ကချင်လက်နက်ကိုင်အဖွဲ့(KIA)နှင့်အာဏာသိမ်းစစ်တပ်တို့ ယနေ့ မနက်ပိုင်းက ရွှေကူမြို့နယ် ကျောက်ကြီး ဒေသ၌တိုက်ပွဲဖြစ်ပွားခဲ့ကြောင်း KIA သတင်းနှင့် ပြန်ကြားရေးဌာန Kachinnet Burmese က သတင်းဖော်ပြသည်။
KIA တပ်မဟာ(၈) တပ်ရင်း(၅)နယ်မြေ ကျောက်ကြီးဒေသ၌ တပ်စွဲထားသည့် အာဏာသိမ်းစစ်တပ် ခလရ (၃၆၃) တပ်ဖွဲ့မှ အင်အား ၁၀၀ ကျော်ဖြင့် ထိုးစစ်ဆင်လာ၍ KIA က ခုခံတိုက်ခိုက်ခဲ့ကြောင်း ဖော်ပြထား သည်။
အဆိုပါ ကျောက်ကြီးဒေသ တိုက်ပွဲ၌ နှစ်ဖက်ထိခိုက် ကျဆုံးမှု အခြေအနေများ ရှိ၊မရှိကိုမူ ဖော်ပြမထားပေ။
KIA တပ်မဟာ(၆)၊ တပ်ရင်း (၃၆) နယ်မြေ မုံးကိုးနှင့် ဖောင်းဆိုင် ဒေသ ၌လည်း ယနေ့ ညနေပိုင်းက အာဏာသိမ်းစစ်တပ်နှင့် ကိုးကန့်လက်နက်ကိုင်အဖွဲ့ (MNDAA)တို့ တိုက်ပွဲဖြစ်ပွားခဲ့ကြောင်းဖော်ပြထား သည်။ အဆိုပါဒေသ၌ MNDAAနှင့် စစ်ကောင်စီတပ်တို့ တိုက်ပွဲ ဖြစ်ပွားနေသည်မှာ နှစ်လခန့်ရှိပြီး ဩဂုတ်လကုန်ပိုင်း၌ တိုက်ပွဲပြင်းထန်ခဲ့ပြီး စစ်ကောင်စီတပ်မှ သေဆုံးထိခိုက်မှုများပြားခဲ့သည်။
Public Service Announcement
စက်တင်ဘာ ၂ရက်ကလည်း စစ်ကောင်စီတပ်က လက်နက်ကြီးဖြင့် ပစ်ခတ်၍ ဒေါ့ဖုန်းယန်ဒေသရှိ အရပ်သားပြည်သူတစ်ဦး၏ ကျွဲခြံ၌ လက်နက်ကြီး ကျရောက်ပေါက်ကွဲရာ ကျွဲ ၇ကောင် ထိမှန်သေဆုံးသွားကြောင်း ဖော်ပြခဲ့သည်။
