ဒီမိုကရေစီလမ်းကြောင်းပေါ် ပြန်ရောက်ဖို့နဲ့ စစ်ကောင်စီကို တိုးမြှင့်ဖိအားပေးဖို့ ဗြိတိန်၊ ဂျာမနီ၊ အီးယူအပါအဝင် မိတ်ဖက်နိုင်ငံတွေနဲ့ အ​မေရိကန်ဆွေးနွေး

အမေရိကန်ဟာ မြန်မာနိုင်ငံ ဒီမိုကရေစီလမ်းကြောင်းပေါ် ပြန်လည်ရောက်ရှိဖို့ ပူးပေါင်းဆောင်ရွက်ရေးအတွက် ဗြိတိန်၊ ဂျာမနီ၊ အီးယူအပါအဝင် မိတ်ဖက်နိုင်ငံတွေနဲ့ ဆွေးနွေးခဲ့တယ်လို့ နိုင်ငံခြားရေးဝန်ကြီးဌာနက နိုဝင်ဘာ ၁၀ ရက်မှာ သတင်းထုတ်ပြန်ပါတယ်။

အမေရိကန်နိုင်ငံခြားရေး အတိုင်ပင်ခံပုဂ္ဂိုလ် Derek Chollet ဟာ ဩစတြေးလျ၊ ကနေဒါ၊ ပြင်သစ်၊ ဂျာမနီ၊ အီးယူ၊ နယူးဇီးလန်၊ ဗြိတိန်တို့က အရာရှိတွေနဲ့ မြန်မာ နိုင်ငံ ဒီမိုကရေစီ လမ်းကြောင်းပေါ် ငြိမ်းချမ်းစွာ ပြန်လည်ရောက်ရှိဖို့ နိုင်ငံတကာပူးပေါင်းဆောင်ရွက်ရေးကို မြှင့်တင်ဖို့ တွေ့ဆုံဆွေးနွေးခဲ့တယ်လို့ ထုတ်ပြန်ချက်မှာ ဖော်ပြပါတယ်။

မြန်မာစစ်ကောင်စီက အကြမ်းဖက်မှုကို ကျယ်ပြန့်စွာဆက်လက်အသုံးပြုနေမှုနဲ့ ပိုမိုဆိုးရွားလာတဲ့ လူသားချင်းစာနာမှုအကျပ်အတည်းကို လွန်စွာစိုးရိမ်တယ်လို့ အတိုင်ပင်ခံ Derek Chollet က ပြောပါတယ်။

စစ်ကောင်စီဟာ အာဆီယံရဲ့ဘုံဆုံးဖြတ်ချက် ၅ ရပ်ကို အကောင်အထည်ဖို့ အရေးပေါ်လိုအပ်မှုနဲ့ အာဆီယံအထူးကိုယ်စားလှယ်ကို မြန်မာပြည်လာရောက်ခွင့်ပြုရေး၊ ပါဝင်ပတ်သက်သူအားလုံးနဲ့ဆွေးနွေးနိုင်ရေးတို့ကို အမေရိကန်နိုင်ငံခြားရေးအတိုင်ပင်ခံက အလေးထားတိုက်တွန်းပါတယ်။

Public Service Announcement

နောက်ပြီး အကြမ်းဖက်မှုတွေအဆုံးသတ်ရေး၊ မတရားဖမ်းဆီးထိန်းသိမ်းခံရသူအားလုံးပြန်လွှတ်ပေးရေး၊ လူသားချင်းစာနာမှုတွေကို အဟန့်အတားမရှိ ခွင့်ပြုပေးရေး၊ လူ့အခွင့်အရေးချိုး ဖောက်မှုတွေကို ဖြေရှင်းရေးနဲ့ အားလုံးပါဝင်တဲ့ဒီမိုကရေစီစနစ်ကို ပြန်လည်ဖော်ဆောင်ရေး အတွက် စစ်ကောင်စီကို တိုးမြှင့်ဖိအားပေးဖို့ အရေးကြီးမှုကို Derek Chollet က အလေးထား ဆွေးနွေးခဲ့ပါတယ်။