စစ်တပ်က အာဏာသိမ်းပြီးကတည်းက ထိုကုမ္ပဏီသည်ချောက်မြို့နယ်တွင် ရေနံတွင်း အနည်းဆုံး ၈တွင်းကို တူးဖော်ခဲ့ခြင်းဖြစ်ပြီး ထိုထဲတွင် အာဏာသိမ်းပြီးနောက် ၆ တွင်းကို လုပ်ငန်းအသစ် စခဲ့ခြင်းဖြစ်သည်။ မြန်မာနိုင်ငံတွင် ဖေဖော်ဝါရီ၁ ရက်က နိုင်ငံတော်အာဏာကို စစ်တပ်ကအဓမ္မလုယူပြီးနောက် ထိုစင်ကာပူကုမ္ပဏီသည် လုပ်ငန်းများ ခေတ္တရပ်နားခဲ့သေးသည်။ သို့သော်ဇူလိုင်၁၆ ရက်တွင် စစ်ကောင်စီက ထိန်းချုပ်ထားသည့် မြန်မာ့ရေနံနှင့်သဘာဝဓာတ်ငွေ့လုပ်ငန်း(MOGE)နှင့် တွေ့ဆုံဆွေးနွေးပြီးနောက် လုပ်ငန်းများပြန်လည်စတင်နေခြင်းဖြစ်သည်။
အဆိုပါစင်ကာပူကုမ္ပဏီက ချောက်မြို့တွင် ရေနံတွင်းအမှတ် CHK-1229ကို တူးဖော်မည်ဖြစ်ပြီး ၂၀၂၂တွင် ရလာဒ်ထွက်ပေါ်လာအောင် ဆောင်ရွက်မည်ဟုဆိုထားသည်။ ၂၀၂၁အတွင်း စင်ကာပူကုမ္ပဏီက ဇန်နဝါရီ ၄ ရက်တွင် ရေနံတွင်းအမှတ် CHK-1221နှင့် ဇန်နဝါရီ ၂၅တွင် CHK-1225ကို တူးဖော်ခဲ့သည်။ စစ်တပ်အာဏာသိမ်းပြီးနောက် ကျန်နေရေနံတွင်း ၆တွင်းကို တူးဖော်ခဲ့ခြင်းဖြစ်သည်။
Interra Resources ကုမ္ပဏီကမြန်မာနိုင်ငံတွင် ၎င်းတို့ရှယ်ယာ ၆၀ ရာခိုင်နှုန်းပိုင်ဆိုင်သည့် GOLD petrolအမည်ဖြင့် မကွေးတိုင်း၊ချောက်မြို့နယ်ရှိ ကုန်တွင်းရေနံလုပ်ကွက် IOR-2 နှင့် ရေနံချောင်းရှိ MOGE-1လုပ်ကွက်တို့ကို ၁၉၉၆ခုနှစ်တွင်လုပ်ကိုင်ခွင့်ရခဲ့ခြင်းဖြစ်သည်။အာဏာသိမ်းအကြမ်းဖက်စစ်ကောင်စီ အတွက် ပြည်သူကိုသတ်သောလက်နက်များဝယ်ယူနိုင်ရန် နိုင်ငံခြားငွေမရစေရန် မြန်မာနိုင်ငံတွင် ရေနံနှင့်သဘာဝဓါတ်ငွေ့ တူးဖော်နေသော တိုတယ်၊ ပေါ်စကို စသော ကုမ္ပဏီများကို စစ်ကောင်စီသို့ ငွေများမပေးဘဲ သိမ်းထားပြီးပြည်သူ့အစိုးရတက်လာမှပြန်ပေးရန် အမျိုးသားညီညွတ်ရေးအစိုးရ (NUG)၊ အရပ်ဖက်အဖွဲ့အစည်းများ ၊ပြည်သူများက ထိုကုမ္ပဏီများထံ လက်မှတ်ရေးထိုးပြီးစာများပေးပို့နေကြသည်။