မတရားဖိနှိပ်ချုပ်ချယ်မှုတွေကို အပြင်းအထန်ကန့်ကွက်ရှုံ့ချပြီး အကြမ်းမဖက်တဲ့နည်းလမ်းတွေနဲ့ တည်ဆောက်ထားတဲ့ ငြိမ်းချမ်းသာယာဝပြောမှုကိုသာ လိုလားတယ်လို့ မြန်မာနိုင်ငံနှစ်ခြင်းခရစ်ယာန်အသင်းချုပ် (MBC) ဒီကနေ့ရက်စွဲနဲ့ သဘောထားကြေညာချက် ထုတ်ပြန်လိုက်ပါတယ်။
စစ်မက်ဖြစ်ပွားနေတဲ့ဒေသက သတင်းတွေအရ ဘုရားကျောင်း၊ သာသနာအဆောက်အဦးနဲ့ လူနေအိမ်တွေကို လက်နက်ကြီးထိမှန်ပြီး ပျက်စီးဆုံးရှုံးမှုတွေ ကြုံတွေ့နေရတာ၊ အပြစ်မဲ့ပြည်သူတွေ ဓမ္မအမှုတော်ဆောင်တွေ၊ သင်းအုပ်ဆရာတွေ ဖမ်းဆီးခံရတာ သတ်ဖြတ်ခံရတာနဲ့ ပစ္စည်းတွေ အဓမ္မလုယက်ခံရတာတွေ ကြုံတွေ့နေရကြောင်း ကြားသိခဲ့ရတယ်လို့ မြန်မာနိုင်ငံနှစ်ခြင်းခရစ်ယာန်အသင်းချုပ်က ဆိုပါတယ်။
ဒီဖြစ်ရပ်တွေအပေါ် မြန်မာနိုင်ငံနှစ်ခြင်းခရစ်ယာန်အသင်းချုပ်အနေနဲ့ များစွာတုန်လှုပ်ခြောက်ခြားလျက်ရှိပြီး ပြည်သူတွေအားလုံးအတွက် စိုးရိမ်ပူပန်တယ်လို့ ထုတ်ပြန်ချက်မှာပါရှိတာပါ။
နောက်နောင်ကာလတွေမှာ အခုလိုဆိုးရွားတဲ့လုပ်ဆောင်မှုတွေကို မမြင်တွေ့လိုပဲ ဘာသာရေး လူမျိုးရေးပဋိပက္ခတွေ ကြီးမားစွာ ဖြစ်ပေါ်လာနိုင်မှုကိုလည်း လုံးဝမလိုလားဘူးလို့ မြန်မာနိုင်ငံနှစ်ခြင်းခရစ်ယာန်အသင်းချုပ်က ဆိုပါတယ်။
Public Service Announcement
တိုင်းပြည်အတွင်း နိုင်ငံရေးပဋိပက္ခတွေကြောင့် တိုင်းနဲ့ပြည်နယ်အချို့မှာ တိုက်ပွဲဖြစ်ပွားတာ၊ ပြည်သူတွေရဲ့ လူမှုဘဝလုံခြုံမှုမရှိတာ၊ တရားဥပဒေစိုးမိုးမှုမရှိတာ၊ စီးပွားရေး ပညာရေးနဲ့ ကျန်းမာရေးဆိုင်ရာ အခက်များစွာ ရင်ဆိုင်ကြုံတွေ့နေရတဲ့အတွက် ပြည်သူတွေအားလုံးနဲ့ထပ်တူ ဝမ်းနည်းကြေကွဲခဲ့ရတယ်လို့ မြန်မာနိုင်ငံနှစ်ခြင်းခရစ်ယာန်အသင်းချုပ်ရဲ့ ထုတ်ပြန်ထားချက်အရ သိရပါတယ်။
ပြီးခဲ့တဲ့ စက်တင်ဘာ ၁၈ ရက်က ချင်းပြည်နယ် ထန်တလန်မြို့မှာ အကြမ်းဖက်စစ်တပ်က ပစ်ခတ်ခဲ့လို့ ထန်တလန်ရာပြည့်နှစ်ခြင်းခရစ်ယာန်အသင်းတော်က သင်းအုပ်ဆရာတစ်ဦးဖြစ်သူ ပါစတာကျုံးဗျက်ဟုမ်းဟာ သေဆုံးသွားခဲ့ပြီး သင်းအုပ်ဆရာတော်ရဲ့ ဖုန်း၊ နာရီနဲ့ လက်စွပ်တို့ကို စစ်တပ်က လုယက်ယူဆောင်သွားခဲ့တာဖြစ်ပါတယ်။
အဲ့ဒီ့ဖြစ်ရပ်ဖြစ်ပွားပြီးတဲ့နောက် ချင်းနှစ်ခြင်းခရစ်ယာန်အဖွဲ့ချုပ်၊ ကချင်နှစ်ခြင်းခရစ်ယာန်အဖွဲ့ချုပ်တွေက အသီးသီးကန့်ကွက်စာထုတ်ပြီး သဘောထားကြေညာချက် ထုတ်ပြန်ခဲ့တာ ဖြစ်ပါတယ်။
