပ်ချုပ်ရေးအဖွဲ့က အသိပေးထားတယ်။ ဥပမာ- လတစ်လရဲ့ ၁၁ ၁၂ ရက်နေ့၊ ၁၉ ၂၀ ရက်နေ့လိုတွေမှာ အတက်အဆင်းပြုလုပ်ကြဖို့ပေါ့” လို့ ဖာပွန်မြို့ခံတစ်ဦးရဲ့ ပြောကြားချက်အရ သိရပါတယ်။
အသွားအလာကန့်သတ်ထားတဲ့ ရက်တွေအတွင်း အရေးပေါ်ကျန်းမာရေးကိစ္စပေါ်ပေါက်လာရင် သွားလာဖို့အတွက် တာဝန်ရှိသူတွေထံ ဆက်သွယ်ဆောင်ရွက်ပြီး သွားလာနိုင်တယ်လို့လည်း မြို့နယ်အုပ်ချုပ်ရေးအဖွဲ့ထံကနေ သိရပါတယ်။
Public Service Announcement
ဖာပွန်မြို့ပေါ်မှာ ကိုဗစ်ရောဂါလူနာဦးရေ ၂၀ ကျော်ရှိပြီး မြို့ဆေးရုံမှာ ဆေးကုသမှုပေးနေတယ်လို့ သိရပါတယ်။
ပြီးခဲ့တဲ့ လတွေတုန်းက ဖာပွန်ဒေသမှာ ဖြစ်ပွားခဲ့တဲ့ တိုက်ပွဲတွေကြောင့် ဖာပွန်-ကတိုင်တိ- ကမမောင်းလမ်းပိုင်းကို ၃ လနီးပါးကြာ သွားလာခွင့်တွေ ပိတ်ထားခဲ့ရပြီး မြို့ပေါ်မှာ အခြေခံစားသောက်ကုန်တွေ စက်သုံးဆီတွေ ဈေးနှုန်းအဆမတန် တက်ခဲ့ရတာဖြစ်ပါတယ်။
