ကိုရီးယားရောက်မြန်မာတွေရဲ့ One Day Challenge ကနေ NUGကို ဒေါ်လာတစ်သိန်းလှူဒါန်း

တောင်ကိုရီးယားမြန်မာနိုင်ငံသားများရဲ့ One Day Challenge လှုပ်ရှားမှုက အမျိုးသားညီညွတ်ရေးအစိုးရ NUG ကို အမေရိကန်ဒေါ်လာတစ်သိန်း လှူဒါန်းခဲ့တယ်လို့ ဒီနေ့သတင်းထုတ်ပြန်ပါတယ်။

အာဏာရှင်စနစ်အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီပြည်ထောင်စုပေါ်ပေါက်ရေးအတွက် စစ်အာဏာ သိမ်းမှုဆန့်ကျင်ရေးကော်မတီ(ကိုရီးယား)- Myanmar Network ရဲ့ One Day Challenge အဖွဲ့ဝင်တွေ လှူဒါန်းတဲ့ ဒေါ်လာတစ်သိန်းကို NUG ကို ထည့်ဝင်လှူဒါန်းပေးမှုအား ကျေးဇူးတင်ကြောင်း NUG ယာယီသမ္မတ ဒူဝါလရှီးလက မှတ်တမ်းတင်ဂုဏ်ပြုလွှာ ပေးပို့ပါ တယ်။

အဲဒီ One Day Challenge လှုပ်ရှားမှုဟာ တောင်ကိုရီးယားရောက်မြန်မာတွေက သူတို့လစာထဲက လစာရဲ့တစ်ရက်စာကို NUGအတွက် လှူဒါန်းဖို့ ထည့်ဝင်ကြတာဖြစ်ပါတယ်။

စစ်အာဏာသိမ်းမှုဆန့်ကျင်ရေးကော်မတီ(ကိုရီးယား)ဟာ NUG ကို ဘဏ္ဍာရန်ပုံငွေထောက်ပံ့ဖို့ အတွက် One Day Challenge ကို ပြီးခဲ့တဲ့ ဇူလိုင်မှာ စတင်ခဲ့ပြီး အဲဒီလှုပ်ရှားမှုမှာ ကိုရီးယားရောက် မြန်မာ နိုင်ငံသားအဖွဲ့ဝင် ၁၃၁၇ ဦး(လက်ရှိ) ရှိပြီး NUG ကို လစဉ် ဘဏ္ဍာရန်ပုံငွေ ဝမ် ၁၂,၃၆၄၀,၀၀၀ ထောက်ပံ့နိုင်မယ်လို့ ဆိုပါတယ်။

Public Service Announcement

ဩဂုတ်နဲ့ စက်တင်ဘာမှာ ရရှိတဲ့ရန်ပုံငွေများအနက်မှ ဒေါ်လာ တစ်သိန်းနဲ့ ညီမျှတဲ့ ဝမ်ငွေ ၁,၂၀၃ သိန်း ကို အောက်တိုဘာ ၆ ရက်မှာ NUG ဘဏ်အကောင့်သို့ ကိုရီးယားဘဏ်ကတဆင့် လွှဲပေးခဲ့တယ်လို့ ထုတ်ပြန်ပါတယ်။

One Day Challenge မှာ တက်ကြွစွာပူးပေါင်းပါဝင်ပေးကြတဲ့ ကိုရီးယားရောက်မြန်မာနိုင်ငံသား တွေကို အထူးကျေးဇူးတင်ကြောင်း စစ်အာဏာသိမ်းမှုဆန့်ကျင်ရေးကော်မတီ(ကိုရီးယား)က ထုတ်ပြန်ပါတယ်။