အိမ်နီးချင်းနိုင်ငံများ၏ လေပိုင်နက်ကျော်လွန် အသုံးပြုပြီး မြန်မာပြည်သူများအား သတ်ဖြတ် နေမှုအား ထိရောက်ပြင်းထန်စွာ အရေးယူကြရန် တိုက်တွန်း
အိမ်နီးချင်းနိုင်ငံများ၏ လေပိုင်နက်ကျော်လွန် အသုံးပြုပြီး မြန်မာပြည်သူများအား သတ်ဖြတ် နေမှုအား ထိရောက်ပြင်းထန်စွာ အရေးယူကြရန် တိုက်တွန်းချင်းအမျိုးသားတပ်ဦး(CNF)ဌာနချုပ်အား စစ်ကောင်စီက နှစ်ရက်ဆက် လေကြောင်းမှ ဗုံးကြဲတိုက်ခိုက်မှု ပြုလုပ်ခဲ့ခြင်းအပေါ် ပြင်းထန်စွာ ရှုတ်ချကြောင်း အမျိုးသားညီညွတ်ရေး အစိုးရ (NUG)က ယနေ့ ထုတ်ပြန်ခဲ့ပြီး စစ်ကောင်စီ၏ လုပ်ရပ်များသည် ကုလလုံခြုံရေးကောင်စီ၏ ဆုံးဖြတ်ချက် ဖြစ်သော အကြမ်းဖက်မှုများ ရပ်တန့် ရန်ဆိုသည့် အချက်ကို ပြောင်ပြောင်တင်းတင်းချိုးဖောက်နေခြင်းဖြစ်သည်ဟု ဖော်ပြသည်။
စစ်ကောင်စီတပ်သည် ဇန်နဝါရီ ၁၀ရက်နှင့် ၁၁ရက်တွင် ထန်တလန်မြို့နယ်ရှိ CNFဌာနချုပ် ဗစ်တိုးရီးယားစခန်းကို ဗုံးကြဲတိုက်ခိုက်ခဲ့ရာ ပထမနေ့တွင် CNF ရဲဘော် ၅ဦးကျဆုံးပြီး ၁၀ဦးခန့် ဒဏ်ရာရရှိခဲ့သည်။ဒုတိယနေ့ တိုက်ခိုက်မှုတွင် လူထိခိုက်ကျဆုံးမှုမရှိသော်လည်း ဒေသခံများအား ဆေးကုသပေးနေသည့် လူနာဆောင်နှင့် နေအိမ်အချို့ ပျက်စီးခဲ့သည်။
စစ်ကောင်စီက လေကြောင်းမှ ဗုံးကြဲတိုက်ခိုက်ရာတွင် အိန္ဒိယနိုင်ငံ နယ်နိမိတ်အတွင်းသို့ ဗုံးတစ် လုံး ကျရောက်ပေါက်ကွဲခဲ့ကြောင်း ဖော်ပြထားသည်။
အိမ်နီးချင်းနိုင်ငံများ အနေဖြင့်လည်း မိမိတို့၏ လေပိုင်နက်ကို ကျော်လွန်အသုံးပြုကာ မြန်မာပြည်သူများကို သတ်ဖြတ်နေရုံသာမက၊ အိမ်နီးချင်းနိုင်ငံများရှိ ပြည်သူလူထု၏ အသက်အိုးအိမ်စည်းစိမ်လုံခြုံမှုကိုပါ ခြိမ်းခြောက်လာနေသည့် အကြမ်းဖက်စစ်ကောင်စီ၏ လုပ်ရပ်များကို ထိရောက်ပြင်းထန်စွာ အရေးယူ ဆောင်ရွက်မှုများ အမြန်ဆုံးပြုလုပ်ကြပါရန် NUGက တိုက်တွန်းသည်။
Public Service Announcement
ယခု တိုက်ခိုက်မှုမတိုင်မီကလည်း စစ်ကောင်စီတပ်သည် ကရင်ပြည်နယ်၊ ကချင်ပြည်နယ်၊ စစ်ကိုင်းတိုင်း၊ မကွေးတိုင်းတို့တွင် လေကြောင်းအသုံးပြုကာ ဗုံးကြဲတိုက်ခိုက်မှု များ ကြိမ်ဖန်များစွာပြုလုပ်ခဲ့ရာ အာဏာသိမ်းကာလအတွင်း လေကြောင်း တိုက်ခိုက်မှုကြောင့် သေဆုံးသူ ၄၆၀ ကျော်ရှိခဲ့ပြီး အများစုမှာ ကလေးငယ်များ အပါအဝင် အရပ်သားပြည်သူ များဖြစ်သည်ဟု ထုတ်ပြန်သည်။
အကြမ်းဖက်စစ်ကောင်စီ၏ လူမဆန်သော သတ်ဖြတ်မှုများကြောင့် ကျဆုံးခဲ့ကြရသော တိုင်းရင်းသား ပြည်သူများအတွက် ဝမ်းနည်းကြေကွဲ ရကြောင်း ဖော်ပြခဲ့ပြီး ကျဆုံးခဲ့ရသူ တစ်ဦးတစ်ယောက်ချင်းစီတိုင်းအတွက် တရားမျှတမှုကို ပြန်လည်ရရှိနိုင်ရေး ပြည်တွင်းနှင့် နိုင်ငံတကာတရားဥပဒေများနှင့်အညီ အစွမ်းကုန်ကြိုးစား ဆောင်ရွက်သွားမည်ဟု NUGက ဆိုသည်။
စစ်ကောင်စီ၏ လုပ်ရပ်များသည် အကြမ်းဖက်မှုများကို ရပ်တန့်ရန်တောင်းဆိုထားသည့် ကုလသမဂ္ဂလုံခြုံရေးကောင်စီ၏ ဆုံးဖြတ်ချက်ကို ပြောင်ပြောင်တင်းတင်းချိုးဖောက်ခြင်းဖြစ်ပြီး မြန်မာ့အရေးကိစ္စကို ပြေလည်စေရန် ကူညီဆောင်ရွက်နေသည့် နိုင်ငံတကာအသိုင်းအဝိုင်း၏ ကြိုးစားမှုများကိုလည်း လျစ်လျူရှုနေခြင်း ဖြစ်ကြောင်း ဖော်ပြသည်။
ထို့ကြောင့် နိုင်ငံတကာအသိုင်းအဝိုင်းအနေဖြင့် မြန်မာ့အရေးကိစ္စကို အမြန်ဆုံးဖြေရှင်းနိုင်ရေးအတွက် အမျိုးသားညီညွတ်ရေးအစိုးရ၊ ပြည်ထောင်စုလွှတ်တော်ကိုယ်စားပြုကော်မတီ၊ အမျိုးသားညီညွတ်ရေး အတိုင်ပင်ခံကောင်စီ အပါအဝင် ပြည်သူလူထုကို ကိုယ်စားပြုသည့် မြန်မာ့တော်လှန်ရေးအင်အားစုများနှင့် ခိုင်ခိုင်မာမာလက်တွဲ ဆောင်ရွက်သင့်ကြောင်း တိုက်တွန်းထားသည်။
