ချင်းပြည်နယ်၊ စစ်ကိုင်းတိုင်းနဲ့ မကွေးတိုင်းမှာ တပ်မတော်နဲ့ ပြည်သူ့ကာကွယ်ရေးတပ်ဖွဲ့တွေကြားက တိုက်ပွဲတွေ ပြင်းထန်လာနေပြီး လူသားချင်းစာနာမှု၊ လူ့အခွင့်အရေးနဲ့ လုံခြုံရေးအခြေအနေတွေ ဆိုးရွားနေတယ်လို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး(OCHA)က ဒီနေ့ (နိုဝင်ဘာ ၃ ရက်) ထုတ်ပြန်ပါတယ်။
ယူနီဆက် (UNICEF) က ထန်တလန်မြို့ထဲမှာ ပိတ်မိနေတဲ့ ကလေးငယ် ၂၀ ဦးရဲ့ လုံခြုံရေးကို စိုးရိမ်လျက်ရှိပြီး အဆိုပါကလေးငယ်များအပါအဝင် ပဋိပက္ခဒဏ်ခံစားရသူ ကလေးငယ်များအားလုံးရဲ့ လုံခြုံမှုရှိစေရန် ချက်ချင်းဆောင်ရွက်ပေးဖို့ တောင်းဆိုလိုက်တယ်လို့ ထုတ်ပြန်ချက်မှာ ဖော်ပြပါတယ်။
ချင်းပြည်နယ်က မြို့နယ်အတော်များများမှာ မေလကတည်းက တိုက်ပွဲတွေပြင်းထန်နေပြီး တိုက်ပွဲတွေကြောင့် အနည်းဆုံးလူပေါင်း ၁၈၃၀၀ ခန့် နေရပ်စွန့်ခွာထွက်ပြေးခဲ့ကြရတယ်လို့ OCHA က ဆိုပါတယ်။
အဲဒီတိုက်ပွဲရှောင်သူတွေထဲက လူဦးရေ ၁၀၀၀၀ ကျော်ဟာ အိန္ဒိယနိုင်ငံနဲ့ နယ်နိမိတ်ထိစပ်နေတဲ့ ထန်တလန်မြို့မှာ တိုက်ပွဲရှောင်နေတယ်လို့ OCHA ကထုတ်ပြန်ပါတယ်။
ဒါ့အပြင် ချင်းပြည်နယ်မှာ ရခိုင့်တပ်တော်နဲ့ တပ်မတော်တို့ကြားက တိုက်ပွဲတွေကြောင့် အိုးအိမ်စွန့်ခွာထွက်ပြေးရသူ ၇,၆၀၀ ခန့်ဟာလည်း ပလက်ဝမြို့က ယာယီစခန်းတွေမှာ ၂၀၁၉ ဒီဇင်ဘာကတည်းက နေထိုင်နေရတယ်လို့ဆိုပါတယ်။