ကြာအင်းတောင်ဆီလည်ပတ်တဲ့အမျိုးသားတစ်ဦးမူးလဲပြီးသေဆုံး

အောက်တိုဘာ – ၂၆ ၊၂၀၂၆ ၊ မေနွယ်ဦး /People’s Spring

ကရင်ပြည်နယ်၊ ဘားအံမြို့၊ ကြာအင်းတောင်ဆီ ဒီနေ့ (အောက်တိုဘာ ၂၆ ရက်​) သီတင်းကျွတ်လပြည့်နေ့မှာ လာရောက်လည်ပတ်တဲ့ ခရီးသွားတစ်ဦး မူးလဲပြီး အသက်ဆုံးပါးသွားတယ်လို့ ဒေသခံတွေနဲ့ လူမှုကယ်ဆယ်ရေးအဖွဲ့ဆီက သိရပါတယ်။

ဒီနေ့ သီတင်းကျွတ်လပြည့်နေ့မှာ ဘားအံမြို့ဆီ လာရောက်လည်ပတ်သူတွေများပြားနေသလို ကရင်ပြည်နယ်ကအထင်ကရနေရာတစ်နေရာဖြစ်တဲ့ ကြာအင်းတောင်ပေါ်ကိုလည်းလည်ပတ်ကြသူတွေရှိနေတာပါ။

ဒီမနက်ပိုင်း ကြာအင်းတောင်ပေါ်ကို လာရောက်လည်ပတ်တဲ့ ရန်ကုန်မြို့က အသက် ၆၅အရွယ် အမျိုးသားတစ်ဦး မူးလဲပြီး သေဆုံးသွားခဲ့ပြီး ၊ အဲဒီအမျိုးသားဟာ နှလုံးရောဂါအခံရှိသူတစ်ဦး ဖြစ်တယ်လို့ ဒေသတွင်းရှိ လူမှုကယ်ဆယ်ရေးအဖွဲ့ဆီက သိရပါတယ်။

Public Service Announcement

ဒီမနက်ပိုင်းဘားအံမြို့ရဲ့ ရာသီဉတုကတော့ မိုးအုံခဲ့ပါတယ်။

ဒါ့အပြင် မနေ့ (အောက်တိုဘာလ ၂၅ ရက်) ညပိုင်းကလည်း ဇွဲကပင်တောင်ကြော၊ နွားလပို့တောင်ထွတ်ကိုတက်ကြတဲ့ Grade-12 ကျောင်း သားလူငယ် ခုနှစ် ဦးတို့ဟာလမ်းပျောက်သွားခဲ့ပြီး တောင်ပေါ်က ပြန်မဆင်းတတ်တာကြောင့် မီးသတ်နဲ့ လူမှုကယ်ဆယ်ရေးအဖွဲ့တွေက လမ်းပြခဲ့ရတယ်လို့ရပါတယ်။

လူငယ် ခုနှစ် ဦး လမ်းပျောက်နေတယ်ဆိုတာကို ည ၇ နာရီ ၁၇ မိနစ် မှာသတင်းရတာဖြစ်ပြီး ၂ နာရီခွဲခန့်အကြာ ည ၉ နာရီခွဲအချိန်မှာတော့ အဲဒီလူငယ်တွေကို တောင်အောက်ကို ပြန်လည်ခေါ်ဆောင်ပေးနိုင်ခဲ့တယ်လို့သိရပါတယ်။

ပြည်တွင်းခရီးသွားတွေကြား နာမည်ကြီးနေတဲ့ ဘားအံမြို့က ကြာအင်းတောင် (ပုံဟောင်း) ဓာတ်ပုံ – လူမှုကွန်ရက်