နိုဝင်ဘာ-၂၁၊ ၂၀၂၆။ဒလပန်း/People’s Spring
ပဲခူးတိုင်း၊နတ်တလင်းမြို့နယ်မှာ စစ်တပ်ရဲ့ လက်ချက်ကြောင့် ဒေသခံ ၆ ဦးသေဆုံးခဲ့ပြီး ၅ ဦးထိခိုက်ဒဏ်ရာရရှိခဲ့တယ်လို့ ဒေသခံတွေကပြောပါတယ်။
ပြီးခဲ့တဲ့နိုဝင်ဘာ ၁၇ရက်မှာရှားစေးဖို့ကျေးရွာမှာတပ်စွဲထားတဲ့စစ်တပ်က ကျောက်ခွက်ကျေးရွာနဲ့ အနီးအနားဝန်းကျင်ကို လက်နက်ကြီး၊ ဒရုန်းနဲ့ ပစ်ခတ်ခဲ့တာကြောင့် ဒေသခံ ၆ ဦးသေဆုံးခဲ့ပြီး ၅ ဦးထိခိုက်ဒဏ်ရာရရှိခဲ့တာဖြစ်ပါတယ်။
“သေဆုံးတာကတခြားရွာကနွားပွဲစားလင်မယား၂ယောက်၊ ကိုသက်ကို၊ ကိုမင်းလတ်လင်မယား၂ယောက်ရယ် နောက်တစ်ယောက်ရယ် အားလုံးဆိုရင် ၆ ယောက်ပါ ထိခိုက်က ၅ ယောက်ပါ “လို့ ဒေသခံတစ်ဦးကပြောပါတယ်။

Public Service Announcement
ဒါအပြင် နိုဝင်ဘာ ၂၀ ရက်နေ့ မနက်ပိုင်းမှာလည်း လယ်အင်းကျေးရွာမှာတပ်စွဲထားတဲ့ စစ်သားတွေက လက်နက်ကြီး၊ဒရုန်းတွေနဲ့ပစ်ခတ်ကာ ဘန့်ဘွေကုန်းကျေးရွာအတွင်းကို စစ်ကြောင်းထိုးဝင်ရောက်ခဲ့တယ်လို့ ဒေသခံတစ်ဦးက ပြောပါတယ်။
“ကျောက်ခွက်ရွာကိုကျော်ပြီးဘန့်ဘွေးကုန်းရောက်လာတာပါ။အင်အားတစ်ရာကျော်ပါစစ်ကြောင်းပါ ရွာသားတွေကို ဖမ်းစီးထားပြီး ဖုန်းတွေသိမ်းထားပါတယ်။တချို့ရွာသားတွေက ထွက်ပြေးတိမ်းရှောင်နေရပါတယ်”လို့ ပြောပါတယ်။
အဲ့ဒီနောက် စစ်တပ်စစ်ကြောင်းဟာ ဘန့်ဘွေကုန်းကျေးရွာမှာတပ်စွဲထားပြီး ညနေပိုင်းမှာတော့ကျေးရွာအတွင်းကနေအိမ်တွေကို မီးရှို့ဖျက်ဆီးတာတွေလုပ်ဆောင်နေတယ်လို့ ဒေသခံတွေဆီကသိရပါတယ်။
စစ်တပ်စစ်ကြောင်းထိုးဝင်ရောက်လာမှုကြောင့် ကျောက်ခွက်ကျေးရွာနဲ့ ဘန့်ဘွေကုန်းကျေးရွာက ဒေသခံတွေဟာ ဘေးလွတ်ရာကို ထွက်ပြေးတိမ်းရှောင်နေကြရပါတယ်။

























































