စစ်ကိုင်းတိုင်း၊ မုံရွာမြို့ ထန်းတောအင်းဖြတ်ရပ်ကွက်ရှိ နေအိမ်တစ်အိမ် အနုကြမ်းစီးမှုဖြစ်ပွားပြီး အိမ်ရှင် နေ့စေ့လစေ့ကိုယ်ဝန်ဆောင်အမျိုးသမီး သတ်ပြီး ပစ္စည်းများယူဆောင်သွားကြောင်း မြို့ခံများက ပြောသည်။
ယနေ့(သြဂုတ် ၁၀ရက်) ညနေ ၃နာရီခန့်က အဆိုပါ နေအိမ်ရှိ အိမ်ရှင်အမျိုးသမီး အသတ်ခံရပြီး သူမသည် ရက်ပိုင်းအတွင်း သားဦးမွေးဖွားတော့မည့် ကိုယ်ဝန်ဆောင်အမျိုးသမီးဟု မြို့ခံများက ပြောသည်။
အဆိုပါ နေအိမ်ရှိ ဖုန်းနှစ်လုံး၊ ဆိုင်ကယ်(ကလစ်)တစ်စီးတို့အား ယူဆောင်သွားကြောင်း နီးစပ်သူများက ပြောသည်။
“ဓားပြတိုက်ပြီး မွေးခါနီး ၃ရက်အလို ကိုယ်ဝန်ဆောင်သည်ကိုပါ သတ်သွားတာ”ဟု ဒေသခံတစ်ဦးက ပြောသည်။
Public Service Announcement
အသတ်ခံရသည့် အမျိုးသမီးသည် ပြီးခဲ့သည့် ဇွန်လ ၁ ရက်က မင်္ဂလာသက်တမ်း(၁)နှစ်ပြည့်ခဲ့ခြင်းဖြစ်ပြီး လာမည့်သြဂုတ် ဒုတိယပတ်အတွင်း သားဦးယောကျာ်းလေး မွေးဖွားမည်ဖြစ်သည်။
ဖြစ်စဥ်အသေးစိတ်ကို လူထုနွေဦးက ဆက်လက်စုံစမ်းနေပြီး အနုကြမ်းစီးသတ်ဖြတ်သည့်ဖြစ်စဥ်၌ ကျူးလွန်သူမည်မျှပါရှိသည်ကို မသိရသေးပေ။
အာဏာသိမ်းပြီးကတည်းက မုံရွာမြို့တွင် ခိုးဆိုးလုယက်မှုများ မကြာခဏ ဖြစ်ပွားနေပြီး စစ်အုပ်စုတပ်စွဲရာအနီး၌ပင် ဓားပြတိုက်မှုများဖြစ်ပွားခဲ့ကြောင်း မြို့ခံများက ပြောသည်။
“အခုက မုံရွာမှာက ဓားပြတိုက်တာတွေ နေ့စဥ်လိုဖြစ်နေတာ။ အမှိုက်ကောက်တဲ့လူရဲ့ဆိုင်ကယ်တောင် ချမ်းသာမပေးတော့ဘူး။ ခိုးဆိုးလုနှိုက်တွေ ပေါတယ်။”ဟု မုံရွာမြို့ခံတစ်ဦးကဆိုသည်။
ပြီးခဲ့သည့် ဇန်နဝါရီ ၂၀ရက်ကလည်း မုံရွာမြို့ အောင်ချမ်းသာရပ်ကွက်ရှိ “ချမ်းမြေ့သုခ” ကုန်စုံဆိုင် ဓားပြတိုက်ခံရပြီး ဓားဖြင့်ပါ အခုတ်ခံရသောကြောင့် ဆိုင်ရှင်လင်မယားနှစ်ဦးလုံး ဆေးရုံရောက်ကာ အမျိုးသားဖြစ်သူ သေဆုံးခဲ့သည်။
